¹ Mu mwaka ububili uwakwa Yoashi umwana wakwa Yehoazi, imfumu yaba Ishileli, Amaziya umwana wakwa Yoashi, imfumu yaba Yuda, alitendekele ukuteka mubufumu. ² Ye aline myaka amakumi abili ne myaka isanu ulo atendekele uku teka mubufumu; Ye alitekele mubufumu imyaka amakumi abili ne myaka isanu na ine mu Yelusalemu. Ishina lyakwa inkwe ali ni Yeadani, uwa mu Yelusalemu. ³ Ye alukukita ifiweme mu menso aba Yawe, tali kochi ni Dafiti wishi. Ye alukukita fyonse ifyo Yoashi, wishi alukukita. ⁴ Pano inkende apatuntukile tabashifu mishemo. Abantu balitwalilile ukulambula ne kokya ifyakufutumuna pa nkende apatuntukile. ⁵ Kyalifikile ikyakweba chi bwangufye ukuteka kwa bufumu kwaikalikilwe bwino, Ye alipeye ababmfi abaipaile bawishi, ba mfumu. ⁶ Pano Ye taababikile abana batupondo pakwipaiwa; kanshii Ye alikichile mwenka umwilile kuli fyo ifya lembelwe mwi buku lya mishilo ilyakwa Mose, kochi mifyo ba Yawe ba mukambishe, ne kulabila achi, ''Bawishi tabelelwe ukubikwa pa kwipaiwa pakuchi pa bana babo, nangu bana ukubikiwa pakwipaiwa pakuchi pa bafyashi babo. Kanshi umuntu onse alyelelwe akubikiwa pakufwa pakuchi pa kubifya kwakwe umwine.'' ⁷ Ye alipeye amsausande ikumi abashilikale baku Edomu mwilungu lya mukele; kabili alipokele Sela mu nkondo kabili ne kulukumwita achi Yokotela, uyo uuleitwa na muli bulelo fye nkefyo. ⁸ Penka Amaziya alitumine abaluwe kuli Yehoashi umwana wakwa Yehohazi umwana wakwa Yehu imfumu yaba Ishileli, ne kulabila achi, ''Isa, tukumane fwebene amenso na menso mu nkondo.'' ⁹ Pano Yehoashi imfumu yaba Ishileli yalitumine abaluwe ukubabwesha kuli Amaziya imfumu yaba Yuda, ne kulabila achi, ''Umukolobola uwali mu Lebanoni, ne kulabila achi, 'Pela umwana obe umwanakashi ku mwana wangi umwalalume ukuba mukashi wakwe, 'Pano ikinama kyampanga ikikali kili mu Lebanoni kyalyendeleko kabili ne munyantaula umukolobola. ¹⁰ Webo kyakine wamulukuka Edomu, kabili umuchima obe akusuntula webo peulu. Ube uulitotele mukukimfya kobe, pano wikale kuñanda, pakuchi nindo wingaliletelela ukukatasho wemwine kabili ne kupana, fyonse webo na Yuda?'' ¹¹ Pano Amaziya ta akomfwe. Kanshi Yehoashi imfumu yaba Ishileli; yalibalukukile kabili Ye na Amaziya imfumu yaba Yuda balikumene pamo amenso na menso ku Beti Shemesni, uwa mu Yuda. ¹² Abena Yuda balibakimfishe kuba Ishileli, kabili umuntu onse alibutukile kuñanda. ¹³ Yehoashi imfumu ya ba Ishileli, yali mukwachile Amaziya, Yehoashi umwana wakwa Ahaziya, ku Beti Shemeshi. Alishile ku Yelusalemi ukufuma ku mulyango wakwa Efulemu ukufika ku mulyango waku Kona, amakyubiki ane mubutali. ¹⁴ Ye alipinchile yonse golide na silifa, fyonse ifyasangilwe muñanda yaba Yawe, kabili ne fintu