¹ Manase ali ne myaka iya kufyalwa 12 ulo atendekele ukuba ni mfumu : alikele mubufumu imyaka 55 mu Yelusalemi. Ishina lyakwa inakwe ali ni Hefiziba. ² Alukukita ifibipile ku menso aba Yawe, kochi ifisela ifyabunani ifyo imitundu ya bantu abo ba Yawe bafumishemo mu bantu aba Ishileli. ³ Pakuti alisompolwele pankeende apasunntwile ifyo Hezekiya wishi aonawile, kabili alisompele ifyoonto fyakwa Baali, ne kwimika Asheli, kwachi ni Ahabi imfumu yaba Ishileli ya kichile, kabili ne kulukufukamina panshi utubangabanaga twa mwiulu ne kutulambila. ⁴ Manase alisompele ifyoonto munanda yaba Yawe, nangu ba Yawe bali kambishe ati, " Nimu Yelusalemi emu kaba ishina lyangi imyaka yonse. " ⁵ Alisompele ifyonto ifya tubangabanga tonse utwa mwiulu mu fipango fibili ifya munanda yaba Yawe. ⁶ Alileengele umwana wakwe umwalalume ukupita mu mulilo, alikukita ifya bunánga ne bwafisoko ne kulukumfwanána nababo abalukulabila nabafwile kabili nababo abalabila ne mipashi. Alikichile ububi ubwingi kumenso aba Yawe, kaalukukolomona ubukali bwabo. ⁷ Ikyakubasa ikya kwa Asheli ikyo apangile, alikibikile munanda yaba Yawe. Kyali nipali iyi nanda ba Yawe balabile kuli Davidi na Solomoni umwana wakwe; alabile ati: Kili ni muli ino nánda na mu Yelusalemi, umo nasala ukufuma mu mikoka yonse iya mu Ishileli ati, nkabikamo ishina lyangi imyaka yonse. ⁸ Nshakalengele amolu abena Ishileli ukulukwendauka ukufuma mukyalo ikyo napeene kubashakulu babo, kani bakaposeko amano mukunakila fyonse ifyo nabakambishe, ne kulu kukonka imishilo yonse iyo umusha wangi Mose abakambishe bena. " ⁹ Pano abantu tabaumfwine, na Manase ali batangilile ukulukukita ifibipile ukukila napa mikoka yabantu iyo ba Yawe ba onawile ku menso aba Ishileli. ¹⁰ Kanshi ba Yawe balilabilile mubasha boba aba abakushimika, ne kulabila ati, " ¹¹ Pantu Manase imfumu yaba Yuda akita fino ifintu ifyabunani, ne kukita ifibipishe ukukila palifyo fyonse balukukita abena Amoli abali batanshi pali ena, kabili abalengela abe na Yuda ukubifya ne tulubi twakwe, ¹² kanshi ba Yawe, Lesa waba Ishileli, balabilefi ati : Mona, nji nokuleta ifyakukatasha pali Yelusalemi na Yuda ati abo abakafyumfwa, amatwi abo onse abili ukomfwati ngeee. ¹³ Nkatanika pali Yelusalemi ulutambo ulwakupiminako ulwabomfiwe pali Samaliya, kabili ne kyakupiminako ukyabomfishiwe paba mu nanda yakwa Ahabi; Nkamushimuna Yelusaleni ubusaka, fyenka umuntu ashimuna insani, ukuishimuna ne kuifulamuna panshi. ¹⁴ Nkaposa abakashalapo aba mu buswani bwangi ne ku bapaana mu maboko abalwani babo. Bakaba bakukwatwa ne bakupukulwa ku balwani ba bo bonse, ¹⁵ Pantu bakita ifibipile ku menso angi, kabili ba bakolomona ubukali bwangi, ukufuma pakasuba ako abashakulu babo baishile ukufuma mu Ijipiti, ukufika napali leelo. " ¹⁶ Mukukishamo, Manase alichile umulopa uwingi uwa bantu abakubula imilandu, ukufika ne fyo ayiswishe Yelusalemi ukufuma kulubali lumo ukufika na kulubali lumbi ne mfwa. Fino fyali fyakulundapo pa bubi ubo alengele aa Yuda ukubifya, ulo bakichile ifibipile kumenso aba Yawe. ¹⁷ Kochi ni pa fintu fimbi ifyapali Manase, fyonse ifyo akichile, ne bubi ubo apangile, bushe tafilembelwe mei buku ilya fintu ifyakichile amafumu amu Yuda? ¹⁸ Manase alileele ne bashakulu bakwe ne kumushika mwi bala lya ba munanda yakwe umwine, mwibala lya Uzza. Amoni umwana wakwe alibele ni mfumu mukifulo kyakwe. ¹⁹ Amoni ali ne myaka iyakufyalwa 22 ulo atendekele ukuba ni mfumu; alikeele mubufumu imyaaka ibili mu Yelusalemi. Ishina lyakwa inakwe ali ni Meshulemeti; ali mwana umwanakashi uwa kwa Haluzi uwaku Yotiba. ²⁰ Alukukita ifibipile pamenso aba Yawe, fyenka fyalukukita ba wishi ba Manase. ²¹ Amoni alukukonka mu nshila shonse isho ba wishi balukwendamo ne kulambila utulubi uto bawishi balukulambila ne kulu kufukamina panshi kuli to. ²² Ali balekele ba Yawe, ba Lesa waba shakulu bakwe ne kubula ukwenda munshila yaaba Yawe. ²³ Abasha bakwa Amoni balimwalukilemo ne kuipaya imfumu munanda yakwe umwine. ²⁴ Pano abantu aba mukyalo balipeeye bonse aba yalukilemo imfumu Amoni, kabili balileengele Yosiya umwana wakwe ukuba ni mfumu mukifulo kyakwe. ²⁵ Kochi ni pali fimbi ifintu ifyapali Amoni ifyo akichile bushe tafinembelwe mwi buku ilya finytu ifyalembelwe mumafumu amu Yuda? ²⁶ Abantu balimushikile mu kabuli kakwe mwibala laykwe Uzza, kabili Yosiya umwana wakwe alibele ni mfumu mu kifulo kyakwe.