¹ Mu mwaka uwabu 12 uwakwa Ahazi imfumu yaba Yuda, unfumu bwakwa Hoshiya umwana wakwa Ela bwalitendekele. Alitangilile mu Samaliya paba Ishileli imyaka 9. ² Alukukita ifibipile pa menso aba Yawe, ifyo ifi amafumu onse aaba Ishileli aatangile pali ena taakichilepo. ³ Shalimaneza imfu yamu Asilya alimulukukile ena, kabili Hoshiya alibele musha wakwe ne kumuletela imilambu. ⁴ Penka imfumu yamu Asilya yalyanukile achi Hoshiya alukukita ifyamufutauka futauka, pantu Hoshiya alukutuma abaluwe kuli So imfumu yamu Ijipiti; kabili, ta alukupaana imilambu ku mfumu yamu Asilya, koti ni fyo yolukukita pa mwaka pa mwaka. Kanshi imfumu yamu Asilya yalimushilikishepo ne kumukwata ne kumuposa mu kaleya. ⁵ Penka imfumu yamu Asilya ya lilukile ikyalo kyonse, ne kulukuka Samaliya ne kumushinguluka pa myaka itatu. ⁶ Mu mwaka uwabu 9 uwakwa Hoshiya, imfumu yamu Asilya alikimfishe Samaliya ne kupinta aba Ishileli ubatwala nu Asilya Alibabikile mu Hala, kunika ya Habola iya mu Gozani, mu mishi iya mu Mediya. ⁷ Kuno ukukwatwa kwalikichikilwe pantu aba Ishileli bali bifishe kuli ba Yawe Lesa waboi, abo ababafumishe ukufuma mu kyalo kya Ijipita, ukufuma mukuboko kwa kwa Falao imfumu yamu Ijipita. Abantu balukulambila balesa bambi ⁸ ne kulukwenda munshile shibipile umo abena fyalo abo ba Yawe babafumishe mukachi ka bena Ishileli, kabili namu misango iya mafumu aba Ishileli iyo balukukita. ⁹ Abantu aba Ishileli balukukita ifya mamfisolo kuli ba Yawe Lesa wabo - ifintu ifyo tafya wemepo. Balilisompele abeene inkeende ishapeulu mu mishi yabo yonse, ukufuma kupa fyakukenkentelapo ukufika mishi iikulu. ¹⁰ Kabili balimikile amapanda amabwe ne fibumbwa fya kwa Ashela ponse apa tuntukile na munshi ya fichi ififunkile. ¹¹ Mulya balukokelamo ifinunkile bwino monse mu nkeende shapeulu, fyenka ifyalukukita ifyalo, ifyo ba Yawe bafumishe muli bo. Abaishileli balukukita ifibipile mukubusha ubukali bwaba Yawe ; ¹² Balukulambila utulubi, ifyo ba Yawe balabile kuli bo ati, " Mwe ka kita kino kintu. " ¹³ Ba Yawe balilabile ku ba Ishileli nakuba Yuda mu bakushimika babo namu ba kumona, ne kulabila ati, " Alulukeni ukufuma kunshila shenu ishibipile ne kusunga imikambisho yangi ne malamuna angi kabili kamukengela mjukusunga umushilo uyo nakambishe ba wishinweni, kabili ne yo natuma kuli mwebo ukupichila mubasha bangi abakushimika. " ¹⁴ Pano tabakomfwe; pano balikoseshe imikoshi yabo kwachi niba wishibo abo taba ketekele muli ba Yawe Lesa wabo. ¹⁵ Balisulile amalamuna abo ne kulayana uko apangile ne bashakulu babo, kabili ne kulayana kwa mafunde ayo apelwe kuli bo. Baluku konkaifyalukoso kabili nabo abene balibele balukoso. Balukukonka inshila isho ishibipile isha fyalo fyabashingulukile, abo ba Yawe babakambishe bo ukubula ukukonka. ¹⁶ Balilengulwile imikambisho yonse iya ba Yawe Lesa wabo. Balipangile ifibumbwa bumbwa fya kyeela ifyo basungulwile abaana babili abanómbe abakulambila. Balipangileakalubi ka tonse utwa mwiulu na Baali. ¹⁷ Balileengele abana babo abalalume ne bana kashi ukupita mu mulilo, balukubomfya bunanga bwakubuka ne fisoko, balilipanishe abene kukukita ifibipile ku menso aba Yaw, kabili bali kolomwene ubukali bwa bo. ¹⁸ Penka ba Yawe balifichilwe sana Ishileli ne kubafumya ku menso abo. Tapashelepo nangu umo kanafye umukoka wa bena Yuda bushimwa. ¹⁹ Nangu bena Yuda nabo tabasungile imikambisho yaba Yawe Lesa wabo, kabili balukukonka ifisela ifyalukukita aba Ishileli. ²⁰ Penka ba Yawe balibalengulwile bonse aba mukifyashi kyaba Ishileli: ali bayanjishe ne kubapaana mu maboko ababo abakubayanjisha kwati konaula, ukufika ne fyo babaumishe ku menso abo. ²¹ Alibafumishe aba Ishileli