¹ Shimapepo mukalamba alilandile ati, "Bushe ifi fintu fya cishinka?" ² Stefani alilandile ati, "Bamunyinane na batata, umfweni kuli nebo: Lesa wa bukata alimonekele kuli shifwe Abrahamu ulo ali mu Mesopotamia, lintu ali talaikala mu Harani; ³ alilandile kuli ena, 'Fuma mu calo cobe na ba lupwa, no kuya ku calo ico nkakulanga.' ⁴ "Nolu alishile icalo ca bena Kaldi no kuya kwikala mu Harani, ukufuma palya, panuma yamfwa yakwa wishi, Lesa alimukushishe no kumutela muli ici calo, umo mwikala nomba. ⁵ Kabili tamupele apa kwikala, iyo, nangu pa kunyanta ulukasa pene. Lelo alilaile fye - nangu Abrahamu ali talakwata mwana - ukwebati apatela icalo nge cikwatwa kuli ena na ku ba mubufyashi bwakwe abakesakukonkapo. ⁶ Lesa alilandile kuli ena ngefi fine, ukwebati aba mubufyashi bwakwe bukalebelako mu calo ca bweni, bakabako mu busha no ku bacita ububi pa myaka imyanda ine. ⁷ 'Lelo nkesakupingula uluko ulo bakabako ubusha,' kabili panuma ya ifyo fintu bakafumamo nokwisa kunshinshimuna muli ino ncende.' ⁸ Nolu Lesa alipele Abrahamu icipangano ca kusembululwa, eco Abrahamu alishile kuba wishi wakwa Isaki kabili alimusembulwile panuma ya nshiku cine konse konse; Isaki alishile kuba wishi wakwa Yakobo, na Yakobo wishi wa fikolwe ikumi na fibili. ⁹ "Pantu ifikolwe fya belele Yosefe akalumwa, fya mushitishe ku Egupti; lelo Lesa ali nankwe ¹⁰ kabili alimupuswishe mu macushi yakwe yonse. Alipele Yosefe ububile na mano ku cinso cakwa Farao, imfumu ya mu Egupti, amusontele ukuba cilolo mu Egupti na pa ba ng'anda yakwe bonse. ¹¹ "Nomba icipowe no bucushi bukalamba fyaliponene mu Egupti na mu Kanaani, na ba shifwe tabasangile cakulya. ¹² Lelo ulo Yakobo aumfwile ukwebati kuli ifyakulya ku Egupti, alitumineko ba shifwe umuku wa kubalipo. ¹³ Pa bulendo bwa cibili Yosefe aliisokolwele kuli bamunyina, no lupwa lwakwa Yosefe lwalishibikwe kuli Farao. ¹⁴ Yosefe alitumine ba wabo ukuya kulalika Yakobo wishi pakwebati ese kwikala ku Egupti, pamo no lupwa lwakwe lonse, bali pamo amakumi cine lubali na basano abantu bonse. ¹⁵ Eco Yakobo alile ku Egupti, kabili alifwile, ena na ba shifwe. ¹⁶ Kabili batwelwe ku Shekemu no kubikwa mu nshishi iyo Abrahamu ashitile mu mutengo wa sha silfere ku bana bakwa Hamore mu Shekemu. ¹⁷ "Lintu inshita yalailwe yapaleme, icilayo ico Lesa alaile kuli Abrahamu, abantu balikulile no kusanduluka mu Egupti, ¹⁸ "mpaka ulo kwaimine imfumu imbi iya kuteka Egupti, Imfumu iyi taishibile ifi fyonse pali Yosefe. ¹⁹ Yalicitile ubucenjeshi ku bantu besu no ku patikisha ba shifwe ukuposa utunya twabo pakwebati twiba na mweo. ²⁰ "Pali ilya inshita Mose ninshi alifyelwe, ali uwakuyemba ku cinso cakwa Lesa kabili alilelelwe imyeshi itatu mu ng'anda yakwa