¹ Kaylikichikile ati mu mwaaaka uwa 9 uwa mfumu Zedekiya, mu mwenshi uwabu 10, pakasuba aka bu 10 aka mwenshi, Nebukadineza imfumu yamu Babiloni yalishile ne bashilikale bakwe mu kulwisha aba mu Yelusalemi. Ali bikile inkambi yakwe kulubali ulwa uko, kabili balisompele ikibumba ikya kuushinguluka umushi. ² Kanshi umushi baliushingulukile ukufika nakumwaka uwabu 11 uwa bufumu bwakwa Zedekiya. ³ Pakasuba aka 9 akamwenshi wa 4 uwa mwaka, ikipowe kya nsala kyalikulile mumushi ikya kwebati tamwali ifyakulya fya bantu mu kyalo. ⁴ Penka umushi walitobekele, kabili bonse abalalume abalwisha balifyukile ubushiku munshila yakumulyango pakachi kafibumba fibili, kubulima bwa mfumu, nangu abena Kalodeya bali bonse mu mushi imfumu yalile kulubali lwa bena Alaba. ⁵ Pano abashilikale abena Kalodeya balii tamfishe imfumu Zedekiya ne kuikwachila mu malungu a Nika ya Yodani ku bwipi na Yeliko. Abashilikale bakwe bonse bali palangene ukufuma kuli ena. ⁶ Bali ikwete imfumu ne kuileta ku mfumu ya bena Babiloni ku Libila, uko bamuputwilile imilandu ena. ⁷ Kochi nipa baana abalalume abakwa Zedekiya, bali beepeye bena pamenso akwe. Penka alifumisheko amenso akwe, no kumukaka ena mu minyololo ya kyela, ne kumuleta ena ku Babiloni. ⁸ Pano mu mwenshi uwa bu 5, pakasuba aka 7 aka mweenshi, uwali mwaka uwa 19 uwabufumu bwakwa Nebukadineza imfumu yamu Babiloni, Nebuzaladani, umusha wa mfumu yau Babiloni ne mukulu waba sunga imfumu, balishile ku Yelusalemi. ⁹ Alyokele inanda yaba Yawe, ikipango kya mfumu, ne mananda onse mu Yelusalemi; Kabili ne mananda onse aa kindeme aa mu mushi ali okele. ¹⁰ Pakuti pa fibumba fyonse ifyashingulukile Yelisalemi, bonse abashilikale abamu Babiloni ubalu kutangililwa ne mukulu waba kusunga imfumu bali bonawile bena. ¹¹ Pakuti pali babo abantu abshelepo mu mushi, abo abapondokele ku mfumu ya mu Babiloni, kabili na kuba shelepo mu mpendwa- Nebuzaladani, umukulu waba sunga imfumu, ali batweele bena mu busha. ¹² Pano umukulu uwabasunga imfumu alishilemo bamo abayanji abamu kyalo ukulu kubomba mumabala amifaina na malimi. ¹³ Pakuti pa mapanda aalubemba aali munda yaba Yawe, ne fyakwimikilako ne shiba lya lubemba ilyali mu nanda yaba Yawe, abena Kalodiya balifitobawile tunini tunini ne kupinta ifyalubemba ukubwesha ku Babiloni. ¹⁴ Imipiika, amafosholo, ifyakushimishako amalampi, amasupuni, na fyonse ifinko lonkolo ifyalubemba nafifyo abapapatilishi balukubomfya mwi tempeli- abena Kalodiya balififumishemo. ¹⁵ Imipiika ya kufumishamo amatoyi ne mabeseni aapangilwe nagolide, nefifyo ifyapangilwe na siliva - kapitao wabasunga imfumu alifipinchilemo nafyena. ¹⁶ Amapanda abili, ikishiba , ne fyakwimikilako ifyo Solomoni apangile ifyamu nanda yaba Yawe fyalikwete ulubemba ulwingi ukukila ifyo lwengapimwa mukulema. ¹⁷ Ukutalimpa ukwa lipanda ilitanshi ukuya peulu lyali amakyubiki 