¹ Mu mwaka uwabu 27uwa kwa Yelobomi imfumu yaba Ishileli, Azaliya umwana wakwa Amaziya imfumu yaba Yuda alitendekele ukuba mubufumu. ² Azaliya ali ne myaka iyakufyalwa 16 ulo atendekele ukuba mubufumu, kabili alikele mu bufumu imyaka 52 mu Yelusalemi. Ishina lyakwa inakwe ali ni Yekoliya, kabili alifumine mu Yelusalemi. ³ Alukukita ifiweeme pamenso aba Yawe, fyenka ifyo wishi Amaziya alukukita. ⁴ Nangu nifyo, ififulo fya nkeende ya peulu ta afifumishemo. Abantu balitwalile uku kulambula ne kokya ifinunkile bwino pa nkeende isha peulu. ⁵ Ba Yawe baliiletele ubulwelle imfumu pakwebati abo ne mbumba ufika pa kasuba ka kufwa kwakwe kabili alukwikala munanda yabusimwa iipatwilwe . Yotami, umwana wa mfumu, ali no bukulu bwapananda kabili alitangilile ikyalo. ⁶ Kochi ni pafintu ifya pali Azaliya, fyonse ifyo akchile, bushe tafilembelwe mwi buku ilya fintu ifyakichilwe mu mafumu aba Yuda? ⁷ Kanshi Azaliya alileele ne bashakulu bakwe; balimushikile pamo ne bashakulu bakwe mu mushi wakwa David. Yolami, umwana wakwe, alibele ni mfumu mukifulo kyakwe. ⁸ Mu mwaka wabu 38 uwa kwa Azaliya imfumu yaba Yuda, Zekaliya umwana wakwa Yelobomi alibele ni mfumu pa bena Ishileli mu Samaliya pa myenshi 6. ⁹ Alukukita ifibipile ku menso aba Yawe, fyenka ifyalukukita ba wishi. Ta afumine ku bubi bwa kwa Yelobomi umwana wakwa Nebati, uwalengele aba Ishileli ukubifya. ¹⁰ Shalumi umwana wakwa Yabeshi alimunfwanánine ukumwalukilamo Zekaliya, ukumulukuka ena mu Ibulimu, kabili alimwipeye ena. Penka alibele ni mfumu mukifulo kyakwe. ¹¹ Kochi nipa fintu fimbi ifyapali Zekaliya, fililembelwe mwibuku ilya fintu ifyakichile mu mafumu aba Ishileli. ¹² Lino lyali lishiwi lyaba Yawe ilyo balabile kuli Yehu, ukulabila ati, "Abana bobe bakekala pe tebe lya bufumu bwa ba Ishileli ukufika ku nkulo iya bu 4. " Ifyo efyo kyakichikilwe. ¹³ Shalumi umwana wakwa Yabeshi alite ndekele ukuba mubufumu mu mwaka uwabu 39 uakwa Azaliya imfumu ya ba Yuda kabili alikele mubufumu umwenshi fye umo mu Samaliya. ¹⁴ Menahemi umwana wakwa Gadi alituntukile ukufuma ku Tiliza ukuya ku Samaliya. Kulya alimulukukile Shalumi umwana wakwa Yabeshi, mu Samaliya. Alimwipeye ne kuba ni mfumu mukifulo kyakwe. ¹⁵ Kochi nipa fintu fimbi ifyapali Shalumi kabili ne fya kumfwanánanina lino ifyo akichile, fililembelwe mwi buku ilya fintu ifyakichile mu mafumu aba Ishileli. ¹⁶ Penka menahemi alilukile Tifusa na bonse abali kulya, ne mipaka aya shingulukile Tiliza, pakuti tabamushinkwililepo imishi kuli ena. Kanshi ali mulukukile, kabili ali batabawile abanakashi bonse abaline mapafu muli ulya mushi. ¹⁷ Mumwka wabu 39 uwakwa Azaliya imfumu yaba Yuda, Menahemi umwana wakwa Gadi alitendekeleukuba mubufumu bwa pa ba Ishileli; alikele mubufumu imyaka 10 mu Samaliya. ¹⁸ Alukukita ifibipile kumenso aba Yawe. Mu bumi bwakwe bonse, ta afumine ku bubi bwakwa Yelobomi umwana wakwa Nebati, uyo waleengele aba Ishileli uku bifya. ¹⁹ Penka Puli imfumu ya Asilya yalishile mu kulwisha ikyalo, kabili Menahemi alipele Puli amatalanta a siliva 1000, pakwebati ubwafwilisho bwakwa Puli bwengaba nakwe mukunshi mukupaana nakwe mukukosesha ubufumu bwa ba Ishileli mukuboko kwakwe. ²⁰ Menahemi