¹ Nomba umuntu umo uwainikwe ishina lya Anania, pamo no mukashi wakwe Safira, alishitishe icikwatwa cakwe, ² no kusungapo shimo pa ndalama ashitishe (no mukashi wakwe alicishibe ici), no kuletako icakaniko cimo no kucibika pa makasa ya batumwa, ³ Lelo Petero alilandile ati, "Anania, nindo Satana aisushisha umutima obe ukubepa ku Mupashi wa Mushilo no kusungapo iciputulwa cimo ica ndalama sha mutengo wa mpanga? ⁴ Ulo yali tailashitishiwa, bushe tayali yobe, na panuma ya kushitisha tayali mu maka yobe? Nindo wacibikile ifi mu mutima obe? Taubepele abantu, lelo Lesa. ⁵ Pakumfwa ifi fyebo Anania aliwile no kuleka umweo, no mwenso uukalamba walishile pali bonse abumfwile ici. ⁶ Abalumendo balimine kabili balimufungulishe, kabili balimusendele no kuya ku mushika. ⁷ Panuma ya nsa shitatu, umukashi wakwe alishile kwingila, taishibile ifyacitikile. ⁸ Petero alilandile kuli ena, "Njeba nga cakwebati impanga mwaishitishe pa mutengo wapakuti." Alilandile ati, "Ee, palyuyo wine mutengo." ⁹ Nolu Petero alilandile kuli ena, "Nindo iyo mwasuminishenye capamo ukwesha Mupashi wakwa Shikulu? Lolesha, amakasa yaba ciya kushika umulume obe yali pa mwinshi, kabili bakokusenda nobe." ¹⁰ Ulolwine aliwile pa makasa yakwe no kuleka umweo. Ulo abalumendo baishilemo, bamusangile alifwile, kabili balimusendele no kuya kumushika ku mulume wakwe. ¹¹ Umwenso uukalamba walishile pa lukuta lonse na pali bonse abaumfwile ifi fintu. ¹² Ifishibilo ne fipapwa ifingi fyali kucitika pa bantu ukupitila mu maboko ya batumwa. Bonse bali capamo no mutima umo mulukungu lwa kwa Solomone. ¹³ Lelo tapali nangu umo pa bashele uwa kwete ukushipa kukuisansha kuli bena; lelo, abantu balikubacindika. ¹⁴ Kabili abatetekele abengi balikulundwako kuli Shikulu, amabumba ya baume na banakashi, ¹⁵ icakwebati balikusenda na balwele mu misebo balibalalikile pa misengele na pa macila, pakwebati Petero nga isako, icinshingwa cakwe ciponene pali bamo. ¹⁶ Elo kabili kwalishile ibumba lya bantu ilikalamba ukufuma mu tumishi twashinguluka Yerusalemu, ukuleta abalwele nabo abakwete imipashi ya kukolwela, kabili bonse balipolele. ¹⁷ Lelo shimapepo mukalamba aliminine, nabo bonse abali nankwe ( aba cakaniko ca ba Saduke); kabili baliswilemo akalumwa ¹⁸ kabili alibikile amaboko pa batumwa, balibekatile no kubika mu cifungo ca cintu bwingi. ¹⁹ Lelo inshita ya bushiku malaika wakwa shikulu aliswile ifibi fya mu cifungo no ku bafumyamo, no kwebati, ²⁰ "Kabuyeni muyekwiminina mwi tempele no kulanda ku bantu fyonse ifyebo fya mweo uyu." ²¹ Ulo baumfwile ifi, balingile mwi temple ku macaca no kusambilisha, Lelo shimapepo mukalamba alishile, nabo ali nabo, kabili balitile icilye pamo, abakalamba bonse aba bantu bamu Isreali, balitumine ku cifungo ukuya kuleta abatumwa. ²² Lelo abashilika batumine tabaile kubasangamo mu cifungo, balibwele nokwisa kulanda, ²³ "Tulile kusanga icifungo cilikomenwe pa maka na bakalinda baliminine pa mwinshi, ulo twacisula, tatwacisangamo muntu nangu umo makati." ²⁴ Nomba ulo kangalila we tempele naba shimapepo bakalamaba baumfwile ifi fyebo, amano yalipelele pali ifi elo ne fikesa kufumamo. ²⁵ Elo umo alishile no kubeba ati, "Abaume abo mwabikile mu cifungo baliminine mwi tempele kabili bakosambilisha abantu." ²⁶ Eco kangalila alile pamo na bashilika batumine no kubabwesha, lelo ukwakubule ntulubindi, ico balitinine abantu, ukwebati kuti babapola amabwe. ²⁷ Ulo babaletele, balibemikile ku cilye. Shimapepo mukalamba alibepwishe, ²⁸ ukwebati, "Twalimyebele no ku mukonkomesha ukukana sambilisha mwi shina ili, lelo muliswishe Yerusalemu na masambilisho yenu no kufwaya ukuleta umulopa wa uyu muntu pali fwebo." ²⁹ Lelo Petero na batumwa balyasukile, "Tulilingile ukunakila Lesa ukucila abantu. ³⁰ Lesa waba shifwe alibushishe Yesu, uyo mwaipaile pa ku mutamunika pa ci muti; ³¹ Lesa alimusansabika kukwa kulyo kwakwe kukuba Imfumu kabili Kapususha, kukupela ukulapila kuli Isreali, no kwelelwa kwa membu. ³² Tuli ba kamboni wa ifi fintu, pamo na Mupashi wa Mushilo, uo Lesa apele kuli abo abamunakila." ³³ Ulo abacilye abumfwile ifi, balifulilwe no kufwaya ukwipaya abatumwa. ³⁴ Nomba umu Farise uwe shina lya Gamaliele, kasambilisha wa malango uwa cindikilwe na bantu bonse, alimine mu cilya no kukonkomesha ati, abatumwa babatwale panse akashita akanono. ³⁵ Nolu alilandile kuli bena, "Mwe baume bakwa Isreali, mucenjele nefyo mukopanga ukucita naba bantu. ³⁶ Pantu ulo inshiku shinono tashilaisa, Teuda alimine aleitunga ukuba icintu, ne mpendwa ya baume, nalimo imyanda ine, balimukonkele. Balimwipaile, nabo bonse abalikumunkonka balisalangene tabali ici conse. ³⁷ Panuma ya uyu muntu, Yuda waku Galili alimine mu nshiku shaku pendwa kwa bantu alifumisheko abantu bamo abakumukonka. Na ena alilobele, na bonse abali kumunakila balisalangene. ³⁸ Nomba nkolanda kuli mwebo, talukeni kuli aba bantu no kubaleka babe, pantu umfwa ukukupanga nangu ukubomba kwa bantu, ku kafumishiwapo. ³⁹ Lelo umfwa ca kufuma kuli Lesa, tamwakakwate maka ya kubafumyapo mukasanga no kwebati mukolwishanya na Lesa." Eco balisuminishe kuli ici. ⁴⁰ Elo bakutile abatumwa kabili balibomine no ku bakonkomesha ukukana landa mwi shina lyakwa Yesu, kabili balibalekele baye. ⁴¹ Balifumine pa cilye bakosekelela ico balipendelwe abalinga ukuculila ishina lyakwe. ⁴² Panuma cila bushiku, mwi tempele na cila ng'anda ne ng'anda, balitwalilile ukusambilisha no kubila imbila nsuma ukwebati Kristu ni Yesu.