¹ Nomba Petero na Yohane balikuya mwi tempele pa nshita ya mapepo, ulo akasuba kasenduluka inshita ya kulenga mutanda. ² Nomba umuntu uwali icilema ukufumafye munda muli nyina alikusendwa ku mpongolo ye tempele iikutwa iyakuyemba. Balikumubika pali ilya icende cila bushiku pakwebati alekulomba ifya nkumbu abo abakoingila mukati ke tempele. ³ Ulo amwene Petero na Yohane balimukwingila mwi tempele, ali lombele ifya nkumbu. ⁴ Petero, pakutonta amenso yakwe pali ena, pamo na Yohane, alilandile ati, "Lolesha kuli fwebo." ⁵ Umuntu uwakulemana aliloleshe kuli bena, ukwenekela ukupokelela fimo kuli bena. ⁶ Lelo Petero alilandile ati, "Silfere na golide nebo ntakwete, lelo ico nkwete, nebo nkokupela. Mwi shina lyakwa Yesu Kristu umwina Nasareti, enda." ⁷ Pakumwikata ku kuboko kwa kulyo, Petero alimwimishe, na palyapene amakasa ya muntu ne nsokosoko shali kosele. ⁸ Alitolweke, umuntu wakulemana aliminine kabili alitendeke ukwenda; no kwingila pamo na Petero na Yohane mwi tempele, akoenda, ukutoloka, no kulumbanya Lesa. ⁹ Abantu bonse bali mumwene ninshi akoenda no kulumbanya Lesa. ¹⁰ Balishibe ukwebati ni ulya muntu alikulomba abantu ifya nkumbu pa mpongolo ya kuyemba iye tempele; kabili balisushiwemo ukupapuka no kusunguka pa mulandu wa fyacitike kuli ena. ¹¹ Lintu acili alikatilile kuli Petero na Yohane, abantu bonse balibutukileko capamo kuli bena mu lukungu ulwitwa ulwa kwa Solomoni, balipapile apakalamba. ¹² Ulo Petero amwene ici, alyaswike abantu, "Mwe baume Israeli, nindo mwebo mwapapila? Mutontele amenso pali fwebo, kubati nifwebo tulengele uyu ukwenda na maka yesu nangu nipa mulandu wa bu Lesa bwesu? ¹³ Lesa wakwa Abrahamu na Isaki, na Yakobo, Lesa wa ba shifwe, na cindamika umubomfi wakwe Yesu. Ni uyo umo uyo mwapele no kumukana pa menso yakwa Pilato, ulo apingwile ukumulekelako. ¹⁴ Mwebo mwalikene uwa Mushilo kabili umulungami, kabili mwebo mwipunda ilyo mwalilombele kepaya ukupelwa kuli mwebo. ¹⁵ Mwaipeye Kalenga wa mweo, uo Lesa abushishe ku bafwa - kabili fwebo tuli ba kambone ba ici. ¹⁶ Apashintilila icitetekelo cesu mwi shina lyakwe, ishina lyakwe lyalenga uyu muntu, uo mukomona no kwishiba, uwa kukosa. Icitetekelo ico capitila muli Yesu cili mupela uyu bumi bwakupwililika pa menso yenu bonse. ¹⁷ Nomba, mwe bamunyinefwe, Ndishibile ukwebati mwebo mwacitile mu bututu, nge fyacitile ba kateka benu. ¹⁸ Lelo ifintu ifyo Lesa alandile libela ukupitila mutunwa twa bonse bakasesema, ukwebati Kristu ali no kucula, nomba alifikilishe. ¹⁹ Eco, lapileni, no kupilibuka, pakweba ati imembu shenu shingatumbuka, ²⁰ pakweba ati inshita ya kubwekeshiwapo cipya cipya ku cinso cakwa Shikulu; kabili ukwebati enga tuma Kristu uyo uwa sontwa kuli mwebo, Yesu. ²¹ Euyo wine uo umulu ufwile ukupokelela mpaka inshita ya kubwekeshapo kwa fintu fyonse, pafyo Lesa alandile ku nshita sha kale ukupitila pa kanwa ka ba mushilo bakwe bakasesema. ²² Mose icine alandile, 'Shikulu Lesa akemya kasesema uwakuba nga nebo pakati ka bamunyinenwe. Mufwile ukukutika kuli fyonse ifyo akalanda kuli mwebo. ²³ Fikacitika ukwebati umuntu onse uutakakutike kuli uyo kasesema akonaulwa umupwilapo ukufuma pakati ka bantu.' ²⁴ Ee, na bonse ba kasesema ukufuma kuli Samwele nabo baishile panuma yakwe, balilandile no kubilikisha mu nshiku shino. ²⁵ Mwebo muli bana baume ba ba kasesema kabili abacipangano ico Lesa apangene ne fikolwe fyenu, ngefyo alandile kuli Abrahamu, ''Mu bufyashi bobe indupwa shonse isha pano calo shikapalilwamo.' ²⁶ Panuma Lesa aimishe umubonfi wakwe, no'kumutuma kuli mwebo pakubala, pa mulandu wa kwebati mupalilwemo mwebo pa kupilibula bonse mwebo ukufuma ku bubifi bwenu."