¹ Pano mu mwaka uwabutatu uwakwa Hoshiya umwana wakwa Ela, imfumu yaba Ishileli, Hezekiya umwana wakwa Ahazi, imfumu ya ba Yuda alitendekele ukuba ni mfumu. ² Ali ne myaka 25 iya kufyalwa ulo atendekele ukuba nimfumu. Alikele mubufumu imyaka 29 mu Yelusalemi. Ishina lyakwa inakwe ali ni Abiya; ali mwana mwanakashi uukwa Zekaliya. ³ Alukukita ifiweme ku menso aba Yawe, ukulu kukonka ifyakumwenako fyonse ifyo Davidi, umushakulu wakwe alukukita. ⁴ Alifumishemo inkeende sha peulu, ne konaula amapanda amabwe, ne kutema panshi ikibumbwa kya Asheli. Alitobawile tuninitunini insoka ya lubemba iyo Mose apangile, pantu mulisho nshiku abantu aba Ishileli balukukya ifinunkile bwino kuli ye; kiletwa ati , " Nehushitani. " ⁵ Hezekiya aliketekele muli ba Yawe, Lesa waba Ishileli, pakweba ati ukufuma pali ena tapalipo nangu umo mukachi ka mafumu aba Yuda nangu nipa mafumu aabalilepo pali ena. ⁶ Pakuti alikwachishe kuli ba Yawe. Ta alekele ukubakonka ba Yawe pano alisungile imikambisho yabo, iyo ba Yawe bakambishe Mose. ⁷ Kanshi ba Yawe bali na Hezekiya, kabili konse uko alukuya alukushukwa. Ali yalukilemo imfumu ya Asilya ne kukana ukulibombela. ⁸ Ali balukukile aba Filisitiya ukufika ku Gaza naku mipaka iya mushingulukile, ukufuma pa kyakukenketelapo ukufika naku nkambi a mushi. ⁹ Mu mwaka uwabu 4 uwa mfumu Hezekiya, uyo uwali wa 7 kuli Hoshiya umwana wakwa Ela imfumu yaba Ishileli, Shalimaneza imfumu yamu Asilya alimine ne kumukwata Samaliya ne kumushinguluka ukumuposa mukachi. ¹⁰ Pakupwa kwa myaka itatu, balimukimfishe, mu mwaka wabo 6 uwakwa Hezekiya, uyo uwali wa 9 kuli Hoshiya imfumu yaba Ishileli; muli ino nshila umushi wa Samaliya balimukwachile. ¹¹ Kanshi imfumu yamu Asilya yalipinchile aba Ishileli ukuya nabo ku Asilya ne kubabika mu Hala, kabili na kunika iya Haboli mu Gozani, na mu mishi yamu Mediya. ¹² Alikichile fi pantu tabanakile ishiwi lyaba Yawe Lesa wabo, pano balishilulwile ifyebo fya kulayana, fyonse ifyo Mose umusha wa ba Yawe abakambishe. Balikene ukumfwa kuli ko nangu ku kikita. ¹³ Kabili mu mwaka uwabu 14 uwa mfumu Hezekiya, Senakelibu imfumu ya Asilya ali lukukile onse amakambi akosele aa mishi ya ba Yuda ne kuikwata. ¹⁴ Kanshi Hezekiya imfumu ya Yuda alitumine ishiwi ku mfumu yamu Asilya, uwali ku Lakishi, ne kulabila ati, "Na lufyanya kuli mwebo. Fumeni kuli nemo. Kyonse ikyo u kabika pali nemo nkakikita. " Imfumu yamu Asilya yalimwebele Hezekiya imfumu yaba Yuda ukupaana 300 amatalenta a siliva na matalenta 30 aa golide. ¹⁵ Kanshi Hezekiya alimupeele siliva yonse iya sangilwe munanda yaba Yawe na mufya bunonshi ifyali mu kipango kya mfumu. ¹⁶ Penka Hezekiya aliputwile golide ukufuma ku milyango ye tempeli lyaba Yawe kabili ne kufuma naku mapanda ayo alamikile ; alipeene golidde ku mfumu yamu Asilya. ¹⁷ Pano imfumu yamu Asilya, yalimishe abashilikale bakwe, ne kutuma Talitani na Labisaline ne mukulu wabo ukufuma ku Lakishi ukuya ku mfumu Hezekiya ku Yelusalemi. Balyendele mu misebo ne kusolomoka posonde ya Yelusalemi. Balifikile ku mupompi uwa kishiba kya peulu, mu nshila iyaya ku kibansa kya muntu uu washa insalu, ne kwimakana ku bwipi nakyo. ¹⁸ Ulo baichile imfumu Hezekiya, Eliyakimi umwana wakwa Hilikiya, uwali mukulu pa nanda ya mfumu, kabili na Shebina kalemba, na Yoah umwana wakwa Asafu, uulemba, alifuminepo ukuya mukuba kumanya. ¹⁹ Penka umukulu wa bashilikali kuli bo ukumweba Hezekiya ifyo imfumu iikulu, imfumu yamu Asilya alabile: "Mba ni nsulo ya kintu ya kintu ikyo uketekelemo? ²⁰ Ulalabilafye ifyebo ifya