¹ Muli sho nshiku Hezakiya alilweele ukufika pakufwaya ukufwa. Kanshi Isaya umwana wakwa Amoze, uwakushimika alishile kuli ena, ne kulabila kuli ena ati, "Ba Yawe balabila ati, ' Teyanya ifya munanda yobe bwino; pakuti uleefwa webo, tawabe no bumi."' ² Penka Hezekiya alyalulwile ikilungi kyakwe ku kibumba ne kulomba kuli ba Yawe, nekulabila ati, ³ " Namupapachileni, ba Yawe, anukeni ifyo nalukwenda muli bukishinka kumenso enu muchima wangi onse, kabili nefyo nalukukita ifiweme ku menso enu. " Penka Hezekiya alilililemakosa. ⁴ Apo Isaya ta angafumamo mukipangokya pakachi, ishiwi lyaba Yawe lyalishile kuli ena, ne kulabila ati, ⁵ " Aluluka ubwele, ne kumweba Hezekiya intangishi ya bantu bangi ati , ' Ifi efyo ba Yawe, Lesa wakwa David umushakulu obe, balabila ati, ' Naumfwa ukulomba kobe, kabili namona iminsoshi yobe. Nji no kukubuka pakasuba akabutatu, kabili ukaya kunanda yaba Yawe. ⁶ Nkalundako imyaka 15 ku mweo obe, ne kukupulusha webo na uno umushi kukuboko kwa mfumu ya Asilya, kabili nkamulwila uno umushi pakuti peshina lyangi kabili na musha wangi Davidi. ""' ⁷ Kanshi Isaya alilabile ati, " Buleni ikipande kya kichi kya mukuyu. " Balikichile fyenkefyo ne ku kibika pa kipute kyakwe, kabili alibukiwe. ⁸ Hezekiya alilabile kuli Isaya ati, " Ninsa kashibilo kakabako pakweba ati ba Yawe bambuke nemo, kabili ati nkaye kwi tempeli lyaba Yawe pakasuba kabutatu? " ⁹ Isaya alyasukile ati, " Kano kakaba keshibilo kuli webo ukufuma kuli ba Yawe, ati ba Yawe bakakita inkintu ikyo balaabile. Bushe ikinshingwa ikaya kuntanshi intampulo 10, nangu kikabwela panuma intampulo 10? " ¹⁰ Hezekiya alyasukile ati, "Kili kintu ikipubile ikinshingwa ukuya kuntanshi intampulo 10. Yowo, lekeni ikinshingwa kibweele panuma intampulo 10. " ¹¹ Kanshi Isaya uwakushimika alililile kuli ba Yawe kabili balibweseshe ikinshingwa intampulo 10 kunuma, ukufuma apo kyaiile pakipimo kya kasuba kya kwa Ahazi. ¹² Pali ilya mpindi Maladuki- Baladani umwana wakwa Baladani imfumu yamu Babiloni alitumine amakalata ne kya bupe kuli Hezekiya, pakuti alyumfwine ati Hezekiya ali mulwele. ¹³ Hezekiya ali kuchikile kuli ayo makalata, ne ku langisha abaluwe ikipango kyonse nefintu fyakwe ifikindeme, siliva, golide, ifinuunka bwino ne mafuta aamutengo, ne nanda umo basungila ifya nkondo fyakwe, na fyonse ifya sangilwe mumananda akwe aakusungilamo ifintu. Tamwalipo nangu kimo munanda yakwe, nangu muli bonse ubufumu bwakwe, ikyo Hazekiya abulile ukubamwesha bene. ¹⁴ Penka Isaya uwakushimika alishile kuli Hezekiya ne kumwipusha ati, " Insa fintu ifyo aba balalume bakilabila kuli webo ? Nikwepi uko bakifuma? " Hezekiya alilabile ati, " Bakisa ukufuma ku kyalo kya kutali ikya Babiloni. " ¹⁵ Isaya alipwishe ati, " Nifindo ifyo bamona munanda yobe? " Hezekiya alyasukile ati , "Ba mona fyonse ifili munanda yangi.Tapalipo nangu kimo mufipe fyangi ifikindeme ikyo nabula ukubalangisha bena. " ¹⁶ Kanshi Isaya alilabile kuli Hezekiya ati, " Umfwa kwishi lyaba Yawe: ¹⁷ Mona, inshiku shili no kwisa ulo ifintu fyonse mukipango kyobe, ifintu ifyo abashakuli bobe bafishile ukufika napali kano kasuba kalelo, fikapintwa ku Babiloni. Tapalipo akakashala, efyalabila ba Yawe. ¹⁸ Bamo abamukifyashi kyobe abo ukaba ulwishibo baka twalwa ukufuma kuli webo, kabili bakaba niba ntuungu mu kipango kya mfumu yamu Babiloni. "' ¹⁹ Penka Hezekiya alilabile kuli Isaya ati, "Ishiwi lyaba Yawe ilyo walabila liiweeme. " Pakuti alilangulukile ati, " Kani tamwakabepo umutende ne kwikala bwino munshiku shangi? " ²⁰ Kochi ni pafintu fimbi ifya pali Hezekiya, na makosa akwe onse, kabili ne fyo apangile ikishiba ne mupompi, kabili ne fyo aletele amenshi mumushi - bushe tafilembelwe mwi buku ilya pafintu ifyalembelwe mu mafumu amu yuda. ²¹ Hezekiya alilele ne bashakulu bakwe, na Manase umwana wakwe alibele ni mfumu mukifulo kyakwe.