¹ Isuleni ifibi fyenu, Lebanoni, achi limbi umulilo kochi aaokya ifichi fyobe ifya Sida! ² Lileni mwefichi fya Sipulasi, pantu ifichi fya Sida fyapona! filya ifya weme ikyakuchi bafifya! Lila, webo wekichi kya Oko kyaku Bashani, pantu impanga iya ne fichi ifyashikakene bwino fyapona. ³ Kuli shiwi lyabembeshi Bakolila pantu ubuleme bwabo babonaula! Kulya kuli ishiwi umundundu wankalamu'' Ikobuluma, pantu ukuwama kwanika ya Yodono kwaonika! ⁴ Ifi efyalabila ba Yawe ba Lesa wangi, ''kochi mwembeshi, komona ibumba lyamiko ilyo batula kumbali mukwipaya! ⁵ (balya abashita bo balabepaya bo kabili tabamona ukushininwa, kabili balya ababashichisha bo balalabila, ba Yawe nga bashukwe! nemo naba njimunoshi! pakupyunga kwabembeshi pebumba lya mikoko abenetabakwete nkumbu pali bo). ⁶ Nemo nshakafwalile ukuba ne nkumbu pali baba abekela muli kiki kyalo. Ifi ba Yawe efyo bapwisha mwamona! Nemo bushinwa bwangi nji ne kufumako ku muntu onse kabili takuli nangu umo muli bo uyo nemo nkapokolola mumaboko abena mupalamano kabili nangu mu maboko amfumu yakwe, kabili bakonaula ikyalo kabili takuli nangu umo muli bo nemo uyu nkapokolola ukufuma mukuboko kwakwe.'' ⁷ Pano nemo naba nji mwembeshi wetanga ili netwishibilo twakwipaiwa kubalya balolesha pa mbelele. Nalimishe bafilolo babili,' umo kilolo nali mwichile achi ''Inkumbu'' kabili umbi nali mwichile achi ''Ukulikwata pamo.'' muli iiyi nshila nemo nalyembelele itanga ⁸ mumwenshi umo kañgonaula abembeshi batatu. Nshabele nenkumbu palibo yowo, kabili balimpale nemo. ⁹ Elyo nalabile kubene, nemo nshakabombe kochi mwembeshi kuli mwebo nekuyakuntashi. Imbelele shilya ishikofwa - shilekeni shilefwa, imbelele shilya ishaonaulwa - shilekeni shonaike. Lekeni imbelele ishashala ibyo ilye iminefu ya mupalamino waiko.'' ¹⁰ Nali mishe kilolo wangi ''Inkumbu" kabili ne kuipundula achi mokaule ukulanyañgana kulya nemo nabikile pabantu bonse ¹¹ Muli bulya bushiku ukulyañgana kwalimokokele kabili bonse balya alukwangalila umona imbelele kabili balukumona nemo nekwishiba achi ba Yawe ebalabila. ¹² Nelilabile kulibo, ''umfwa kyamoneka bwino kuli mwebo, mumpele amalipilo angi pano umfwa yowo ''pano bali pimine amalipilo angi - ifipimo amakumi atatu aafipimfwa fya Silubeli. ¹³ Pano ba Yawe kabalabila kuli nemo, ''pana Silubeli kuba sunga, nemutengo uuweme uyo benga kupimako webo!'' kabili nalimishe amakumi atatu aafipimfwa fya Silubeli nekufibika kuusunga muñanda yaba Yawe. ¹⁴ Kabili nali pandwile kilolo wangi wabubili, ''ushina lya ukukwantankana pamo,'' ukwabanya lya ubwanankashi pakachi kakwe Yuda nabena Ishileli. ¹⁵ Ba Yawe balabila kuli nemo, ''Nalimbi, bula ifi bombesho fya mwembeshi uwakutumpa fibe fyobe, ¹⁶ umone, nemonji nokubikamo umwembeshi mukyalo takasakamane kumbelele ishilukufwa. Yetakalukuya iliafwaya imbelele ishilubile, nangu ukushishibuka shilya ishiko sunta. Ye takashilishe imbelele shilya ishiweme. pano akalya iminefuya shipamfi imbelele ye akatabula amabondo ashiko. ¹⁷ Ishamo pamwembeshi walukukoso uyo uuleka itanga! Umupanga wangi abe pakuboko kwakwe napalinso lyakwe ilya kulwine! ukuboko kwakwe nga kume ne linso lyakwe ilya kulwine nga libule ukumona!''