alibasonkeshe shino ndalama ukufuma muba Ishileli pakubepusha umo umo mu banonshi mukupaana ku mfumu ya Asilya. Kanshi imfumu yamu Asilya yalyalulukile kabili tayaikelemo mukyalo. ²¹ Kochi nipa fintu fimbi ifya pali Menahemi, na fyonse ifyo akichile, bushe ta filembelwe mwi buku ilya fintu ifyakichilwe mu mafumu amu Ishileli? ²² Kanshi Menahemi alileele ne bashakulu bakwe, kabili Pekahiya umwana na wakwe alubele ni mfumu mu kifulo kyakwe. ²³ Mumwaka uwabu 50 mwakwa Azaliya imfumu yaba Yuda, Pekahiya umwana wakwa Menahemi alitendekele ukuba mubufumu paba Ishileli mu Samaliya; alikele pabufumu imyaka ibili. ²⁴ Alukukita ifibipile pa menso aba Yawe. Taashile panuma ububi bwakwa Yelobomi umwana wakwa Nebati, ubo ubwalengele aba Ishileli ukubifya. ²⁵ Pekahiya ali ne mukulu wankito uwe shina lyakwa peka umwana wakwa Lemaliya, uyo uwamu mfwananine ukumwalukilamo. Pamo nabalalume 50 abo alinabo aba ku Gileadi, Peka alipeeye Pekahiya, munanda iikosele iyabufumu iya mu kipango. Peka alipeeye Pakahiya kabili alibeele ni mfumu mu kifulo kyakwe. ²⁶ Kochi nipa fintu fimbi ifya pali Pekahiya, fyonse ifyo akichile, fililembelwe mwibuku lya fintu ifya kichikilwe mu mafumu amu Ishileli. ²⁷ Mu mwaka uwabu 52 uwakwa Azaliya imfumu yaba Yuda, Peka umwana wakwa Lemaliya alitendekele ukuba mu bufumu bwa paba Ishileli mu Samaliya; alikele pabufumu imyaka 20. ²⁸ Alukukita ifibipile pamenso aba Yawe. Ta afumineko kububi bwakwa Yelobomi umwana wakwa Nebati, uyo waleengele aba Sishileli ukubifya. ²⁹ Mu nshiku shakwe Peka imfumu yaba Ishileli, Tigilati-Paileza imfumu yamu Asilya yalishile ne kupokolola Iyoni Abeli Beti maaka, Yanowa, Kedeshi, Hazoli, Gileadi, Galileya, kabili ne kyalo kyonse ikya nafutali. Alibapinchilemo abanytu ukubatwala mu Asilya. ³⁰ Kanshi Hoshiya umwana wakwa Ela ali mumfwanánine ukumwalukilamo Peka umwana wakwa Lemaliya. Alimulukukile ne kumwipaya. Penka alibeele ni mfumu mukifulo kyakwe, mu mwaka uwabu 20 uwakwa Yotamu umwana wakwa uziya. ³¹ Kochi nipa fintu fimbi ifya pali Peka, fyonse ifyo akichile, fililembelwe mwibuku ilya fintu ifyakichikilwe mu mafumu a ba Ishileli. ³² Mu mwaka uwa bubili uwa Peka umwana wakwa Lemaliya, imfumu yaba Ishileli, Yotamu umwana wakwa Azaliya, imfumu yaba Yuda alitendekele ukuba mubufumu. ³³ Ali ne myaka iya kufyaalwa 25 ulo atendekele ukuba nimfumu; allikele mubufumu imyaka 16 mu Yelusalemi. Ishina lyakwa inakwe ali nyi Yelusha; ali mwana wakwa Zadoki. ³⁴ Yotamu alukukita ifiweeme pamenso aba Yawe. Alukukonka ifyakumwenako fyonse ifya kwa wishi Azaliya ifyo alukukita. ³⁵ Nangu nifyo, inkeende apatuntukile ta ashifumishemo. Abantu balitwalilile ukulambula ne kokya ifununkile bwino pa nkeende apasuntukile. Yotamu ali sompele umulyango wapeeulu uwa nanda yaba Yawe. ³⁶ Kochi ni pa fintu fimbi ifyapali Yotamu na fyonse ifyo akichile, bushe mwi buku ilya pa fintu ifyakichilwe mu mafumu amu Yuda? ³⁷ Muli sho nshiku ba Yawe balitendekele ukutuma kuba Yuda Lezini imfumu ya mu Alami, na Peka umwana wakwa Lemaliya. ³⁸ Yotamu alileele ne bashakulu bakwe kabili balimushikile mu mushi wakwa Davidi, umushakulu wakwe. Penka Ahazi, umwana wakwe, alibele ni mfumu mu kifulo kyakwe.