¹ Pauuba amiiwa nasaka anweeba muyuuke lumanamo lukataampe lo nemumanamijile, ku booba baji ku Laodikeya, kabiji ne kubavula babula kumona kiluungi kyaami mu bu muuntu. ² Amiiwa ngingila byonka byo amba michima yaabo ikoonshe kutuundaikwa na kwi ileeta pamo mu butemwe kabiji ne mu bunoonshi boonse bya mulaye yeense wa milaangwe, mu maana a byafyamika bya Lesa, ye, Kilishitu. ³ Mwi aye mo mwafyama bya bunoonshi bwa milaangwe ne maana . ⁴ Na amba bino byonka byo amba keechi naangwa umo akemubeepe na byaambo bya boongozhi ne. ⁵ Naangwa amiiwa keechi nji neenu ku mubiji ne, pano mino nji neenu ku mupashi. Amiiwa nsekela pa kumona kuloondela kweenu kwa waama ne kukoosa kwa lwiitabilo lweenu mwi Kilishitu. ⁶ Byo mwataambwile Kilishitu Yesu Nkambo, endainga mwi aye. ⁷ Koselai mwi aye, shimikwai pe aye, ikalai mu luketekelo lwaanji byonka byo be mifuunjishe, kabiji ne musaanta. ⁸ Monai kuuba amba keechi naangwa umo emumone kupichila mu milaanguluko ya bumuuntu kabiji ya bubela ne, mwaila bisemwa bya baantu, ne ku kuloondaizha malamuna a mipashi ya pa ntaanda, ne kuloondaizha Kilishitu ne. ⁹ Pakuuba mwi aye bu Lesa boonse bwayuula mu musaano wa bu muuntu. ¹⁰ Anweeba mwayuuzhiwa mwi anweeba, aye waikala mukuluumpe pa baandama kyaalo boonse ne ba luusa boonse. ¹¹ Mwi aye ne anweeba mo mo be mubiijile mukaanda na mukaanda ubula kuubiwa na baantu mu kufumya mubiji wa bu muuntu, mino mu mukaanda wa kwa Kilishtu. ¹² Anweeba mwazhiikilwe naanji mu lubatisho, kabiji mwi aye mo mo mwabushiwe kupichila mu lwiitabilo mu bulume bwa Lesa, aye wa musaangwile kufuma mu baafwa. ¹³ Byo mwafwiile ku buundenga maambo bweenu ne mukubula kubiwa mukaanda kwa bumuuntu bweenu, aye wimusaangwile ke boomi pamo ne aye kabiji witulekejileko maambo atweeba boonse ku mizhilulwiila yeetu. ¹⁴ Aye wafuuchile byaneembelwe bya nkoongole ayo itwimeenejile atweeba na byatoongolwa. ¹⁵ Aye wibafumisheepo na kwibipoopa ku musalabu. Aye wafumishepo baandama kyaalo ne ba luusa ne kwibamweesha buumvu patooka, ne kwiba shiinda pa musalabu ¹⁶ Byonkabyo pano, keechi muuntu e muzhaachishe pa byakuja naangwa pa byakutoma ne, naangwa ba kijiilo naangwa pa kumweeka kwa ng'oondo ne, naangwa pa mooba a Sabaado ne. ¹⁷ Abye byo biimvule bya biintu bikeeya, mino mubiji ye Kilishitu. ¹⁸ Keechi muleke awa usaka bumuuntunshi ne kupoopwela ba malaika emuzhaachishe ku mpasela yeenu ne. Muuntu wa byoonkabyo utweela mu biintu byo a mona kabiji ne kwiluundumukilapo kyatuutu na milaanguluko yaanji ya bu muuntu ne. ¹⁹ Aye keechi ukakachila ku mutwe ne. Kufuma ku mutwe amba mubiji yeense kupichila mu manuungi ne mishipa koko yafumina ne kwinuunga pamo; ukoma na kukoma kufuma kwi Lesa. ²⁰ Inge anweeba mwafwiile pamo ne Kilishitu ku bya kiteendekesho kya mipashi ya pa ntaanda, maambo ka kyo mwiikela noobe mwakookela ku ntaanda: ²¹ "Keechi mukwaateko, naangwa kutoompako ne ku kuunkulako ne nyi?" ²² Maambo abino biintu byoonse bikoonaika pa kwibiingijisha, mwaila mikaambizho ne mafuunjisho a baantu. ²³ Aye mizhilo imweeka noobe ya maana, mukupopweela kwa kwi leengela abo beebe ne bu muuntu, lukabiisho lukataampe kwa mubiji. Mino byo byatuutu ku bya lwiiso bya buntuunshi.