wishi. ²¹ Ulo afumishiwe panse, mwana Farao umukashana alimubulile no kumulela ngo mwana wakwe. ²² Mose alisambilile amano yonse aya bena Egupti, ali uwa maka mu cebo na mu milimo. ²³ "Lelo ulo imyaka amakumi yane yaile mukukumana, calishile mu mutima wakwe ukwebati aye tandalila ba wabo, abana bakwa Isreali. ²⁴ Ukumona umwina Isreali bakomucusha, Mose alimucingilile no kulandula ku wali kumutitikisha alyumine umwina Egupti: ²⁵ Kabili atotonkenye ukwebati ba wabo bakoiluka ukwebati Lesa, ku kuboko kwakwe, akobapela ipusukilo, lelo tabailwike. ²⁶ Pa bushiku bwakonkelepo alimwene abaume babili bakolwa ulubuli no kwesha ukubawikishanya, alilandile ati, mwe baume muli bamunyina nindo muko icenena umo no mubiye?' ²⁷ "Kabili uwali kulufyanya umunankwe ali mwasukile, no kulanda ati. 'nani akusontele ukuba kateka kabili kapingula pali fwebo? ²⁸ Bushe ukofwaya ukwipaya nebo ngefyo waipeye umwina Egupti mailo?' ²⁹ Mose alibutwike pakumfwa aya mashiwi; alisangwike umulebeshi mu calo ca Midia, uko ailekuba wishi wa bana baume babili. ³⁰ Ulo papitile imyaka amakumi yane, Malaika alimonekele kuli ena mu matololo ya lupili lwa Sinai, mulubingu lwa mulilo mu cimpusa. ³¹ Ulo Mose amwene umulilo, alisungwike pakumona ici; kabili alipalamine ukumwenekesha ici cintu, kwalishile shiwi lyakwa Shikulu, likoeba ati, ³² Ninebo Lesa waba wiso, Lesa wakwa Abrahamu, no wakwa Isaki kabili uwa kwa Yakobo.' Mose alitutwime kabili tapamine ukulolesha. ³³ "Shikulu alilandile kuli ena, 'Fula indyato ku makasa yobe, pantu pa ncende apo wiminine ni mpanga ya mushilo. ³⁴ Ndimwene ukucushiwa kwa bantu bandi mu Egupti; Ndyumfwile ukulila kwabo, kabili ndilikile ku kubapokolola; nomba isa, nkokutuma ku Egupti.' ³⁵ "Uyu Mose uyo bakene, lintu balandile ati; 'Nani akusontele kateka kabili kapingula?' - eo Lesa atumine kukuba fyonse kateka kabili kalubula. Lesa alimutumine mu kuboko kwa kwa malaika uyo wa monekele Mose mulubingu lwa mulilo. ³⁶ Mose alibafumishemo mu Egupti panuma ya kupanga ifisungusho ne fishibilo mu Egupti na pali bemba wakukashika, na mu matololo pa myaka amakumi yane. ³⁷ Ni uyu wine Mose uwalandile ku bana ba Isreali, 'Lesa akemya kasesema wenu pali bamunyinenwe, kasesema wakuba nga nebo.' ³⁸ Uyu e muntu uwali mu lukuta mu matololo pamo na malaika uwa landile kuli ena pa lupili lwa Sinai, uwali pamo na bashifwe, kabili uwapokelele ifyebo fya mweo kukutupela. ³⁹ "Lelo bashifwe balikene ukumubela; balimutamfishe ukufuma kuli bena; kabili mu mitima yabo balibwelele ku Egupti. ⁴⁰ Pali ilya nshita balilandile kuli Aarone ati, 'Tucitile milungi iikala tutungilile. Napali ici Mose, uwatutungulwile pa kutufumya mu calo ca Egupti, tatwishibile ificitike kuli ena.' ⁴¹ Eco balicitile umwana wa ng'ombe mu inshiku shilya no kuteta iIambo ku cilubi cilya, no kusansamuka pa mulandu wa milimo yaku minwe yabo. ⁴² Lelo Lesa alipilibwike no kubapela ukupepa intanda sha mu mulu, ngefyo calembwa mu citabo ca ba kasesema. 