¹ Kanshi imfumu yalitumine abaluwe aba konkenye pamo kuli ena bonse abakulu aba mu Yuda naa mu Yelusalemi. ² Penka imfumu yaliile kunanda yaba Yawe,kabili na bonse aba mu Yuda na bonse abekala mu Yelusalemi pamo nayo, ne bapapatilishi, abakushimika, na bonse abantu, ukufuma ku munini ukufika a kumukulu. Penka kabili yalitangile mukulyu mfwina abene amashiwi onse aa mwi buku lyaku layana ilyo ilya sangilwe munanda ya ba Yawe. ³ Imfumu yalimakene kubwipi ne paanda ne kulayana pamenso aba Yawe, mukwenda ukulukukonka ba Yawe ne kulukusunga imikambisho yabo, ne mkulaya kwabo, ne malamuna abo, ne muchima wakwe onse ne mweo wakwe onse, mukufikita ifyebo fyakunu kulayana ukwalembelwe muli li buku. Kanshi abantu bonso balisumine ukwimakana kukulayana. ⁴ Imfumu yalikambishe Hilikiya umupapatilishi umukulu, abapapatilishi abali munshi yakwe ne ba kusunga kumulyango ukufumya mwi tempeli lyaba Yawe ifiliilo fyonse ifyo bapangile Baali na Asheli, kabili ne fyatubanga banga tonse utwa mwiulu . Yali fyokele posonde ya Yelusalemi mu malimi amu a mwilungu lya Kidiloni ne kupinta ubutoi bwabo ku Beteli. ⁵ Ali bafumishepo aba papatilishi ba tulubi abo amafumu aba Yuda asalile ukulu kokya ifinunkile bwino pankende sha peulu mu mishi yamu Yuda kabili na munkende isha mu shingulukile Yelusalemi- abo abalukukokya ifinunkile bwino kuli Baali, ku kasuba ne mwenshi, kufya mwiulu, kabili nakutubanga banga utwa mwiulu. ⁶ Yalifumishepo akalubi ka Asheli mwi tempeli lya ba Yawe, posonde mya Yelusalemi ukufika kwilungu lya Kidiloni ne kukyokela kulya. Ali kisansa wile ukubafye lukuungu ne kuluposa lulya lukungu pa filende fya bantu fye. ⁷ Ali kundawile amananda aba lukukita ubukeende abali mwi tempeli lyaba Yawe, umo abanakashi balukupikula ifyakumukobaika Asheli. ⁸ Yosiya alifumishepo bonse abapapatilishi mu mishi yamu Yuda ne kushilulula inkende sha peulu apo abapapatilishi balukookela ifinunkile bwino, ukufuma ku Geba ukufika ku Belisheba. Alyonawile inkende shapeulu pa milyango iyali apakwingilila pa mulyango wa Yoswa ( uwakusunga umushi) , kulubali lwa kipiko ulwa mulyango wa mushi. ⁹ Nangu nifyo abapapatilishi aba pa nkeende sha peulu tababa suminishepo ukubombela ku kyonto kyaba Yawe mu Yelusalemi, balukulya umukate wakubula umusunga mukachi kabalongo babo. ¹⁰ Yosiya alishilulwile Tofiti, uuli mwilungu lya Beni Hinomi, ukwebati nangu umo engalengela umwana wakwe umwalalume nangu umwanakashi ukupita mumulilo ngee lambu kuli Moleki. ¹¹ Alifumishepo bakafwalo abo amafumu amu Yuda apeene ku kasuba . Balukwikala mu nkende yakwa kwingila kwi tempeli lya ba Yawe, kubwipi na ku nanda yakwa Natani - Meleki, ntungu wa mfumu. Yosiya alyokele ingolofwano sha kasuba. ¹² Yosiya imfumu yalyonawile ifyonto ifyali