ifyabuleme mu ñanda yabufumu, ne basha nabo, ne kubwelelamo ku Samaliya. ¹⁵ Kochi nipali fimbi ifintu ifya pali Yehoashi, fyonse ifyo akichile, amakosa akwe, kabili ne fyo alukulwana Amaziya imfumu yaba Yuda, bushe tafilembelwe mwibuku ilya fintu ifya kichikilwe mu mafumu aba Ishileli? ¹⁶ Penka Yehoashi alilele ne bashakulu bakwe kabili alishikilwe mu Samaliya ne mafumu aba Ishileli, kabili Yeloboma, umwana wakwe, alibele ni mfumu mukifulo kyakwe. ¹⁷ Amaziya umwana wakwa Yoashi, imfumu yaba Yuda, yalikele imyaka ikumi na isanu panuma ya kufwa kwakwe Yehoashi umwana wakwa Yehoazi, imfumu yaba Ishileli. ¹⁸ Kochi nipali fimbi ifintu ifya pali Amaziya, bushe tafilembelwe mwibuku ilya fintu ifyakichikilwe mu mafumu aba Yuda? ¹⁹ Bo bali mumfwañanine Amaziya mu Yelusalemu, kabili Ye alibutukile ku Lakishi. Alibutukile ku Lakishi, pano balitumine abantu abamukonkele ku Lakishi kabili mwipeye kulya. ²⁰ Bali mubwesheshe kunuma pali bakafwalo, kabili alishikilwe ne bashakulu bakwe mu mushi wakwa Dafiti. ²¹ Bonse abantu bamu Yuda balimupinchile Azaliya, uyo uwali ne myaka iya kufyalwa ikumi ne myaka isanu na umo, ne ku mulenga ukuba ni mfumu mukifulo kwa wishi Amaziya. ²² Ali ni Amaziya uwa sompolwele Eelati kabili ne kukibwesha kyo kuli Yuda, panuma imfumu Amaziya yalele pamo ne bashakulu bakwe. ²³ Mumwaka uwe kumi ne myaka isanu uwakwa Amaziya umwana wakwa Yoashi imfumu yaba Yuda, Yeloboma umwana waka Yehoashi imfumu yaba Ishileli alitendekele ukuteka mu Samaliya; alikele pa bufumu imyaka amakumi ane ne mwaka umo. ²⁴ Alukukita ifibipile mu menso aba Yawe. Ta afumineko ku kukipile nangu kimo pabubi bwakwe Yeloboma umwana wakwa Nebati, uwalengele aba Ishileli ukubifya. ²⁵ Alibwesheshe umupaka waba Ishileli ukufuma ku Lebo Hamati ukuya ku kishiba kyaku Alaba ukukonka imikambisho iye shiwi lyaba Yawe, Lesa wa ba Ishileli, ikyo alabile ukupichila mu mubomfi wakwe Yona umwana wakwa Amita, umwakushimika, uwafumine ku Gati Hepa. ²⁶ Pakuchi ba Yawe balimwene ukupenga kwaba Ishileli, achi kwalibipishe pali onse, bonse umusha kabili ne ukakulukile, kabili achi tapali uwakubapulusha aba Ishileli. ²⁷ Kanshi ba Yawe balilabile achi tabakashimañanye ishina lya Ishileli munshi yeulu; kanshi, alibapuulwishe bo kukuboko kwakwa Yeloboma umwana wakwa Yehoashi. ²⁸ Kochi nipali fimbi ifya pali Yeloboma, fyonse ifyo akichile, amokosa akwe, ifyo alwile inkondo kabili nefyo apokolwele Damasikasi na Hamati, iyo iyali yaba Yuda, paba Ishileli, bushe tafilembelwe mwi buku ilya fintu ifyakichikilwe mu mafumu aba Ishileli? ²⁹ Yeloboma alilele ne bashakulu bakwe, ne mafumu aba Ishileli, kabili Zakaliya umwana wakwe alibele ni mfumu mu kifulo kyakwe.