¹ Penka abantu ne bakashi babo baliminye ukulila ukukulu kubalongo babo abena Yunda. ² Pakuti kwali abambi abalabile, "Fwebo ne bana besu abalalume ne bana kashi twafula. Kashi lekene tupoke akalyo kaseke pakuti tulye kabili tube nebumi." ³ Kwali kabili bambi abalabile, "Tukopela amabala esu, amabala afisepo, ne manganda esu pakuti tupokeko ifyakulya fya seke mupindi ya kapungila. ⁴ Bambi nabo balilabile, "Twakongola indalama yakupela umusoko wa mfumu pa mbala esu kabili ne mabala afisepo esu. ⁵ Sombi pano inkanda ne mulopa wesu fili lukoso pamo ne balongo besu abalalume, kabili ne bana besu bali lukoso pamo ne bana babo. Twa patikishiwa ukushitisha abana besu abalalume ne banakashi ukuba abasha. Bambi abana besu abanakashi bali mwenka mu busha. Lomba takilipo munkosa shesu ukukyafwa pamulandu wakwebati abalalume bambi pano babane mabala esu ne mabala afisepo esu. ⁶ Nalifitilwe makosa ilinaufwile ukwimya kwa kulila kwa mashiwi kabili ne fyebo fyabo. ⁷ Penka nalilangulukile pali fifi, kabili ne kulomba ukwakuti kuli finemanga ne filolo. Nalilabile kulibo,"Mwebo mukolundako kuku katasha, kila umo ku mulongo wakwe umwalalume."Nalitekeshe mbungano nabo ⁸ ne kulabila kulibo, "Kuli fwebo, twakita, kukonka ne kosa shesu, twali bashitile libili abalongo besu abalalume kufuma mubusha benka abashitishiwe kufyalo, sombi mwebo mukoshitisha balongo benu abalalume ati bakashi tishiwe kuli fwebo libili!"Balikele kelele nekumonapo nekyebo kyakulabila yoo. ⁹ Nalimbi nalilabile, "Ifyomu kokita tafili bwino yobo. Kani mwebo tamwikalandapo mukatina ka ba Lesa wesu pakuti atukingilila kukusekwa ku balwani besu aba mufyalo? ¹⁰ Nemo ne balongo bangi abalalume na bakalume bangi tukoba kongwesha indalama ne kalyo kaseke. Lomba tulilingile ukuleka ukubalundilako kufiba kongola. ¹¹ babweshesheni lyenka lelo lino amabala abo, amabala afisepo, amabala a fichi fya mafuta, kabili ne mananda abo kabili ne nsubo mwalundileko ku ndalama, akalyo ka seke, ifisunga fya bukumo, kabili ne mafuta ayo mwafinineko." ¹² Penka balilabile, "Tukababweshesha ifyotwapokele kulibo, kabili tatwa kalombepo ikili kyonse kulibo. Tukakita ifyomwalabila. Penka nalitile abapapatilishi, ne ku balenga ukulapa ukukita koti nifyo balaile. ¹³ Nali nkutile ikyakufwala kyangi ne kulabila, "Koti nifi ba lesa ngabankute inganda ne fyuma fya mwalalume onse uushikosunga ukulayana kwakwe. Kanshi nga ankulwe ne kushala amabokoboko lukoso." Kabili ne mbungano yonse yalilabile, "Ameni,"Kabili balitotele ba Yawe kabili ne bantu bonse balikitile ifyo balaile. ¹⁴ Kanshi ukufuma papindi apa bansontele ukuba kateka wa kyalo kya Yunda, kufuma mu mwaka wabumakumi abili kufika lukoso na mu mwaka wabu makumi atatu ne myaka ibili yabufumu bwakwa mfumu Alitaselisesi, imyaka ikumi limo ne myaka ibili, nangu ninemo nangu abalongo bangi abalalume tatwalilepo akalyo akapelwa kuli kateka. ¹⁵ Lomba bakateka abalipo nishi nemo shingekalapo balibikile ukukatasha ukukulu pa bantu, ne kupoka kulibo amashekeli a siluva amakumi ane afyakulya fyabo fyapabushiku kabili ne fisunga. Na bakalume babo lukoso nabo bali bukapa bantu. Sombi nemo shakitilepo koti nififyo pamulandu wakutina ba Lesa. ¹⁶ Kabili nalikonkenyepo ukwibaka ikibumba kyelinga, kabili tatwashitilepo umushili yoo, kabili bakalume bangi bonse balikolonganine kulya ku kinto. ¹⁷ Kwitebulu lyangi kwali abena Yunda ne filolo, abalalume,150 kubikapo nabalya abaishile kuli fwebo kufuma mu fyalo ifyatushingulwike. ¹⁸ Pano ifya pekenye ifyakulya kila bushiku ni ngombe, impanga isanu na umo iya salululwa, kabili ne toni, kabili na kila bushiku bwe kumi, ifisunga fyamisango ne misango yonse fifwile fyasangwa, sombi pali fifi shafwailepo akalyo kakwa kateka yobo, pamulandu wakwebati ikinto yalikulile pa bantu. ¹⁹ Ndangulukeni, mwe ba Lesa wangi, pafisuma, pamulandu wafyonse nakita pabano abantu.