pamutenge wananda ya peulu iyakwa Ahazi, isho amafumu aba Yuda bapangile, kabili ne fyonto ifyo Manase apangile mu mufipango fibili ifya mwi tempeli lyaba Yawe. Yosiya alifitabawile tunini tunini ne kufoposa mwilungu lya Kidiloni. ¹³ Imfumu yalyonawile inkeende sha peulu isha ku mutulesuba wa Yelusalemi, kukabeta kakubulenge akalupili lwa mafisakanwa ulo Solomoni imfumu yaba Ishileli amusompele Ashitoleti, akalubi ka bunya aka bena Sidoni ; akakwa Chemosi, akalubi ka bunya aka bena Moabi; ne kakwa Moleki, akalubi ka bunya aka bantu abena Amoni. ¹⁴ Ali mokawile amapanda amabwe tunini tunini ne kutema panshi utulubi lwa Asheli kabili aliswishemo muli sho nkeende ne mafupa abantu. ¹⁵ Kabili Yosiya alipwililikishe ukonaula ikyoonto ikyo ikyali ku Beteli ne nkeende ya peulu iyo Yelobomi umwana wa kwa Nebati (uyo uwalengeshe aba Ishileli ukubifya ) a sompele. Kabili alyokele kilya kyonto ne pankeende ya peulu ne ku kipumaula ukubafye lukungu. Kabili alyokele ikilubi kya Asheli. ¹⁶ Ulo Yosiya alukukenkenta inkende, alimwene ifilende ifyali kulubali lwa lupili. Alitumine abantu ukuya mukufumya amafupa mufilende; penka ali okele amafupa pa kyonto, mukukishilulula. Kino kyalilile mwishiwi lyaba Yawe ilyo umuntu waba Yawe alabile, umuntu uwalabilile limo palifi fintu. ¹⁷ Penka alilabile ati , "Nga kilya ikya kwanukilako namona nikindo ? " Abantu bamu mushi balimubulile ena ati, " Kilya kilende ikya muntu waba Lesa uwafumine kuba Yuda ne kulabila pafintu ifyo mwebo mwakita pakyonto kya ku Beteli. " ¹⁸ Kanshi Yosiya alilabile ati, " Kilekeni bushimwa bwakyo. Tapali nangu umo uwenga fumyako amafupa akwe. " Kanshi bali alekele amafupa akwe, pamofye ne mafupa aa wakushimika uwafumine mu Samaliya. ¹⁹ Penka Yosiya alifumishepo amananda onse aapa nkende dha peulu aali mu mishi yamu Samaliya, ayo amafumu amu Ishileli apangile, kabili ea kolomwene ubukali bwaba Yawe. Ali kichile kuli bo fyenka ifyo akichile ku Beteli. ²⁰ Ali peeye abapapatilishi bonse aba pankende sha peulu pa fyonto kabilialyookeele amafupa abantu pali bena. Penka alibwelelemo ku Yelusalemi. ²¹ Penka imfumu yalikambishe abantu bonse, nekulabila ati, "Sungeni ikiliili kya ku pitaila kuli ba Yawe Lesa wenu, fyenka kilembelwe muli li buku lya kulayana. " ²² Ikiliilo kya kupitaila ikya fyenkefi takingabako ukufuma munshiku shabo kutotolwesha abatangilile Ishileli, nangu ni munshiku shonse isha mafumu aba Ishileli nanga aa ba Yuda. ²³ Pano mu mwaka uwabu 18 uwa kwa Yosiya imfumu ,kino ikiliilo kyakupitaila kyaba Yawe kyalisekelelwe mu Yelusalemi. ²⁴ Kabili Yosiya alibafumishepo abo abalukulabila na ba fwile nangu ne mipashi. Kabili alifumishemo ifibumbwa bumbwa, utulubi, kabili nafyonse ifya bunya ifyalukumoneka mukyalo kya Yuda na mu