¹ Lomba imfula ukufuma kuli ba Yawe mumpindi yakantupuntupu - ka mainsa ba Yawe abapanga ifilulumo - kabili abapela imfula yamindondo kuli onse nefilimwa mubulimi. ² Lomba utulubi twamuñanda talalabila ifibipile; ukupokololwa kwa fichi bufi; balalabila ifiloto ifyakubongola kabili nekupela umutende umutamuli nangu kimo, lomba balasusuta kwachi nimbelele kabili ne kukyula pakuchi takuli umukemi. ³ Ubukali bwangi bulapya pali abakemi; nimbushi ishalalume - ishakutangilila - isho nkapanika. Ba Yawe aba katangilila nabo bakasangwako kwikinka lyabo, inñada yakwa Yuda, kabili nekubanga kwachi nombongolo shakwe mu nkondo! ⁴ Ukufuma ku Yuda kukafuma ibwe lyapakwaluka; kufuma kuliye kukesa ulupopo lwentete; ukufuma kuliye kukesa umuwi wa nkondo ; ukufuma kuliye kukesa uwakuteka pamo. ⁵ Bakaba kwachi fita ifyanyantaula abalwani babo mumatipa amumisebo mu nkondo; bakapanga inkondo, pakuchi ba Yawe bali nabo, kabili bakalengesha insoni abo abensha imbongolo sha nkondo. ⁶ Nkakosha iñanda yakwa Yuda kabili nekupokolola iñanda yakwa Yosefi, nekubabwesha kabili bekubakitila inkumbu. ⁷ Lomba Efulemi akaba kwachi kita, kabili imichima yabo ikasangalala kwachi nemwangashi; abana babo bakamona nekusangalala. Imichima yabo ikasangalala muli nemo! ⁸ Nkalisha mpito kulibo nekubabunganya, nkabapokolola, kabili bakaba abakulu ngefyo bali akale! ⁹ Nalibabyele mubantu, lomba bakanunka nemo mufyalo ifili apatali, lomba bo nebana babo bakaba nebumi neku bwela. ¹⁰ Pantu nkababwesha ukufuma ku kyalo kya Ijipiti nekubabunganya ufuma ku Sirya. kababwesha ku kyalo kya ku Gilidi kabili naku Lebanoni ukufika nempindi takwakashalepo impusha yabo. ¹¹ Nkapita mwishiba ilikulu ilyakutitikishawa kwaba; nkapuma amabimbi yalulya kishiba kabili nkomya ubutali bonse bwa Nailo. Ukulyumfwa kwakwa Asirya nkakubwesha panshi, kabili ne nkoto yakwa Ijipiti ikaya ukufuma kubena Ijipiti. ¹² Nkabakosha nemwine muli nemo, kabili ba kenda mwishina lyangi - iki neba Yawe balabila''