¹ Halitangwa lya butanu na atatu Mosesa wathanene Aloni na bana bendi babanalume na bakulunu baba Isalela. ² Wendekele kuli Aloni ngwendi, "Ambata muna ngombe mubutanga wa mulambu wa bubi, na manga wa nkomba wakujeneka kutenga wa mulambu wa kulumba, nakubilambula kuli Njambi. ³ Wapande kwendeka ku banu ba Isalela ngwobe, 'Ambateni membe wa nkomba wa mulambu wa bubi na muna ngombe na muna manga, byoshe bya mwaka umo bakujeneka kutenga, bya mulambu wa kalamba; ⁴ ambateni lalo ngombe na manga wa nkomba wa mulambu wa kwooloka mwane bwana bwakulitombola kuli Njambi, na mulambu wa mbuto wa kupandathana na mathzi, mwafwa lelo Njambi alisholola kuli yeni.'" ⁵ Cho banenele byoshe bije Mosesa wabakambeyeye ku tende ya kuliwanena, cho chikungulwilo chaba Isalela bethzile nakwimana ku mesho a Njambi. ⁶ Cho Mosesa wendekele ngwendi, "Ebi bikebyo namikambeyeye Njambi kulinga, mangana bumpau bwendi bwathe kusholoka kuli yeni." ⁷ Mosesa wendekele kuli Aloni ngwendi, "Shwena kuyeyi na mutula ulambule mulambu wobe wa bubi na mulambu wa kulumba, nakulinga chikombeyo chobe babenya nechi chabanu, nakwana bwana bwakulitombola bwa banu na kulinga chikombeyo hali bakebo, ngwe na kukambeya cha Njambi." ⁸ Cho Aloni washwenyene kuyeyi na mutula nakuthsiya muna ngombe wa mulambu wa bubi, ou wapwile wendi ibenya. ⁹ Bana ba Aloni babanalume banenele maninga kuli ikeye, cho wambwitikilemo munye wendi nakukwita ku bimbinga bya mutula; cho wetilile aje maninga ha butumamo bwa mutula. ¹⁰ Nambengocho, walumbile mathzi, bithso, na chifwiko cha lishuli ha mutula kupwa mulambu wa bubi, ngwe omu Njambi wakambeyeye Mosesa. ¹¹ Thitu na chilambu wabilumbilile ya chilombo. ¹² Aloni wathsiyile mulambu wa kulumba, cho bana bendi babanalume bamwanene maninga, awa washamunwinine mubimbango byoshe bya mutula. ¹³ Cho bamwanene mulambu wakulumba, chipuka ha chipika, hamolika na mutwe, cho wabilumbile ha mutula. ¹⁴ Wakushile bilyo byamukati na mendi cho wabilumbile kupwa bwana bwa kulumba ha mutula. ¹⁵ Aloni wanenele bwana bwa banu bwakulitombola--membe, nakubwambata kupwa bwana bwakulitombola ha bubi bwabo cho wabuthsiyile; wabulambwilile ha bubi, ngwe muje walingile na membe wakulibanga. ¹⁶ Watwalele mulambu wa kulamba naku ulambula ngwe muje wakambeyeye Njambi. ¹⁷ Watwalele mulambu wambuto; washulitwile liboko lyendi naku ulumbila ha mutula, hamilika na mulambu wakulamba wa mutondo. ¹⁸ Wathsiyile lalo ngombe na manga wa nkomba, bwana bwakulitombola bwa mulambu wa kwooloka, obu bwapwile bwa banu. Bana ba Aloni babanalume ba mwanene maninga, awa ashamunwinine mubimbango byoshe bya mutula. ¹⁹ Nambengocho, bateteleko mathzi a ngombe wa nkomba nawa a manga wa nkomba, mathzi amukila, mathzi akafwiki bilyo bya mukati, bithso, na chifwiko lishuli. ²⁰ Batwalele bilyo bije babatwile nakubyaka ha bin'undo, cho Aloni walumbile aje mathzi ha mutula. ²¹ Aloni wajundwile bije bin'undo na kathapo kakuchilyo kupwa mulambu wa kujundula kuli Njambi, ngwe omu abakambeyeye Mosesa. ²² Cho Aloni wajundwile maboko endi kubanu nakubakithwila; cho washulukile kutunda nakulambula mulambu wa bubi, mulambu wa kulumba, na mulambu wa kwooloka. ²³ Cho Mosesa na Aloni baile mu tende yakuliwanena, cho batuhukile lalo na kukithula banu, na bumpau bwa Njambi bwasholokele ku banu boshe. ²⁴ Tuhya twatundile kuli Njambi nakunyongetha mulambu wa kulumba namathzi ha mutula. Omu banu boshe bamwene echi batambekele nakushulubala mesho hathi.