¹ "Mwe bamunyinefwe na bashifwe, umfweni ku kuipokolola kwandi uko nkomwebo." ² Ulo ibumba lya umfwile Paulo akolanda mu cilimi ca ciHebere, balikele tondolo, Alilandile ati, ³ Ndi mu Yuda, Uwafyalilwe mu Tarsi mu calo ca Kilikia, lelo na sambilishiwe mu musumba uno wine mu ceni cakwa Gamaliele. Nali sambilishiwe ne nshila shonse umwabela amalango ya bashifwe. Naliba uwacincila muli Lesa, ngefyo na mwebo muli lelo. ⁴ Nalipakese iyi Nshila ukubafika na ku mfwa, ukubakaka no ku baposa mu cifungo abaume na banakashi pamo, ⁵ na shimapepo mukalamba ne cilye conse ica bakalamba kuti baba bakambone. Nalipokelele amakalata ukufuma kuli bena pa mulandu wa ba munyinefwe ku Damaseke, kabili nalile kulya ku kubaleta mu fikakilo ku Yerusalemu ukwebati bakandwe. ⁶ Cali citike ukwebati lintu nalikuya no kupalama ku Damaseke, nalimo akasuba pakati mukupumikisha ulubuto ulukalamba ukufuma mu mulu lwali nsanike ukushinguluka. ⁷ Naliponene panshi no kumfwa ishiwi likolanda kuli nebo, 'Sauli, Sauli, nindo ukompakashila?' ⁸ Nalyasukile, 'Nimwe bani, Shikulu?' Alinjebele ati, 'Nine Yesu wa ku Nasarete, uwo ukopakasa.' ⁹ Abo abali na nebo balimwene ulubuto lelo tabaumfwile ishiwi lya wali kulanda na nebo. ¹⁰ Nalilandile, ncinte shani, mwe Shikulu? na Shikulu alilandile kuli nbo, 'Ima no kuya mu Damaseke. Kulya uleya kwebwa fyonse ifyasontelwa webo ukucita. ¹¹ Nshali kumona pa mulandu wa ku bengeshima kwa lubuto, kabili ukutungululwa na maboko ya abo abali na nebo, Nalifikile mu Damaseke. ¹² Mulya nalikumenye umuntu uweshina lya Anania, kapepa ukulingana na malango kabili uwashimikwe ifyabune kuba Yuda bonse abali kwikala mulya. ¹³ Alishile kuli nebo no kwiminina apo nali, kabil alilandile ati, 'Munyina Sauli, mona.' Pali ilya ine nsa nali mu mwene. ¹⁴ Nolu alilandile ati, Lesa wa bashifwe alikusontele ukwebati wishibe ubufwayo bwakwe, ukumona umulungami, no kumfwa ishiwi likofuma mukanwa kakwe. ¹⁵ Pantu ukaba kambone wakwe ku bantu bonse pafyo umwene no kumfwa. ¹⁶ Nomba nindo ukololela? Ima, ubatishiwe, no kusambwa imembu shobe, ukwitwa pe shina lyakwe.' ¹⁷ Panuma nabwelela ku Yerusalemu, kabili lintu nalikupepa mwi tempele, nali mwene icimonwa. ¹⁸ Nali mumwene akolanda kuli nebo, 'Angufyanya no kufuma mu Yerusalemu nomba line, pantu tabakasumine ubunte bobe palwa neno.' ¹⁹ Nalilandile ati, 'mwe Shikulu, abene beka balishiba ukwebati nalikubaposa mu cifungo no kuboma bonse abatetekele muli mwebo mu masunagoge monse. ²⁰ Lintu umulopa wakwa Stefani kambone wenu wa sumine na nebo wine nalifye mupepi ndiminine kabili nkosuminisha kabili nalikusunga amalaya ya bali ku mwipaya. ²¹ Lelo alilandile kuli nebo, "Kabuye pantu nkakutuma ukutali ku Bena fyalo."' ²² Ukumumfwa balimumfwile ukufika na pali cilye cebo. Nolu balisanswile amashiwi yabo no kulanda ati, "Fumyeni pano nse uwa kubefi, pantu tacimuwamine ukwebati abe no mweo." ²³ Nomba ulo balikubilikisha, no kuposaika amalaya yabo, no kukuba ulukungu mulwelele, ²⁴ mushika mukalamba uwa mpuka alikonkomeshe Paulo ukutwalwa mu nkambi. Alikambishe ukwebati epushiwe no kulopaulwa, pakwebati umwine eka eshibe ico bakobilikisha kuli ena muli uyu musango. ²⁵ Ulo bamukakile ne myunga Paulo alilandile kuli mushika uwaiminine palya, "Bushe mwalisuminishiwa ukulopaula umuntu mwina Roma kabili uushapingwilwa mulandu?" ²⁶ Ulo mushika aumfwile ifi alile kuli mushika mukalamba no kumweba, ukulanda ati, "Cindo ico mukofwaya ukucita? pantu uyu muntu mwina Roma," ²⁷ Mushika mukalamba alishile no kumweba ati, "Njeba bushe webo uli mwina Roma?" Paulo alilandile ati, "Ee." ²⁸ Mushika mukalamba alyasukile ati, "Niku mutengo ukalamba nebo na mwenene ubukaya ubu." Lelo Paulo alilandile ati, "Nebo ndi mwina Roma ku kufyalwa." ²⁹ Nolu abantu abali no ku mwipusha apopene balimushile. Na mushika mukalamba nao alimfwile umwenso, ulo aumfwile ukwebati Paulo ali mwina Roma, pantu alimukakile. ³⁰ Pa bushiku bwakonkelepo, mushika mukalamba alifwaile ukwishiba icishinka pafyo aba Yuda balikushinina Paulo. Eco alimukakwile no kweba bashimapepo bakalamba ne cilye conse ukukumana. Nolu aliletele Paulo ukumutentemusha kabili alimubikile pakati kabo.