¹ Yange ou namono bihuli mu ngila ya kunyanyametha cha Yehoba. ² Wanjitundithileko na kunjinenetha kwenda mu lithuthulungu kethi ngwe mu cheke embwe. ³ Chili bene wanjipupile na liboko lyendi thimbu yoshe, mulyakila litangwa. ⁴ Wanenethele mubila na chikonde change mikiki; na kupokola bithsiya byange. ⁵ Watungile chipangi cha likanjo kuli yange, nakunjithzenguluka na butenu nabukalu. ⁶ Wanjinenethele kuyoya mu myela yakuthzibala, ngwe baje bathsile laja. ⁷ Wanjithzengulwithile na chibumbe cho kunjatha kutewa embwe. Walingithile malenge ange kulema ⁸ nambe njithana na kulila bukwathi, akathzimi kulomba change. ⁹ Wathzikile ngila yange na bimbumbe bya mamanya; nakuluwanganetha ngila yange. ¹⁰ Napu ngwe mbeya ali mukunjibandelela, ndumba ali mukubanda; ¹¹ atengulwile ngila yange, nanjipwitha ngundu. ¹² Wakokele manana endi nakunjipwitha chuma chakwasha mukili wendi. ¹³ Watibile bithso byange na mikili ya buta bwendi. ¹⁴ Njethzile nakupwa chuma chakujola ku banu, kupwa mwatho wakujoletha litangwa lyoshe. ¹⁵ Wanjishulithile na byakulula nakunjithindiya kunwa bya kulula. ¹⁶ Nanenetha mayo ange kulya mamanya, na kunjalanga mu lito. ¹⁷ Banalenye mwonyo wange kukwoloka; Njinebala chifwa cha kuya kulutwe. ¹⁸ Cho njendeka ngwange, "Kutakama change chanyongo na kubandamena change muli Yehoba." ¹⁹ Anuka bihuli byange na kulumbwangeya change, ntwima na kulula. ²⁰ Njitwalelela kubyanuka cho mwonyo wange unathzeyela muli yange. ²¹ Oloni njethzile nakwanuka echi cho ngachije njili na lukulahelo: ²² Kukoletha chithzemo cha Yehoba kuchethi kuhwa na chikeketima chendi kuchethi kukuma, ²³ ha mutondo woshe bakapu babahya; chikulahelo chobe chapwa chakama. ²⁴ "Yehoba napu buthswana bwange," mwanendeka mwonyo wange, ngachije njikakandelela muli lyakeye. ²⁵ Yehoba apwa wamubwa kuli baje bakamubandamena, kuli mwonyo ou ukamuthetela. ²⁶ Chinapu chachibwa kubandamena bwoboke bwa Yehoba mu kwoloka kulu. ²⁷ Chinapu chachibwa kuli munu kwambata mang'ati mubukwenje bwendi. ²⁸ Mwecheleni atumbame lika lyendi kulu, omwo bakaya hali lyakeye. ²⁹ Mwecheleni ake kanwa kendi mulikungu—muje mwatha kupwa kukulahela lalo. ³⁰ Mwecheleni ane linana lyendi kuli ou amupupa, cho mumwechele athulithiwe mbe na matuka. ³¹ Mwafwa Shukulu kakatha kutubyana myaka yoshe embwe, ³² oloni nambe anena buthiwa, akapwa na chikeketima kwetheketha na kutuma cha chithzemo chendi chakukola. ³³ Mwafwa kethi kuyandetha kutundilila mu mbunge yendi nameme kuyandetha bana ba munu embwe. ³⁴ Kulyatelela mu myanja binthzinda boshe ba hathi, ³⁵ kubyanetha chiyulo chachibwa ku munu ku mesho ou wa mwilu, ³⁶ kulenya munu chiyulo chachibwa mumulonga wendi— Shukulu katha kutabela obyo byuma embwe! ³⁷ Iya nendeka chuma cho chipwa cha kusholoka, kubanga Shukulu achitabethe? ³⁸ Nkuma kuchatundile mukanwa kou wa mwilu ngwabo bukalu bwoshe na bubwa bwije ndi? ³⁹ Munu wa mwonyo ayayabala bationi? Munu ayayabala bati ha kushitika cha bubi bwendi? ⁴⁰ Echeleni tutale ha bilinga byetu nakubyetheka, cho echeleni twiluke kuli Yehoba. ⁴¹ Echeleni tujundule bimbunge byetu na maboko etu kuli Njambi wa mwilu: ⁴² "Tunashaula nakutenguluka, cho kumwakonekelele. ⁴³ Unalifwiki na matoto nakutusheka, unathsiyi cho kuwathethzeleho umo. ⁴⁴ Unalifwiki obe yabenya na lishelwa mangana kethi kupwe kulomba chakwitamo. ⁴⁵ Unatupwitha ngwe chuma cha mathzilo na bunyengwe hakati ka banu. ⁴⁶ Bakang'ole betu boshe bakatuthingi, ⁴⁷ kulikuta na bukalu binaija hali yetu, kubihya na kunyongetha. ⁴⁸ Mesho ange anakumbwambumuka mithothzi hamulonga wa kunyongetha banu bange. ⁴⁹ Mesho ange akalila mithothzi chakujeneka kukuma, chakujeneka kuhwima, ⁵⁰ kweta nomu Yehoba wa mwilu akakenga hathi na kumona. ⁵¹ Mesho ange akanenetha buthiwa ku mwonyo wange ha mulonga wa bambanda boshe ba munganda yange. ⁵² Bananjishakethzeka ngwe kathzila kuli baje bapwile bakang'ole bange; banjitondele chakujeneka chitela. ⁵³ Banabatwila mwonyo wange mu bwina, cho banombila bimanya hali yange, ⁵⁴ cho banenethele mema kushulilila, nakufwika mutwe wange. Njendekele ngwange, 'Bananjitundithako![ ⁵⁵ Njathanene halithzina lyobe, Yehoba, kutundilila kukuloba cha bwina. ⁵⁶ Wathzibile lijwi yange omwo njendekele ngwange, 'Kethi ushoke litwi lyobe kukulilila bukwathi bwobe.' ⁵⁷ Wethzile kuyehi halitangwa njakuthanene; wendekele ngwobe, 'Kethi uthzibe lyoba.' ⁵⁸ Shukulu walwilile ng'anda ya mwonyo wange, wobwele mwonyo wange! ⁵⁹ Yehoba, unamono kubihitha chibanapanga kuli yange; yula ng'anda yange. ⁶⁰ Unamono kwilwithila chabo choshe, kuyongola chabo choshe hali yange. ⁶¹ Unathzibi matuka abo, Yehoba, na biyongola byabo byoshe hali yange. ⁶² Tunwa na kwendeka cha bakang'ole bange bikaija kuli yange ha litangwa lyoshe. ⁶³ Kenga omwo bakatumbama cho bakatuka; bakanjishendumwina mu myatho yabo. ⁶⁴ Belwithile obyo binabapande, Yehoba, kwetheka na bilinga bya maboko abo. ⁶⁵ Ukanenetha bimbunge byabo kwonowa shwamwa! Echela kuhitha chobe chipwe hali bakebo! ⁶⁶ Ukabasheke mu matoto nakubanyongetha kwithi ya melu, Yehoba!'