¹ Sauli ali mukusuminisha imfwa yakwe. Eco kwalitendeke muli bulya bushiku ukupakaswa ukukalamba ku lukuta ulwali mu Yerusalemu; na basumina bonse balisalangene mu fitungu fya Yudea na Samaria, kanofye abatumwa. ² Abaume baipele balishilkile Stefani kabili baliloseshe apakalamba palwa ena. ³ Nomba Sauli alyeseshe ukonaulo lukuta. Alikwingila ing'anda ne ng'anda, ukukulamo abaume na banakashi, no kubaposa mucifungo. ⁴ Lelo abasumina abasalangene balile bakobila icebo. ⁵ Filipi atentemukile ku musumba wa Samaria no kubila kuli bena Kristu. ⁶ Amabumba ya bantu yalikukutikisha kufyalikulandwa na Filipi; bamumfwile no mupashi umo. ⁷ Imipashi yakukowela yalifumine mu bengi abawililwa, yalikulilisha ne misowa iikalamba, na bengi ababulebe ne filema balikuposhiwa. ⁸ Eco mwali insansa ishingi muli musumba. ⁹ Lelo kwali umuntu umo mu musumba uwali kwitwa Simone, uyo akale alikucita ifya malele; alikupapusha abena Samaria lintu alikulanda ati ali umuntu mukankala. ¹⁰ Bonse abena Samaria, ukufuma ku mwaice no kufika kuwakulishapo, balikumumfwila; balikulanda ati, "Uyu muntu ni yalya maka yakwa Lesa ayetwa yakalamba. ¹¹ Balikumumfwila ico alibapapusha pa nshita iitali na mayeye yakwe. ¹² Lelo ulo basumine Filipi lintu abilile mbila nsuma iya bufumu bwa kwa Lesa ne shina lyakwa Yesu Kristu, balibatishiwe, bonse abaume na banakashi. ¹³ Nangula ni Simone wine alisumine na panuma ya lubatisho alikele na Filipo lyonse. Lintu amwene ifishibilo ne milimo iya maka iikocitika, alipapwike. ¹⁴ Nomba lintu abatumwa mu Yerusalemu baumfwile ati abena Samaria balikopokelele icebo cakwa Lesa, balibatumine Petero na Yohane. ¹⁵ Lintu bafikile, balibapepeleko, ukwebati benga pokelela Mupashi wa Mushilo. ¹⁶ Pantu mpaka ilya nshita Mupashi wa Mushilo ali talawila nangu ni umo pali bena; babatishiwilwefye mwi shina lya kwa Shikulu Yesu. ¹⁷ Elo Petero na Yohane bali tambalike iminwe yabo pali bena, kabili balipokelele Mupashi wa Mushilo. ¹⁸ Nomba lintu Simone amwene ukwebati Mupashi wa Mushilo wapelwe mu kutambalikwapo iminwe ya batumwa, alibapele indalama. ¹⁹ Alandile, "Mpeni aya maka, nanebo ukwebati onse uyo na tambalikapo iminwe yandi enga pokelela Mupashi wa Mushilo." ²⁰ Lelo Petero alilandile kuli ena, "Leka indalama shobe shilobe pamo nobe, pantu utontokenye ukukwata ica bupe cakwa Lesa ne ndalama. ²¹ Taukwete cakaniko nangu cakupendulwa muli uyu mulandu pantu umutima obe taulungeme kuli Lesa. ²² Eco lapila kuli ubu bubifi bobe, no kupepa kuli Shikulu, pakwebati nalimo kuti akwelela ku kutontonkanya kwa mutima obe. ²³ pantu ndimwene ukwebati ulikwete ubukali mu mutima obe kabili uli uwa kakwa ku bubifi." ²⁴ Simone alyasukile ati, "Mpepeleniko kuli Shikulu, pakwebati pafyo mulandile tapali nangu cimo icikoncitikila." ²⁵ Ulo bashimikile no kulanda icebo ca kwa Shikulu, Petero na Yohane balibwekelemo ku Yerusalemu, bakobila imbila isuma ku mishi iingi iya bena Samaria. ²⁶ Nomba malaika wakwa Shikulu alilandile kuli Philipi ati, "Ima no kuya ulwaku kapinda ka kukulyo ku nshila iyatentemukila ukufuma ku Yerusalemu ukuya ku Gasa." (Iyi inshila yaba mu ciswebebe) ²⁷ Alimine no kuya. Moneni, kwali umuntu wa fumine ku Etiopia, mutungwi umukata wa kwa Kandake, namfumu wa bena Etiopia. kasunga wa fyuma fyakwe fyonse. Alishile ku Yerusalemu ku kupepa. ²⁸ Ali mukubwelelamo kabili alikele mwi celeta lyakwe, kabili akobelenga kasesema Esaya. ²⁹ Umupashi walilandile kuli Filipi "Kabuye no kupalamina pepi neli celeta." ³⁰ Eco Filipi alibutukile kuli ena, kabili alimumfwile akobelenga Esaya kasesema, kabili alilandile ati. ""Bushe ulishibe ifyo ukobelenga?" ³¹ Nolu alilandile ati, "Kuti naishiba shani, kano umo akontungulula?" Alitile Filipi ukwisa kunina mwi celeta no kwikala nankwe. ³² Nomba iciputulwa ca malembo ico umwina Etiopia alebelenga cali ni ci, Alitwelwe kubati ni mpanga ku kwipaiwa, kabili kubati mwana wa mpanga atalala ku bakomubeya, efyo taiswile akanwa kakwe. ³³ Mukusulwa kwakwe umulinganya wali fumishiwe kuli ena.Ni nani enga londola ukufikapo ifikolwe fyakwe? Pantu umweo wakwe walifumishiwe pe sonde." ³⁴ Eco mutungwi alipwishe Filipi, no kulanda ati, "Nakupapata ngeba ninani kasesema akolandapo, mwine, nangu muntu umbi?" ³⁵ Filipi alitendeke ukulanda, no kutendekela pali ililembo alibilile imbila nsuma pa lwa kwa Yesu kuli ena. ³⁶ Lintu balikuya mu musebo, balifikile pa menshi na mutungwi alilandile ati, "Monine, pali amenshi pano. Cindo cikondesha ukubatishiwa?" ³⁷ Filipi alilandile ukwebati umfwa wa tetekela ukobatishiwa." Mutungwi alyaswike, Natetekela ukwebati Yesu Kristu mwana wakwa Lesa." ³⁸ Eco umwina Etiopia alileseshe iceleta ukwenda. Balitentemukile mu menshi, bonse Filipi na Mutungwi, na Filipi alimubatishe. ³⁹ Lintu baninine ukufuma mu menshi, Umupashi wa kwa Shikulu walisendele Filipi ukutali, na mutungwi tamumwene na kabili. Lelo alile palwendo lwakwe akosekelela. ⁴⁰ Lelo Filipi alimonekele pa Asote kabili alipitile kuli cilya citungu, akobila imbila nsuma ku misumba yonse mpaka nelyo aishile ku Kaisarea.