¹ Buje bubwa bwa ngolinde buna totomoka; ije ngolinde ya kele ya mutunu ngachije mu inalumukiloni ololo! Ajoni mamanya a kele a kuthzila ololo a na shandokeloni mu bimbango bya bitapalo byoshe. ² Baje bakwenje ba mu Zione a akulibanga ba kele ba theo ya kama kuli yetu ngwe ngechi mwa ngolinde, olonini ololo ba napwoni ngwe ije milondo ya buma, chipangi cha maboko a muka kushonga buma! ³ Nameme bimbanje ba kana libele na ku jamwetha bana babo, olojo mwana wa munakathzi wa banu bange ali na bukenya, ngwe baje ba nyamalanda ba mu maambo. ⁴ Ndaka ya kakeke ina thakamena mu ndakwila yendi a mulonga wa lihwila; banike ba lomba byakulya, olojo na umo bene wai ya banabyo. ⁵ Baje bakele nakulya byakulya bya bibwa manene lalo bali na ku yebangela lika mu bitapalo. Baje ba kele na kuthzala buthzalo bwa bumbombo ololoni bali na ku lyalanga lika elu lya matumbo a lito. ⁶ Bubi bwa mwana bwa munakathzi wa banu bange buna tubakana bubi bwa mu Sondoma, ije ba nyongethele mu ku kemwina kwa lisho kwa ku jeneka nameme liboko limo lije lyethzile na ku ikwatha. ⁷ Bana ba bimyene bendi bakele ba kujela nameme kutubakana mbundu, na ku toka kutubakana na mashwe, na mibila yabo yakele ya ku takama, na ku byathzima na bukangule. ⁸ Olonini ololo bihanga byabo bina thzibala manene kutubakana mule; chojo bana bebaloni na mu bitapalo. Cho na chikoba chabo chi nominina a bithsiya byabo; chinomininoni chau ngwe chiti. ⁹ Baje ba kathsi ku mukwale ba ka bwaha ku tubakana baje ba ka landuka ku njala, mwafwa ba ka bangelela na kayando ka kama, a mulonga wa ku jeneka bya kulya bya ku tunda mu mahya. ¹⁰ A mulonga wa bukama bwa tuyando tuje twethzile ku banu bange; maboko a banakathzi ba ngothzi a telekele bana babo na kuba tenga bya kulya mu thimbu bene ije mwana wa munakathzi wa banu bange bakele na ku mu nyongetha. ¹¹ Ngachijebene Yehoba wa sholwele kunyengwa kwendi; cho wa sholwele ku lubala kwendi. kwa kama. Wa shwamekele likuna mu Zione lije lya wemekele bulalo bwayo bwoshe too. ¹² Bimyene ba mu kaye kuba kulahelele, indi nambe bene umo wa tunga mu kaye wathele ku kuthinganyeka, ngwabo chitothzi natha kwija na ku kobela mu bikolo bya Yelusalema embwe. ¹³ Olonini echi cha lingikile bene a mulonga wa bubi buje bakele na kulinga tupolofita bendi na bilinga bya bibi bije bakele na kulinga tupilisitu bendi baje betilile maninga a banu baje ba kuthzila na kwonwa mulonga. ¹⁴ Chojo bendanganene, mu bupuputwa, mu bitapalo. Cho bali jwalethele manene na aje maninga ngechi nambe umo wai ya shakele nambe ku kwata lika ku buthzalo bwabo. ¹⁵ Ngechibene banu bakele na ku ba kuwilila ngwabo, "Tundeni aha! Muli na mathzilo!" "Yeni! Tundeni aha! Kethi mutukwate!" Chojo bendanganene bene; banu ba mu mafuti bendekele ngwabo, "Aba ku bathoni ku tumbama lalo muno embwe." ¹⁶ Cho Yehoba babenya ikeye wa ba shandwile; cho kethi ku bombako lalo mbunge embwe. Ngechi ku banene kathingimiko ku tupilisitu, cholalo ku ba sholwethele mema ku mbunge kuli ba myata. ¹⁷ Mesho etu a jukile, kulabelela bukathi buje ku bwethzile; ku tundilila ku tuposhi twetu twa bandemenene a lifuti lije ku lyathele ku twoyela. ¹⁸ Bakele na ku tu kabangeya munima, ngechi ku twatheloni nameme kwenda mu bi tapalo byetu. Chojo mamanethelelo etu a kele mu yehi na matangwa etu a hwile, mamanethelelo etu chili bene etele. ¹⁹ Baje bakele na ku tukaba ba kele na lumbithi lwa ku hyana lwa ngonga wa mwilu. Chojo ba tu shekele ku malundu na ku tu bandamena mu mambo. ²⁰ Uje bene muuku a mwonyo mu majulu etu — uje bangwile na ku mubwabetha kuli Yehoba ikeye bene ba kwatele mu mabumbu abo; uje bene bendekele ngwabo, "Mwithi ya buntwama bwendi mukemwo bene tunatha ku yoyela a kati ka mafuti." ²¹ Jolela na ku bwahelela, muna Endomu wa munakathzi, yobe wa tunga mu lifuti lya Uzu. Olonini ei nganja ija na kweta lalo na kuli yobe bene; chojo nobe lalo wa ku penda na kuli shulula yobe babenya. ²² Obe muna Zione wa munakathzi, kashitiko kobe ololo bene ketoni ku mamanethelelo ako; ka talelelaho na ku mi tumbika mu bunomo embwe. Oloni yobe muna Endomu wa munakathzi chili bene a ka ku thzangametha a mulonga wa shili yobe; chojo aka jombolola bibi byobe.