ku bufumu bwakwa Davidi, kabili balilengele Yelebomi umwana wa kwa Nebati ukuba ni mfumu. Yelobomiali bafumishe aba Ishileli kuku konka ba Yawe ne kubalengela ukubifya ukukulu sana. ²² Abantu aba Ishileli balukukonka ububi bonse ubwa kwa Yelobomi kabili ta bafumine ko ku bubi, ²³ kanshi ba Yawe balibafumishe aba Ishileli ku menso abo, koti nifyo balabile ukupichila mu basha babo abakushimika abo atongwele. Kanshi aba Ishilile balipinchilwe ukufuma mu mu kyalo ne kuya ku Asilya, kabili ni uli iinshila efyo kuli na leelo. ²⁴ Imfumu yamu Asilya yaliletele abantu ukufuma ku Babiloni naku kuta, kabili naku Ava, kabili naku Hamati na Sefavaimi, ne kubabi ka mu mishi yamu Samaliya mu munkende sha ba Ishileli. Balimupokele Samaliya kabili ne kwikala mu mishi yakwe. ²⁵ Kyalikichilwe kykutendeka kwa kwikala kwa bo mulya ati tabaluka kindika ba Yawe. Kanshi ba Yawe balitumine ba bokwe mukachi ka bo abo baipeye bamo bamo muli bo. ²⁶ Kanshi balilabile ku mfumu yamu Asilya, ne kulabila ati , "Ifyalo ifyo mwapinchile ne kubabika mu mishi yamu Samaliya tabeshibile ifisela ififfwaikwa kuli lesa wa mulikilya kyalo. Kanshi alitumine ba bokwe mukachi kabo, kabili, monemi, ba bokwe baleipaya abantu kulya pantu tabeshibile ifisela ififwaikwa kuli lesa uwa muli kilya kyalo. ²⁷ Imfumu yamu Asilya yalikambishe, ne kulabilati, " Pinte umo muba papatilishi mulyabo mwaletele ukufuma kulya, kabili muleke aye akekale kulya, kabili akaluku bafunjisha ifisela ififwaikwa kuli lesa wa muli kilya kyalo. " ²⁸ Kanshi umo mubapapatilishi pali abo bapinchile ukufuma mu Samaliya alishile ne kulukwikala mu Beteli; alu bafunjishe ifyo balingile ukukindika ba Yawe. ²⁹ Kanshi imikoka yonse yalipangile balesa babo, ne kubabika mu nkeende isha peulu isho abena Samaliya bapangile - umukoka onse mu mishi umo baikele. ³⁰ Abantu bamu babiloni balipangile Sukoti Benoti, abantu baku kuta balipangile Nelagali; abantu baku Hamata balipangile Ashima; ³¹ aba ku Ava balipangile Nibihazi na Talataki. Abena Sefaibaimi balyokele abaana babo mu mulilo kuli Adilameleki na Anameleki, ba lesa babena Sefabaimi. ³² Kabili baluku kinda naba Yawe, kabili neku tongolapo bamo muli bo abapapatilishi abapa nkeende shapeulu, abalu kubalambwilako abantu mwi tempeli apa suntukile. ³³ Baluku kindika ba Yawe kabili ne kulukulambila balesa wabo, mufisho fyamu fyalo umo babafumishe. ³⁴ Napali buleelo bakili balekita ifya mu fishio fyabo ifya kale. Taba kindikapo ba Yawe, nangu kukonka amalamuna, ifisontelwe, imishilo, nangu mikambisho iyo ba Yawe bapeene kuba mu kifyashi kyakwa Yakobi, uyo baimikile ishina ati Ishileli. ³⁵ Ulo ba Yawe bapangile ukulayana nabo, balibakambishe ati, " Mwe kalukutina balesa bambi , nangu kubafukamina mwebo kuli bena, nangu kubalambila, nangu kulipela kuli bo. ³⁶ Pano ba Yawe, abamiletele mwebo ukumifumya mu kyalo kya Ijipiti ne makosa aakulu kabili ne kuboko kwabo ukutanikilwe, nikuli bo mukafukama panshi, kabili ni kuli bo uko mukapela ifya kulambula. ³⁷ Amalamuna abo ne fisontelwe, ne mushili ne mikambisho iyo bami nembele mwebo, mukaisunga imyaka ne myaka. Kanshi tamulingile ukuchina balesa bambi, ³⁸ kabili ne kulayana uko napanga na mwebo, tamwa kalubemo; nangu kukindika mwe kakindika ba lesa bambi. ³⁹ Pano ba Yawe Lesa wenu ni uyo mukalukukindika. Bakamipulusheni mwebo kumakosa abalwani benu. " ⁴⁰ Tabakomfwe, pantu balitwalilile ukukita ifyo balukukita akale. ⁴¹ Kanshi fino ifyalo fyalukuchina ba Yawe kabili balukulambila ne fibumbwa fyabo ifyo babashile, kabili ne bana babo balukukita fyenkefyo- ne bana babana babo. Bakatwa lilila ukukita ifyo abashakulu babo bakichile, ukufika na kuli buleelo.