¹ Pano umfweni ifyalabila ba Yawe ati, ''Imeni nokulondolola imilandu shenu ku mpili; utupili utunini tumfwe ishiwi lyenu. ² Kuchikeni ku mafunde aba Yawe, mwebo mwe mpili, kabili namwebo mwefitende kesho fya kyalo ifya nshiku shonse. pantu ba Yawe balikwete amafunde na bantu babo, kabili bakabalwila abena Ishileli mu kilye.'' ³ ''Mwe bantu bangi, nisa kintu namikita? Naminasha shani? Ndandolweleni! ⁴ Pakuti nemo nalimifumishe mu kyalo kya Ijipiti nokumipokolola ukufuma mu kyalo kya busha. Nalitumine Mose, Aloni, na milyamu kuli mwebo. ⁵ Mwe bantu bangi, anukenimo ifyo imfumu balaki iya ku Moabu alangulukile ukumikita, kabili nefyo Balamu umwana wakwa Beola amwasukile ili mwaleenda ukufuma ku shitimu ukuya ku Giligala, kanshi mufwilefye ukwishiba imilimo iyololokele iya ba Yawe.'' ⁶ Mba nikindo nakutwala kuli ba Yawe, ili ndefukama panshi kuli ba Lesa abali mwiulu? Kuti naisa kulibo ne milambu isha kokya, notwana twa ñombe utwa mwaka umo? ⁷ Bushe ba Yawe kuti basekelamo mu makana na makana aa mbelele ishilume, nangu mu manika amakana ikumi aa mafuta? Bushe mpane umwana wangi umuneli pa mulandu wa bubi bwangi, ikisepo kya mubili wangi pakulufyanya ukwa mweo wangi? ⁸ Bakubula webo, we muntu, ikiweme, kabili nefyo ba Yawe balefwaya ukufuma kuli webo: ulekita ifyololokele, ukutemwa inkumbu, nokwenda uulikefeshe na ba Lesa obe. ⁹ Ishiwi lya ba Yawe lilebilikisha ku mushi - naluluno lwenka amano alachina ishina lyenu: ''kuchikeni ku kamama, nakuli ulya uukakwete. ¹⁰ Muli ubunonshi mu mañanda ababipile ubutabuweme, kabili ne fyabunya ifipimo fyabo ifya bufi. ¹¹ Kuchi namubika shani umuntu ukuba uwakubula umulandu uyo uubomfya ifyakupiminamo ifi tafili bwino, ne kyola umuli ifipimo ifyabufi? ¹² Abantu abanonshi bali nolubuli, abekala mishi balalabila ifya bufi, kabili ne ndimi mu tunwa twabo shibipile. ¹³ Kanshi nemo nkamilwalika mwebo, nokumiponya panshi, no kumyonauna pa mulandu wa bubi bwenu. ¹⁴ Mukalya pano tamwakekute; insala ikashalilila mukachi kamapafu enu. Mukatula ifintu pano tamwakabe nafyo, kabili ifi mukaba nafyo nkafipana ku balwani benu. ¹⁵ Mukabyala lomba tamwakasombole; mukafina ama Olifi lomba tamwakalisubepo amafuta aakafumako; mukafina ifisepo lomba tamwa kanwepo ifikafumako. ¹⁶ Imishilo shonse ishapangilwe na Omili mwashisunga, kabili pamo lukoso ne milimo shonse isha ba mu ñanda yakwa Ahabu. Mulendela mwenka mumano abo. kanshi nkakupanga webo, we mushi, ukuba uwalukoso, kabili na mwebo mwe bantu mukaba kyakukankamika abantu, kabili mukaba abakutumpikwa ku bantu.''