¹ Ili Ataliya, ñinakwe na Ahaziya, amwene ati umwana wakwe umwanakashi afwa, alimine nokwipaya bonse abana bakubufumu. ² Lomba Yehosheba, umwana umwanakashi mfumu Yeholamu kabili inkashi yakwa Ahaziya, alipinchile Yoashi umwana umwalalume uwakwa Ahaziya, nokumufisa ukumufumya mukachi ka bana abalalume aba mfumu abaipaiwe, pamo nowakumulela; alibabikile kumupunda mu ñanda. Balimufishile ukufuma kuli Ataliya pakwebati eipaiwa. ³ Alikele nakwe pa myaka isanu na umo, kafishilwe mu ñanda ya ba Yawe, ili Ataliya aikele pa bufumu. ⁴ Mu mwaka wa busanu na ibili, Yehoyada alitumine amashiwi nokuuleta abakulu ba nkondo abali imyanda abena kali namuli bakalama, nokubaleta uku ali, mwiitempele lya ba Yawe. Alipangile ikipangamo nabo, nokubalapisha umulapo mu ñanda yaba Yawe. Penka alibamweneshe umwana wa mfumu. ⁵ Ali bakambishe, nokubeba ati, ''Ifi efyo mufwile ukukita. Ikiputulwa kimo ikya butatu abesa pa Sabata bakalukulama iñanda ya mfumu, ⁶ Kabili ne kiputulwa kimbi ikya butatu kikalukulama umulyango wa panuma, kabili ikiputulwa kimbi ikya butatu bakalukusompa kunuma ya mulyango waku ñanda yaba kulama. ⁷ Amabumba ambi abili aya teti akalukupyunga pa bushiku bwe Sabata, bakalukusopa iñanda yaba Yawe nokulama imfumu. ⁸ Mufwile ukushokoloka imfumu, kila muntu ne kyanso kyakwe mukuboko kwakwe. Onse uukengile mu minongo yenu, akepaiwe. Mukabene mfumu pakufuma napa kwingila. ⁹ Penka abakulu aba nkondo abapa myanda balinakile fyonse ifyo Yehoyada umupapatilishi abakambishe. Kila mukulu wa nkondo alipinchile abantu bakwe, abo abaleisa muku kombola abanabo ukupyunga pa Sabata, kabili nabalya abatabalukubomba pali lilya isabata, kabili balishile kuli Yehoyada umupapatilishi. ¹⁰ Penaka Yehoyada umupapatilishi alibapele abakulu aba nkondo abapa myanda imisumbo ne fya kuleelamo ifyali ifya mfumu Dafiti kabili ne fyali mu ñanda iya ba Yawe. ¹¹ Penka abakusopa balimine, kila muntu ne kyanso kyakwe mukuboko kwakwe, ukufuma kukuboko kwalulyo ulwe tempele ukufika na ku kipiko, kubwipi ne kipailo kabili ne tempele, nokushokoloke mfumu. ¹² Penka Yehoyada alimufumishe Joashi umwana wa mfumu nokumufwika ikitebo ku mutwi, nokumupela ibuku lya mishilo. Penka balimupyanikile pa bufumu no kumusuba. Balipopwele amaboko nokulabila ati, ''Mwikale inshiku shonse mwe mfumu. ¹³ Ili Ataliya aumfwile ikyongo kyaba kulama kabili ne kya bantu, alishile ku bantu mu ñanda yaba Yawe. ¹⁴ Aliloleshe, kabili, moneni, imfumu yalimakene kwishiki, mwenka umwailile intambi amatolompita balimakene pabwipi ne mfumu. Bonse abantu aba mu kyalo balisekelile nokulisha amatolompita. Penka Ataliya alitabawile ifyakufwala fyakwe nokubilikisha ati, ''Ukupondoka! ukupondoka!'' ¹⁵ Penka Yehoyada umupapatilishi alibebele abakulu ba nkondo abapa myanda abali abakulu paba shilika nokubeba ati, ''Muleteni mumubike pakachi ka minongo. Onse uukamukonka, mukamwipaye ku kipanga. Pakuti umupapatilishi alilabile ifi ati, mwikaleka bakamwipaile mu ñanda ya ba Yawe. ¹⁶ Kanshi balimukwachile ili afikile pa mpunsha apo bakabalwe bapichila ukwingila ku lubansa lwa kipango, kabili kulya eko bamwipailile. ¹⁷ Penka Yehoyada alipangile ikipangano pakachi kaba Yawe ne mfumu kabili na bantu. ¹⁸ Kanshi abantu bonseabamu kyalo balile kuñanda yakwa Baela nokwi kundulapo. Balikitobawile ikitapisho kyakwa Baela kabili no tulubi twakiko, kabili balipeye na matani, umupapatilishi ofwakwa Baela, kuntanshi ya filya ifitapisho. penka yehoida umupapatilishi asontele abakulama iñanda ya ba Yawe. ¹⁹ Yehoida alipinchile abakulu ba nkondo aba pa myanda, abena kali, abakulama kabili na bantu bonse aba mukyalo, kabili bonse pamo balimutwele imfumu ukufuma ku ñanda yaba Yawe kabili balimutwele muñanda ya bufumu, ukupichila pa mulyango uwabalama. Yoashi alikele pa kipuna kya bufumu. ²⁰ Penka abantu bonse aba mukyalo balisekelile, kabili no mushi walikelele panuma ya kumwipaya Ataliya ne kipanga pa ñanda ya bufumu. ²¹ Yoashi alilukoso ne myaka isanu naibiliili bamufwikile pa bufumu