¹ Panuma ya ifi fintu Paulo alifumine ku Atena no kuya ku Korinti. ² Kulya eko akumenye umu Yuda uwaikilwe Akula, umwina Ponti ku kufwalwa, uwafumine lilya line ku Italia no mukashi wakwe Priskila, pantu Klaudi alikonkomeshe aba Yuda bonse ukufuma mu Roma.Paulo alile kuli bena, ³ kabili pantu alikubomba ubutukushi bumo bwine, alikele pamo no kubombela pamo, ico bali bakacita ba ma hema ebutukushi bwabo . ⁴ Eco Paulo alikupelulula mwi sunagoge iSabata lyonse, ukwesha ukunasha bonse aba Yuda na ba Hela. ⁵ Nomba ulo Sila na Timote baishile ku Makedonia Paulo aliipele umwine ku cebo, ukulanda ku ba Yuda ukwebati Yesu ni Kristu. ⁶ Lelo ulo aba Yuda ba musushishe no ku mupontela, Paulo alikuntile amalaya yakwe pali bena no kulanda kuli bena ati, "Umulopa wenu wingaba pa mitwe yenu mwe bene; Ndisangulwike. Ukufuma nomba nkoya ku Bena fyalo." ⁷ Nolu alifumine kulya kabili alile ku nga'nda ya muntu uwainikwa lya Tito Yusti, umuntu uwali kushinshimuna Lesa. Inga'nda yakwe yalikonkene ne sunagoge. ⁸ Klispi, umukalamba we sunagoge, alitetetkele muli Shikulu, pamo naba ng'anda yakwe bonse; na bengi abena Korinti abaumfwile pali ici balitetekele no kubatishiwa. ⁹ Shikulu alilandile kuli Paulo ubushiku mu cimonwa, "Witina, lelo landa kabili wikutumana. ¹⁰ Pantu ndi nobe, takuli uwalaesha ukukusansa noku kucena, pantu ndikwete abantu abengi muli uno musumba." ¹¹ Paulo alikele kulya umwaka umo ne myeshi mutanda, akosambilisha icebo cakwa Lesa pakati kabo. ¹² Nomba ulo Galio aishile kuba umulashi waku Akaya, aba Yuda balimine Paulo no mutima umo no kumuleta ku cipuna ca bupingushi; ¹³ balilandile, "Uyu muntu akonasha abantu ukushinshimuna Lesa mu musango uupusene ku malango." ¹⁴ Lelo ulo Paulo alikufwaya ukulanda, Galio alilandile kuba Yuda, "Mweba Yuda, aciba mulandu wakulunguna nangu uwa bupulumushi bwa bubifi, nga caciba icayana ukwebati myafwe mwebo. ¹⁵ Lelo apo aya mepusho pa mashiwi na mashina elo na malango yenu, pinguleni mwebene, Nebo nakana ukuba kapingulula wa iyi milandu." ¹⁶ Galio alibatamfishe na pacipuna ca bupingushi. ¹⁷ Eco bonse balikatile Sosteni, umukalamba we sunagoge, no kumuma ku ntanshi ya cipuna ca kupingwilapo. Lelo Galio tasakamene pafyo bacitile. ¹⁸ Paulo, panuma yakwikala kulya inshiku ishingi, alishile aba bwananyina no kuya mubwato ku Suria pamo na Priskila na Akula. Ulo talafuma ku mbali ya bemba, mu Kenkrea, alibeyele umushishi wakwe pantu ali no mulapo. ¹⁹ Ulo baishile ku Efeso, Paulo alishile Priskila na Akula kulya, lelo ena alile mu sunagoge kabili alipelulwishenye naba Yuda. ²⁰ Ulo baipwishe Paulo ukwikalako inshita iyi tali, alikene. ²¹ Lelo pa kubasha, alilandile ati, "Nkabwela na kabili kuli mwebo umfwa bufwayo bwakwa Lesa." Elo aya mubwato ukufuma ku Efeso. ²² Ulo Paulo afikile ku Kaisarea, alininine pa mulu no kuposha ulukuta lwa mu Yerusalemu kabili alitentemukile ku Antioke. ²³ Panuma yakuposako inshita kulya, alifumineko alile akopita mu fitungu fya Galatia na Frugia, akokoselesha abasambi bonse. ²⁴ Nomba kwali umu Yuda uweshina lya Apolo, umwina Alekesandria ku kufyalwa, alishile ku Efese. ali uwa maka uwaku kampuka mukulanda kabili uwakwishiba amalembo. ²⁵ Alisambilishiwe amasambilisho yakwa Shikulu. Pakuba uwakupimpa mu mutima, alikulanda no kusambilisha no mucetekanya ulwakwa Yesu, lelo aishibile fye ulubatisho lwakwa Yohane epela. ²⁶ Apolo alitendeke ukulanda mu ma sunagoge uwakushipa. Nomba ulo Priskila na Akula ba mumfwile, balimusendele pa mbali no kumulondolwela inshila yakwa Lesa bwino mukushikimika. ²⁷ Ulo afwaile ukwabukila ku Akaya, aba bwananyina balimukoseleshe no kulemba ku basambi ba mu Akaya ukwebati bamupokelele. Ulo afikile, alyafwile sana aba abatetekele umulandu wa kusenaminwa kwa kwa Lesa. ²⁸ Apolo alinashishe aba Yuda na maka pakulanshanya kwa palwalala, ukulangilila mu malembo ukwebati Yesu e Kristu.