lukoso, ukulabila ati, kuli aba maano neba makosa aakulwa inkondo. Nimuli nani umo waketekela, pakwebati winga ngalukilamo nemo? ²¹ Mona waketekela mu mukombo uwa litete ilifyopakene ilya mu Ijipiti, pano inge umuntu aeyaminako, lile mulasa mukuboko kwakwe ne kupulankanamo. Ifyo efili Falao imfumu ya mu Ijipiti kuli onse uuketekele muli ena. ²² Pano nga walabila kuli nemo ati, ' Twaketekela muli ba Yawe Lesa wesu, ' bushe tali eye uyo inkende sha peulu ne fyonto ifya Hezekiya afumishemo, kabili alabila kuba Yuda na kubena Yelusalemi ati , ' Mulilingile ukulambila kuntanshi ya kino kyonto mu Yelusaleni ' ? ²³ Pano fyenkefyo, nafwaya ukukulenga webo ikya kupela ikiweme ukufuma kuli kaapa wangi imfumu yamu Asilya. Ndekupeela webo 2000 bakafwalo, kani kochi wasanga abakwendapo pali bo. ²⁴ Kochi wakana shani nangu umo uwamu ba kipitao uwa mu baniini bamubasha bakwa kaapa yangi? Mwabika ukuketekela kwenu mu Ijipiti mu ngolofwana namubenda pali bakafwalo ! ²⁵ Bushe naenda ukufika kuno ukwakubula ba Yawe mukulwa naino nkende ne kuyonaula ? Ba Yawe balibila kulinemo ati, ' Kilukuke kino kyalo ne kukyonaula. "'' ²⁶ Penka Eliyakimi umwana wakwa Hilikiya, na Shebina , na Yoah balilabile ku mukulu wabashilikali ati , "Twapapata tulabilileniko ku basha benu mumulaka waki Alamaiki, pantu tulamumfwa. Mwelabila na fwebo mumulaka uwaba Yuda mu matwi a bantu abali pakibumba. " ²⁷ Pano umukulu wa bashilikali alilabile kulibo ati, "Bushe kaapa yangi antumu kuli kaapa yobe nakuli webo mukulabila ano mashiwi ? Bushe ta antumine nemo kubantu abekala pakibumba, abo abakalu kulya utufi twabo ne kunwa amatundo aba na webo ? " ²⁸ Penka umukulu wa bashilikali alimakene ne kubilika mwi shiwi ilikulu mu mulaka uwaki Yuda, nekulabila ati , "Umfweni kwishiwi ilya mfumu iikulu, imfumu yamu Asilya. ²⁹ Imfumu yalabilati, ' Mwe leka Hezekiya amibepaike mwebo, pakuti taakwete amakosa akumipulusha mwebo ku makosa angi. ³⁰ Mwe leka Hezekiya amilengele mwebo ukuketekela muli ba Yawe, ne kulabilati, " Ba Yawe ikine bakatupulusha fwebo, na umo umushita akapanwe mu kuboko kwa mfumu yamu Asilya. ³¹ Mwe umfwa kuli Hezekiya, pakuti ifi efya labila imfumu yamu Asilya ati, ' Lengeni umutende nanemo kabili fumeni mwise kuli nemo. Penka uuli onse muli mwebo akalya kumufaina wakwe na kukichi kya kwe ikya mukuyu umwine ne kunwa amenshi ukufuma mu mukola wakwe umwine. ³² Mukaluku kitefi ukufika nefyo nkesa muku mifumyamo ne kumitwala kyalo kwati kyalo kyenu mwebene, ikyalo kya nseke ne mu sunga uwa bukumo, ikyalo umuli umukate ne mafaina, ikyalo kya fichi fyamo olife ne buki, pakwba ati mukekale abomi ne kufwa yowo. ' Mwe mumfwa Hezekiya nga aesha ukumibeopaika mwebo, nekulabila ati, 'B a Yawe bakatupulusha fwebo. ' ³³ Bushe kulipo Lesa wa bantu uwaba pulwishe po ukubafumya mukuboko kwa mfumu ya mu Asilya ? ³⁴ Nikwepi ukuli baesa babena Hamati nabena Alapadi ? Nikwepi ukuli balesa babena Sefalabaimi, Hena, na Iva? Bushe babapulusha po aba mu Samaliya ukufuma mukuboko kwangi ? ³⁵ Mukachi ka balesa ba mu fyalo, bushe palipo nangu umo uwapilwishepo ikyalo kyakwe ukufuma ku makosa angi? Nga ba Yawe kochi bapulusha shani Yelusalemi ukufuma ku makosa angi? "' ³⁶ Abantu balikele kelele ne kubula ukwasuka, pakuti imfumu yali kambishe ati, "Mwengasuka nemo. " ³⁷ Penka Eliyakimu umwana wakwa Hilikiya, uwali ne bukulu pananda yonse; Shebina kaleemba; na Yoah umwana wakwa Asafu uwakulemba, alishile kuli Hezekiya nefyakufwala fyaba kafitabaukile, ne kumubula amashiwi aa umukulu wabashilikali.