'Bushe mwaletele imitulo kuli nebo na malambo imyaka amakumi yane mu matololo, mwe ng'anda yakwa Isreali? ⁴³ Mwasumine ihema lyakwa Moloke no lutanda lwa mulungu wemu Refani, ne fipasho ifyo mwacitile ku kufipepa: kabili nkamikushisha ukucila Babele.' ⁴⁴ "Ba shifwe bali ne hema lya bunte mu matololo, ngefyo Lesa akonkomeshe lintu alandile kuli Mose, ukwebati afwile ukulicita ilyakupalana nelyo amwene. ⁴⁵ Panuma, ba shifwe, abali pamo na Yoshua, balipokelele ihema no kulisenda pamo nabo ulo bakopokolwele icalo. Lesa alipokolwele icalo ku nko kabili alishitamfishe pa ntanshi ya ba shifwe. Ihema lyali mu calo ukufika ku nshiku shakwa Dabidi, ⁴⁶ uwasangile ububile ku cinso cakwa Lesa, kabili alilombele umfwa enga fwaile Lesa wakwa Yakobo apakwikala. ⁴⁷ Lelo ni Solomone ewa kulile Lesa ng'anda. ⁴⁸ "Nangu cingaba ifyo, Uwapulamo tekala mu ng'anda iya kulwa ku minwe, nga filya kasesema alandile ati, ⁴⁹ 'Umulu e cipuna candi ica bufumu, ne sonde eca kubikapo amakasa yandi. Ni ng'anda ya musango ndo mungankulila? efyo Shikulu alanda, nangula ni ncende ndo apakutushisha kwandi? ⁵⁰ Bushe te maboko yandi ya citile fyonse ifi?' ⁵¹ "Mwe batalama ku mikoshi, abatasembululwa imitima na matwi, lyonse mulakana Mupashi wa Mushilo; mucita ifyo ba wishinwe balikucita. ⁵² Nani muli ba kasesema uyo ba wishinwe bashapakese? Baipeye bakasesema ababilile kabela ulwa kwisa kwa wa Mushilo; kabili nomba mwaba bashikamfutu kabili intalamisoka, ⁵³ mwebo mwe bantu bapokelele amalango ku kulinga kwa ba malaika, lelo tamwayasungile iyo." ⁵⁴ Nomba ulo bashi cilye baumfwile ifi fintu, calibakalipe mu mitima, no kusumanya ameno pali Stefani. ⁵⁵ Lelo ena, pakuba uwaisulamo Mupashi wa Mushilo, atontele amenso mu mulu no kumona ubukata bwakwa Lesa; no kumona Yesu aliminene ku kuboko kwa kulyo ukwa kwa Lesa. ⁵⁶ Stefani alilandile ati, "Lolesheni, na mona umulu uliswike, no Mwana wa Muntu alimunine ku kuboko kwa kulyo ukwa kwa Lesa." ⁵⁷ Pali ici abantu ba mucilye bashinkile mu matwi yabo, no kupunda amashiwi yabo pamulu, no kuwila pali ena no buyo bumo. ⁵⁸ Bamufumishe kunse ya musumba kabili balitendeke ukumupola amabwe. ba kambone ba anshile amalaya yabo pa nkasa sha mulumendo Sauli. ⁵⁹ Lilya bakopola Stefani amabwe, alikukuta kuli Shikulu no kulekulanda ati, "Shikulu Yesu, pokeleleni umupashi wandi." ⁶⁰ Alifukeme panshi kabili alipundile ishiwi ilikalamba ati, "Mwe Shikulu mwibapela mulandu pali ici." Ulo alandile aya mashiwi, aliponene mutulo.