¹ Shukulu nafwiki mwana wa mumbanda wa Ziyoni mwithi ya lishelwa lya kutenuka chendi.Nombila bubwa bwa Isalela hathi kutunda kwilu. Kanukile butumamo bwa myanja yendi halitangwa lya kutenuka chendi. ² Shukulu nabimini cho kapwile na ngothzi ha binganda byoshe bya Yakobo. Mumatangwa a kutenuka chendi nawitha binganda bya bimpaka bya mwana wa mumbanda wa Yunda; mukujeneka bulemu nawitha hathi bumwene na baka kubayula. ³ Na kutenuka chakuthzibitha lyoba nabatulako mbinga yoshe ya Isalela. Natundithako liboko lyendi lya chilyo ku mesho abitothzi. Nenyeka Yakobo ngwe tuya twa manungu tuje tukanyongetha byuma byoshe binaithzenguluka. ⁴ Nakoko manana endi kuli yetu ngwe chitothzi, nate liboko lyendi lya chilyo ngwe muka kulwa nendi. Nathsiyanga boshe baje bapwile bakujoletha kuli likeye mu tende ya mwana wa mumbanda wa Ziyoni; netila mathingo endi ngwe tuya. ⁵ Shukulu naija na kupwa ngwe chitothzi. Namini Isalela. Namini binganda byendi byoshe. Nanyongetha muje mwatakamena. Natumitha kulila na kwendeka mukati ka mwana wa mumbanda wa Yunda. Napanga bya bukenya ku tabanakele yendi ngwe lihya. ⁶ Nanyongetha mwela wa kukungulukila kwakubwa. Yehoba nanenetha byoshe mwa kukungulukila na Sabata kupwa byakwibala mu Ziyoni, mwafwa nashaula boshe mwene na kapilisitu kwitila mu chifwa cha butenu. ⁷ Shukulu nabyana mutula wendi nakwechela mwakuthzila mwendi. Nana kweka bimbongo bya binganda byendi mu maboko a bitothzi. Banajundula kutambeka mu njubo ya Yehoba, ngwe ha litangwa lya chilika chibanangula. ⁸ Yehoba wathinganyekele kunyongetha mbango ya nganda ya mwana wa mumbanda wa Ziyoni. Nathungametha theteko ya kupima cho kabyanethele liboko lyendi kutunda kukubujula mbango. Nanenetha mikingo na bimbango kwendeka; byoshe byabihilile hamo. ⁹ Bikolo byendi binathziminina mumabu; nathsiyi na kupokola bipamba bya chikolo chendi. Mwene wendi na muna mwene bali mukati ka mafuti, lishiko kulyethiko cho tupolofita bendi kubawanene chimwetho kutunda kuli Yehoba. ¹⁰ Bakulunu ba muna Ziyoni wa munakathzi bakatumbama hathi mu kwoloka kulu. Banombila likungu ha mitwe yabo na kulinyunga babenya na buthzalo bwa mashaka. Bambanda ba Yelusalema banakotametha mitwe yabo hathi. ¹¹ Kutunda ku mithothzi yabo mesho ange anonowa; lifu lyange linabwelwoka; bilyo byange bya mukati bana bitila hathi ha mulonga wa kubihitha cha mwana wa banu bange wa munakathzi; banike na tukeke bakalethzumukila mu ma tapalo a nganda. ¹² Bakendeka kuli bainabo ngwabo, "Mbuto na binyu bili kuli?" omwo balethzumuka ngwe munalume ibanabulumuna mu matapalo a nganda, myonyo yabo banaitila ha binulo byaba inabo. ¹³ Bikajo binjikalumbumuna? Njatha kukupwitha ngwe bika, muna Yelusalema wa munakathzi? Njatha kukufwitha kuka, mangana njikuthzembeleke, mumbanda muna Ziyoni wa munakathzi? Mbandu yobe inapu yakama ngwe kalunga ndonga. Iya atha kukukangula? ¹⁴ Tupolofita bobe banakumwena bimwetho bya makuli na kujeneka kufwila. Kubasholwele mathzilo obe mangana belwithe bundungo bwobe, oloni ha mulonga wobe banene kwendeka chije chinapu chamakuli na kuthzimbaletha ¹⁵ Baje boshe baketi mu tapalo baka kandelela maboko abo hali yobe. Bakembi milothzi na kuninganga mitwe yabo hali muna Yelusalema wa munakathzi na kwendeka ngwabo, "Nkuma ei ikeko nganda bathanene 'Kukupuka cha Bubwa,' 'Njolela ya boshe ba Hathi ndi?" ¹⁶ Bitothzi bobe boshe bakashokolola tunwa twabo kuli yobe. Bakangenjunga na kushumanga mayo abo mubutenu na kwendeka ngwabo, 'Tunamumini! Eli linapu litangwa tunakala na kubandamena! Tunayoyo na kubandamena kulimona!' ¹⁷ Yehoba napanga ebi athinganyekele kupanga. Njashulitha majwi endi, awa akambeyeye mu matangwa aneti. Nakuhyana chakujeneka ngothzi, mwafwa natabetha chitothzi kujolela hali yobe; najundula helu mbinga ya chitothzi chobe. ¹⁸ Bimbunge byabo byalililile kuli Shukulu, bimbango bya muna Ziyoni wa munakathzi! Lingitha mithothzi yobe ite ngwe ndonga mutanya na buthsiki. Kethi ulyane kuhwima, na mesho obe kethi ahwime. ¹⁹ Imana, ulile mu uthsiki, kukushangumuka kwa buthsiki tona! Itila mbunge yobe ngwe mema ku mesho a Shukulu. Jundula maboko obe helu kuli lyakeye ha mulonga wa myonyo ya bana bobe aba bakalethzumuka na njala ha mankano a bitapalo byoshe." ²⁰ Kenga, Yehoba, nakwambata baje baunapangela mungilei. Banakathzi bapande kulya bushuka bwa memo abo nkuma, bana aba bananyungu ndi? Tupilisitu na tupolofita bapande kubathsiyangela muje mwakuthzila mwa Shukulu ndi? ²¹ Boshe banike na bakulunu bakalala mu likungu lyamu tapalo. Bambanda bange na bakwenje banawila ku mukwale; unabathsiyanga mu litangwa lya matoto obe chakwilika kupwa na ngothzi hali bakebo. ²² Unabathana, ngwe omu uthana banu ku litangwa lya chilika, bakakunjiyandetha bange kumitambela yoshe, ha litangwa lya matoto a Yehoba naumo wahi atewele nameme kwoboka; baje banjikanyungu na kukoletha, chitothzi change nabanyongetha.