18, ne mutwi uwalubemba wali peulu yalto. Umutwi wali amakyubiki 3 ukuya peulu, ne fyakupyata ne mono fyonse fya lishingulukile umutwi, fyonse fyalipangilwe ifya lubemba. Ulupanda lumbi ne fyakupyata fyaluko fyali pamo ne lutanshi. ¹⁸ Umukulu uwabakusunga alipinchile Selaya umupapatilishi, pamo na Zefaniya, umupapatilishi wabubili, na basunga kumulyango batatu. ¹⁹ Ukufuma mu mushi alipinchile kaili uwali mukulu uwali ne nsambu pa bashilikale, na balalume 5 abali pali babo abalu kukwashako imfumu, abo abakili mumushi. Kabili alipinchile kaili umukulu wabashilikale ba mfumu uwali ne nsambu shakulemba abalalume mubushilikale, pano nabalalume abakindami 60 ukufuma mu kyalo muli babo abali mumushi. ²⁰ Penka Nebuzaladani, umukulu wa bakasunga, alibapinchile ne ku baleta ku mfumu yamu Babiloni ku Libila. ²¹ Imfumu yamu Babiloni yalibepeye ku Libila mu kyalo kya Hamati. Muli iyi nshila, Yuda alifuminemo mu mushi wakwe ne kumutwala mubusha. ²² Pakuti pali babo abantu abashele mu kyalo kya ba Yuda, abo Nebukadineza imfumu yamu Babiloni ashilepo, alibikile Gedaliya umwana wakwa Ahikami , umwana wakwa Shafani, ukuba mukulu pali bo. ²³ Pano ulo abakulu bonse ababashilikali, bo ne bantu babo, baumfwine ati imfumu yamu Babiloni yabika Gedaliya ukuba mukulu wa mushi, balile kuli Gedaliya ku Mizipa. Bano bantu bali Ishimeli umwana wakwa Nataniya, Yohanani umwana wakwa Kaleya, Selaya umwana wakwa Tanihumeti umwana Netofi, na Yaazaniya umwana wamwina Makati- bo ne bantu babo. ²⁴ Gedaliya alipinchile ukulapa kuli bo na kubantu babo, ne kulabila ku bo ati, " Mwe bachina aba bomfi ba beena Kalodiya. Ikaleni mu kyalo ne kubombela imfumu yamu Babiloni, kabili fikaba bwino kuli mwebo. " ²⁵ Pano kyalikichikilwe ati mu mwenshi uwa 7 Ishimeli umwana wakwa Netaniya umwana wakwa Elishama, ukufuma mu kifyashi kya bufumu, alishile ne balalume 10 ne kulukuka Gedeliya, Gedeliya alifwile, pamo na balalume aba mu Yuda na bena Babiloni abali nakwe ku Mizipa. ²⁶ Penka abantu bonse, ukufuma ku munini ukufika naku mukindami, kabili naku bakulu baba shilikale, balimine nekuya ku Ijipiti pantu bali no mwenso uwakuchina abena Babiloni. ²⁷ Kyalikichikilwe kuntanshi mu mwaka uwabu 37 uwa busha bwakwa Yehoyachini imfumu yaba Yuda, mu mwenshi uwabu 12, pakasuba akabu 27 akamwenshi, Aweli- Maliduki imfumu yamu Babiloni yakakwile Yehoyachini imfumu yaba Yuda ukufu,a mu kaleya. Kino kyalikichikilwe mu mwaka uyo Aweli- Maliduki atendekele ukuba ni mfumu. ²⁸ Alilabile ne nkumbu kuli ye ne kumu peela itebe ilya munkinshi ukukila pa matebe aa mafumu ambi ao ali nao mu Babiloni. ²⁹ Aweli- Maliduki alifumishe ifyaku fwala fyakwa Yehoyachini ifyabukaili, kabili Yehoyachini alukulya ifyakulya kwitebulu lya mfumu mu bumi bwakwe bonse. ³⁰ Ifyakulya ifyabanishiwe fyalukupelwa kuli ye inshiku shonse mu bumi bwakwe bonse.