¹ Kabiiji inge Lesa wa kusaangula obeewa na Kilishitu, keeba biintu mwiulu, amo mwaikala Kilishitu ku kubooko kwa kiluujo kya Lesa. ² Laanguluka pa biintu bya mwiulu, keechi pa biintu bya pa ntaanda ne. ³ Pakuuba obeewa waafwa, ne buumi boobe be bufya ne Kilishitu mwi Lesa. ⁴ Kilishitu byo aka mweeka ao waikala buumi boobe, poonkapo ne obeewa uka mweeka naanji mu lukuumo lwaanji. ⁵ Ipayai, bu muuntu bweenu bwa pa ntaanda- bulaale laale, bya buunya, bukaji, kusakasaka kuubi, ne lwiiso, booba nkishi. ⁶ Ke na maambo a bino biintu amba bukaji bwa Lesa bubeena kwiiya pa baana baubala lukookelo. ⁷ Ke mubino biintu amba ne anweeba mwaendelemo byo mwaikele moonka. ⁸ Mino luno mwafwainwa kwi bifumyaamo abino biintu byoonse- bukaji, kuzhiingila, kusaka kuuba biibi, mweenga ne ng'aambilo yatama kufuuma mu tunwa tweenu. ⁹ Keechi mwi beepe umo ne mukwaabo ne, maambo anweeba mwafumyaamo bu muuntu bwaakala ne byuubilo byaanji, ¹⁰ kabiiji mwavwaala muuntu mupya ako ke kuleengwa bupya mu maana kweesakanya ku kiimpashanya kya yeewa wi kileengele, ¹¹ ako kwabula mu Ngiliki nangwa mu Yudea, mukaanda naangwa kubula mukaanda, babaliana, Sikitiana, muzha, muuntu wakasululwa, mino Kilishitu ye byoonse, kabiiji uji mu byoonse. ¹² Onkao maambo, byo muji basalwa, bazhila kabiiji bateemwe, vwaalai muchima wa lusa, buteemwe, bu muuntu, kunekena, kabiji ne buteekanye. ¹³ Mwiikale bakwiitekenya umo ne mukwaabo. Ikalai ba kwiubila lusa umo ne mukwaabo. Inge umo uji na byakwijizhang'anya pa mukwaabo, mwiilekele maambo byoonka bya Nkambo byo emulekela anweeba. ¹⁴ Pa bino biintu byoonse, ikalai na buteemwe, maambo kyo kikosesha bololoke. ¹⁵ Lekai muteende wa Kilishitu ekale ntaangi mu michima yeenu. Ke maambo a uno muteende ye mwaichilweeko mu mubiji umo. Kabiiji ikalai ba kusaanta. ¹⁶ Lekai byaambo bya Kilishitu biikale bunoonshi mwi anweeba, bya kwi mufuunjisha ne kwi mukaambizha umo ne mukwaabo na maana onse, sa mwiimba ya salaamo ne ya nyiimbo kabiiji ne nyiimbo ya mupashi na kusaanta mu michima yeenu kwi Lesa. ¹⁷ Byoonse nyo muuba, mu byaambo nangwa mu kukajilwa, ubai byoonse mu jizhiina ja Nkambo Yesu. Panai saante kwi Lesa Taata kupichila mwi aye. ¹⁸ Bakazhi, kookelai balume beenu, byoonka byo kyafwainwa mwi Nkambo. ¹⁹ Anweeba balume, teemwai bakazhi beenu, kabiiji keechi mwiikale ba kwi boobila bukaji ne. ²⁰ Baana, kookelai ba nseemi yeenu mu biintu byoonse, pakuuba kino kyo kya waama mwi Nkambo. ²¹ Ba nseemi, keechi mutuuntwiishe baana beenu ne, kuchiina amba bakeekala na mooyo. ²² Anweeba bazha, kookelai ba nkaambo yeenu kweesakanya na ku mubiji mubiintu byoonse, keechi na meeso-amoona ne, noobe baantu mulaabisha ne, mino na muchiima wakooka. Chiinai Nkambo. ²³ Byoonse byo muuba, ingila ku mweo noobe kwi Nkambo kabiiji keechi noobe ku baantu ne. ²⁴ Anweeba mwayuuka amba mukataambula kwi Nkambo mfweeto ya bya buswaanyi. Ke Nkambo Kilishitu ye mwiingijila. ²⁵ Pakuuba yeense uba byabula koloka ukataambula lumanamo pa byabula koloka byo aubile aye, kabiiji keechi kuji misalululo ne.