Yelusalemi, mjukufikisha ifyebo fya mushilo ifyalembelwe mwibuku ilyo Hilikiya umupapatilishi asangile munanda yaba Yawe. ²⁵ Apo Yosiya taanga bapo, takwalipo imfumu imbi kochi ni ena, ,uwa alukukile kuli ba Yawe ne muchima wakwe onse, ne mweo wakwe onse, kabili ne makosa akwe onse, uwakonkele imishilo yonse iya kwa Mose. Nangu kukita ifyakichilepo imfumu imbi kwachi ni Yosiya uwabukile pantanshi yakwe. ²⁶ Nangu nifyo, ba Yawe taba alulukile ukufuma kubukali bwabo ubukulu ubwa kokyanána ubo ubwaokele aba Yuda pakuti pali fyonse ifyo Manase akichile mukukolomona ubukali bwabo. ²⁷ Kanshi ba Yawe balilabile ati, "Nkabafumya libili aba Yuda ku menso angi, kochi nifyo naba fumisheko aba Ishileli, kabili nkamuposa ukutali uno mushi uyo nasalile Yelusalemi, kabili ne nanda iyo naebele ati , "Ishina lyangi likabemo. "' ²⁸ Kochi nipa fintu fimbi ifyapali Yosiya, fyonse ifyo akichile, bushe tafilembelwe mwi buku lya fintu ifya kichikilwe mu mafumu aba Yuda ? ²⁹ Munshiku shakwe, Falao Neko, imfumu ya bena Ijipiti, yalile mukuilwisha imfumu ya Asilya kunika ya Yufuleti. Imfumu Yosiya yalile mukukumana na Neko mu nkondo, kabili Neko alimwipeye Yosiya ku Megido. ³⁰ Abasha bakwa Yosiya balimupinchile kaafwile mungolofwana ukufuma ku Megido, no kumuleta ku Yelesalemi, ne kumushiika mukilende kyakwe umwine. Penka abantu bamu kyalo balibulile Yehoazi umwana wakwa Yosiya, ne kumusuba amafuta, kabili ne kumulenga ena ukuba ni mfumu mukifulo kyakwa wishi. ³¹ Yehoazi ali ne myaka yakufyalwa 23 ulo atendekele ukuba ni mfumu, kabili alikele mubufumu imyenshi itatu mu Yelusalemi. Ishina lyakwa inakwe ali ni Hamutali; ali mwana umwanakashi uwa kwa Yelemiya uwaku Libina. ³² Yehoazi alukukita ifibipile pamenso aba Yawe, kochi nifyonse ifyalukita abashakulu bakwe. ³³ Falao Neko alimukakile muminyololo ku Libila mu kyalo kya Hamati, pakwebati engabula ukuba nimfumu mu Yelusalemi. Penka Neko alibalipilishe aba Yuda amatalanta 100 aama siliva ne talanta limo ilya golide. ³⁴ Falao Neko alilengele Eliyakimu umwana wakwa Yosiya ukuba ni mfumu mukifulo kyakwa wishi Yosiya, kabili alikingishe ishina lyakwe ukuba ni Yehoyakimu. Pano alimutweele Yehoazi ku Ijipiti, kabili Yehoazi alifwile kulya. ³⁵ Yehoyakimu alipeene siliva na golide kuli Falao. Pakweba ati akumanishe ifyo bamulombele kuli Falao, Yehoyakimu ali lipilishe abamukyalo ne kupachikisha umuntu onse pabantu ba mukyalo ukumulipila siliva na golide ukulingana neno benga mweena. ³⁶ Yehoyakimu aline myaka yakufyalwa 25 ulo atendekele ukuba mfumu, kabili alikele mubufumu imyaka 11 mu Yelusalemi ishina lyakwa inakwe ali ni Zebida; ali mwana umwanakashi uwakwa Pedaya uwaku Luma. ³⁷ Yehoyakimu alukukita ifibipile kumenso aba Yawe, fyenka fyalukukita abashakulu bakwe.