¹ Munshiku shakwa Yehoyakimu, Nebukadineza imfumu yamu Babiloni yalilukukile aba Yuda ; Yehoyakimu alibele musha wakwe pamyaka itatu. Penka Yehoyakimu alyalulukile ne kumufutachile Nebukadineza. ² Ba Yawe balitumine kuli Yehoyakimu ababumba abena Kalodiya, Alami, Moabi, na bena Amoni; bali batumine mukulwisha aba Yuda ne kumonaula. Kino kyali mwenka umwailile ne shiwi lyaba Yawe ilyo ilyalabilwe ukupichila mu basha ba bo abakushimika. ³ Ikine kyali ku kanwa kaba Yawe ati kino kibe paba Yuda, mukubafumya kumenso abo, pakuti pa bubi bwa kwa Manase, fyonse ifyo akichile, ⁴ kabili napa kuti pamulopa wabantu aba kubulo umulandu uyo aichile, pakuti aliswishe Yelusalemi no mulopa wabantu abakubulo mulandu. Ba Yawe ta bafwaile ukumfwa kuli kyo. ⁵ Kochi ni pafintu fimbi ifyapali Yehoyakimu, na fyonse ifyo akichile, bushe tafilembelwe mwi buku ilya fintu ifyakichikilwe mu mafumu aba Yuda? ⁶ Yehoyakimu alileele ne bashakulu bakwe, kabili Yehoyachini umwana wakwe alibeele ni mfumu mukifulo kyakwe. ⁷ Imfumu yamu Ijipiti tayabalukukilepo libili aba mukyalo kyakwe, pakuti imfumu yamu Babiloni yali kimfishe ifyalo fyonse ifyalukutangililwa ne mfumu yamu Ijipiti, ukufuma kukanika kanini kamu Ijipiti ukufika kunika ya Yufuleti. ⁸ Yehoyachini ali ne myaka iyakufyalwa 18 ulo atendekele ukuba nimfumu ; alikele mubufumu mu Yelusalemi imyenshi itatu. Ishina lyakwa inakwe ali ni Nehushita; ali mwana umwanakashi uwakwa Elinatani uwa ku Yelusalemi. ⁹ Alukukita ifibipile ku menso aba Yawe ; alukukita fyonse ifyo ba wishi balukukita. ¹⁰ Pali ilya mpindi abashilikale bakwa Nebukadineza imfumu yamu Babiloni balilukukile Yelusalemi ne kumushinguluka umushi. ¹¹ Nebukadineza imfumu yamu Babiloni yalishile mumushi ulo abashilikale bakwe balukumushinguluka umushi, ¹² kabili Yehoyachini imfumu yamu Yuda yalifuminemo no kuya ku mfumu ya mu Babiloni, ena bainakwe, abasha bakwe, ne finemanga fyakwe ne filolo fyakwe. Imfumu yamu Babiloni yali mwikeete mu mwaaka uwabu 8 uwa bufumu bwakwe umwine. ¹³ Nebukadineza alifumishemo mulya ifintu fyonse ifikindemi munanda ya ba Yawe, nafi fyo ifyali mu kipango kya mfumu. Aliputawile tunini tunini fyonse ifyapangilwe kuli golide ifyo Solomoni imfumu yaba Ishileli yapangile mwi tempeli lyaba Yawe, kochi nifyo ba Yawe balabile ati fikakichikwa. ¹⁴ Ali batweele mu busha bonse aba mu Yelusalemi, intangishi shonse, na bonse abalalume abakulwisha 10,000 bakaili, na bonse abalalume aba panga ifya kupangapanga kabili ne babunda ifyela. Tapalipo uyo bashile kanafye abantu a bayanji sana mu kyalo. ¹⁵ Nebukadineza alimutwele Yehoyachini mu busha mu Babiloni, pamofye nabaina lya mfumu, abakashi, ifilolo, kabili na bafinemanga fya mu kyalo. Ali batweele mu busha uku bafumya mu Yelusalemi ukubatwala mu Babiloni. ¹⁶ Bonse abalalume abalwa 7, 000 pakubapenda, kabili ne bapanga ifyakupanga 1,000 pakubapenda ne ba bunda ifya kubunda ne fyela, bonse abafikiilemo mukulwa- imfumu yamu Babiloni yalibaletele bano abantu mu bisha ku Babiloni. ¹⁷ Imfumu yamu Babiloni yalilengele Mataniya, abana bankashi naa ba wishi Yehoyachini, ukuba ni mfumu mukifulo kyakwe, kabili yalikingishe ishina lyakwe ati Zedekiya. ¹⁸ Zedekiya ali ne myaka iyakufyalwa 21 ulo atendekele ukuba ni mfumu ; alikeele mubufumu imyaka 11 mu Yelusalemi. Ishina lyakwa inakwe ali ni Hamutali; ali mwana umwanakashi uwa kwa Yelemiya uwaku Libina. ¹⁹ Alukukita ifibipile pamenso aba Yawe; alukukita fyonse ifyo Yehoyakimu alukukukita. ²⁰ Ukupichila mu bukali bwaba Yawe, fino fintu fyonse fyalikichikilwe mu Yelusalemi namu Yuda, ukufika na mpindi yabafumishe ku menso abo. Penka Zedekiya aliyalukilemo imfumu yamu Babiloni.