¹ Mu mwaka uwabu 17 uwakwa Peka umwana wakwa Lemaliya, Ahazi umwana wa kwa Yotamu imfumu yaba Yuda, alitendekele ukuba ni mfumu. ² Ahazi ali ne myaka iyakufyalwa 20 ulo atendekele ukuba mu bufumu, kabili ali keele mubufumu imyaka 16 mu Yelusalemi. Ta alukukita ifiweeme ku menso aba Yawe Lesa wakwe, kochi nififyo Davidi umushakulu wakwe alukukita. ³ Penka, alukwenda munshila ya mafumu aba Ishileli; ikiine, alileengele umwana wakwe ukupita mu mulilo, ukulukukonka ifintu ifikanishiwe ifyo abamufyalo bakita, ifyo ba Yawe bafumishe mu bantu aba Ishileli. ⁴ Alu kupaana ifyakulambula ne kokya ifinunkile bwino pa nkeende apasuntukile, peulu lya mpili, na munshi ya fichi ififunkile bwino. ⁵ Penka Lezini, imfumu yamu Alami na Peka umwana wakwa Lemaliya, imfumu yaba Ishileli, balishile ku Yelusalemi mukumulukuka. Bali muposele mukachi Ahazi, pano tabamukimfishe. ⁶ Pali ilya mpindi, Lezini imfumu yamu Alami alikwachile Elati pabena Alami ne kubafumya aba Yuda mu Elati. Penka abena Alami balishile ku Elati baikele ukufika na pali bu leelo. ⁷ Kanshi Ahazi alitumine abaluwe ku Tigilati- pileza imfumu ya Asilya, nekulabila ati , "Nemo ndi musha wenu kabili no mwana wenu. Iseni no kumpoulusha kukuboko kwa mfumu yamu Alami na kukuboko kwa mfumu yaba Ishileli abo abandukuka nemo." ⁸ Kanshi Ahazi alibulile siliva na golide iyo iyasangilwe munanda yaba Yawe kabili na pafya bunonshi ifya mukipango kya mfumu, kabili alifitumine nge fyabupe ku mfumu ya bena Asilya. ⁹ Penka imfumu yamu Asilya yalyumfwine kuli ena, kabili ne mfumu yamu Asilya yalile ne kumulwisha Damasikasi, ukuu kimfya ne kuba pintamo abantu ukuba basha babo ne kubatwala ku Kila. Kabili alipeye Lezini imfumu yamu Alami. ¹⁰ Imfumu Ahazi yalile ku Damasikasi mukukumana na Tigilati- Pileza imfumu yamu Asilya. Ku Damasikasi alimwene ikyonto. Yalitumine kuli Uliya umupapatilishi umusango wa kyonto ne fyo kili nefyo kyapangilwe kuli bonse abubomfi ubufwaikilwe. ¹¹ Kanshi Uliya umupapatilishi alisompele ikyonto ukuba pamo ne milanguluko iyo imfumu Ahazi atumine ukufuma ku Damasikasi. Ali kipwishishe apo imfumu Ahazi taingafika ukufuma ku Damasikasi. ¹² Ulo imfumu yafumine ku Damasikasi yalimwene ikyonto; infumu yalifikile ku kyonto ne kupanga imilambu palikyo. ¹³ Ali pangile imilambu yakwe iyakokya ne milambu yakwe iya nseko, ne kwichilapo umulambo wakwe wafyakunwa, ne kusansapo umulopa uwa milambu ya lumfwan'ano pa kyonto. ¹⁴ Ikyonto kya kyela kya lubemba ikyali ku kumenso aba Yawe- alikiletele ukufumya kuntanshi ye tempeli, ukufumya pakachi ka kyonto kyakwe ne tempeli lyaba Yawe kabili ne kukibika ku kabeta kakubulenge lubali lwa kyonto kyakwe. ¹⁵ Penka imfumu Ahazi yalikambishe Uliya umupapatilishi, ne kulabila ati , " Pa kyonto ikikulu ukalu ko kya umulambu wakokya uwalu keelo ne mulambu uwa nseke uwa kingulo, kabili ne mulambu wa kokya uwa mfumu ne mulambu wa nseke uwa mfumu, ne milambu yakokya iya bantu bonse mu kyaalo, ne milambu ya nseke shabo ne milambu yabo ya fyakunwa. Ukasansepo umulopa onse uwa mulambu wa kokya, kabili ne mulopa onse uwafya lubemba kikaba kyangi ikyakwipushishako pa kusungwa. " ¹⁶ Uliya umupapatilishi alikichile ifyo imfumu Ahazi amukambishe. ¹⁷ Penka imfumu Ahazi yalifumishe ifyela fyabu malata ne mabeseni ukufumya pafya kwimikilapo; kabili alifumishepo ikishiba pa n'ombe sha lubemba ishali panshi yakyo ne kukibika pa kyakwendelapo ikya mabwe. ¹⁸ Alifumishepo ikyafimbilwe pa mwakwendela ape sabata ikyasompelwe kwi tempeli, pano ne mwakwingilila imfumu posonde ye tempeli lyaba Yawe, pakuti pa mfumu yabena Asilya. ¹⁹ Pakuti pali fimbi ifintu ifya pali Ahazi ne fyo akichile, bushe tafilembelwe mwi buku ilya pafintu ifya mafumu abena Yuda? ²⁰ Ahazi alileele ne bashakulu bakwe ne kumu shika ne bashakulu bakwe mushi wakwa Davidi. Hezekiya umwana wakwe alibele ni mfumu mukifulo kyakwe.