¹ Yosiya ali ne myaka iya kufyalwa 8 ulo atendekele ukuba ni mfumu; alikele mubufumu imyaka 31 mu Yelusalemi. Ishina lyakwa inakwe ali ni Yedida ( ali mwana umwanakashi uwakwa Adaya uwaku Bozikati). ² Alukukita ifiweme pamenso aba Yawe. Alukwenda munshila nshonse isha kwa Davidi umushakulu wakwe, kabili ta alulukilepo nangu kululyo nangu kukipiko. ³ Ili kyafikile mu mwaka uwabu 18 uwa mfumu Yosiya, alitumine Shafani umwana wa kwa Azaliya umwana wakwa Meshulami, kalemba uwa munanda yaba Yawe, ukulabila ati, " ⁴ Kabiye kuli Hilikiya umupapatilishi umukulu ne kumweba ati abelenge indalamaisho isha baleeta munanda yaba Yawe, isho abasunga itempeli bapokele ikufuma mu bantu. ⁵ Lekeni shikapanwe mu maboko aa bamilimo abali no bukulu bwa pananda yaba Yawe, kabili lekeni bakashipane kuba milimo abali munanda yaba Yawe, pakwebati beena benga wamya umonaukile mwi tempeli. ⁶ Lekeni bakapaane indalama kuli ba kalipentala, abakusompa kabili nakuba kubaasa amabwe, kabili ne kushitamo imbawo ne kuputula amabwe aakuwamya itempeli. " ⁷ Ukupendululamo kwandalama ishalukupeelwa takwalu kufwaikwa kuli bena, pantu balukushisunga nabukishinka. ⁸ Hilikiya umupapatilishi umukulu alilabile kuli Shafani, kalemba ati, " Nasanga ibuku lya mushilo munanda yaba Yawe. " Kanshi Alilikiya alipene ibuku kuli Shaafani, kabili alilitangile. ⁹ Shafani alile ne kutwala ibuku ku mfumu, ne kubulilisha kuli bo, ne kulabila ati, "Abasha benu babomfya indalama ishasangilwe mwi tempeli kabili bashi paana mumabokoabamilimo abamona paba kusunga pananda yaba Yawe. " ¹⁰ Penka Shafani kalemba alilabile ku mfumu ati, " Hilikiya umupapatilishi ampela nemo ibuku. " Penka Shafani alilitangile kumfumu. ¹¹ Yalifikile impindi ulo imfumu ya umfwine amashiwi a mushilo, yali tabawile ifyakufwala fyayo. ¹² Imfumu yalikambishe Hilikiya umupapatilishi, Ahikami umwana wakwa Shafani, Akiboli umwana wakwa Mikaya, Shafani kalemba, na Asaya, umusha wakwe umwine, ne kulabila ati, ¹³ " Kabiye mukepushe ba Yawe pali nemo, napa bantu napali bonse aba Yuda, pakuti pa mashiwi a ilili buku ilya sangwa. Pakuti pa bukali ubukulu ubwa ba Yawe ubo bwatu bukila fwebo pantu abashakulu besu tabalukumfw ku mashiwi a mwi buku ili pakweba ati benga nakila fyonse ifyalembelwe pakuti pali fwebo. " ¹⁴ Kanshi Hilikiya umupapatilishi, Ahikimi, Aaboli, na Asaya balile kuli Hulida umupapatilishi umwanakashi, umukashi wakwa Shalumi umwana wakwa Tikiva umwana wakwa Halihasi, kasunga wa uusunga umwakusungila ifya kufwala ( alukwikala mu Yelusalemi impindi ya bubili iyi nini) , kabili balilabile na ena. ¹⁵ Alilabile kuli bena ati, "Ifi efyo ba Yawe, Lesa waba Ishileli, balabili ati : "Mubule umuntu uwakutumine webo kuli nemo ati, ¹⁶ " Ifi efyalabila ba Yawe ati, 'Moneni, nkaleta ikya kukatasha pali ino nkende kabili na kubekalamo, ukulingana na fyonse ifilembelwe mwi buku ilyo imfumu yaba Yuda ya tangile. ¹⁷ Pakuti bandengulula nemo kabili ne kokya ifinunkile bwino kuli ba Lesa bambi, pakwebati bakolomone ubukali bwangi na fyonse ifibakita ifyo bakichile - penkaubukali bwangi bukabukila pano apantu, kabili ta bakabushimwe. "' ¹⁸ Pano ku mfumu yaba Yuda iya mituma ine uyu kwipusha ubufwayo bwa ba Yawe, ifi efyo mukalabile kuli ena : " Ba Yawe Lesa waba Ishileli balabile fi ati : 'Pakuti pamashiwi mwaumfwine, ¹⁹ pakuti umuchima obe wanakila, kabili pakuti walikeefya wemwine pamenso aba Yawe, ulo mwaumfwine ifyo nalabile pali nkende na bekalamo, ukwebati bakaba masala kabili ne fingo, kabili pantu watabaula ifyakufwala fyobe ne kulila kuli webo -uku ekulabila kwaba Yawe. ²⁰ Mona, nkaleta pamo webo ne bashakulu bobe kabili mukaletwa ku filende fyenu mumutende. Amenso enu taa kamone ifyakukatasha fyonse ifyo nkaleta pali ino nkeende. """' Kanshi abantu bali bwenseshe ano amashiwi kumfumu.