¹ Nankwe Paulo alishile ku Derbe na ku Lustra, kabili moneni, umusambi umbi uwali kwitwa Timote ali kulya, umwana umwaume wa mwanakashi wa ci Yuda uwali uwatetekele, lelo wishi ali mu Hela. ² Ena alikulandilwa ifyabune kuli bamunyinane abali ku Lustra na ku Ikonia. ³ Paulo alifwaile ena ukwenda nankwe, eco alimusendele kabili alimusembulwile pa mulandu waba Yuda abo abali muli shilya ncende, ico bonse balishibile ukwebati wishi wakwe ali mu Hela. ⁴ Ulo balikuya ba kopita mu misumba, balile bakokonkomesha ukubela masambilisho ya salile abatumwa na bakalamba abali mu Yerusalemu. ⁵ Eco inkuta shali koseleshiwe mu citetekelo nokufulilako mu mpendwa cila bushiku. ⁶ Paulo nabo ali nabo balile bakopita mu fitungu fya Frugia na Galatia, ico bali bindilwe ku Mupashi wa Mushilo ukubila icebo mu citungu ca Asia. ⁷ Ulo baishile mupepi na Mysia, balyeseshe ukuya mu Bitunia, lelo Mupashi wa kwa Yesu alibakenye. ⁸ Eco ukupita mu Mysia bali tentemukile ku musumba wa Troa. ⁹ Ne cimonwa calimoneke kuli Paulo mu bushiku: Umuntu wa mu Makedonia aliminine palya akomupapata ena no kweba ati, "Wise na mu Makedonia no kutwafwa fwebo." ¹⁰ Ulo Paulo amwene icimonwa, na popene twalikufwaya ukuya ku Makedonia, ukusuminishanya ukwebati Lesa alitwitile fwebo ukushimikila imbila nsuma kuli bena. ¹¹ Eco na pakuba palwendo ukufuma ku Troa, twalilungeme ku Samotrake, no bushiku bwakonkelepo twalishile ku Neapoli. ¹² Ukufuma palya twalile ku Filipi, uwaba musumba wa mu Makedonia, umusumba uukankala sana mu ciputulwa kabili no butekeshi bwa ci Roma, kabili twalikele muli uyu musumba pa nshiku ishakulinga. ¹³ Pa bushiku bwe Sabata twalile kunse ya mpongolo ku lulamba lwa mu mana, uko twatontonkenye ukwebati kuti kwaba ncende ya mapepo. Twalikele panshi no kushimikile ku banakashi abakolongene pamo. ¹⁴ No mwanakashi uyo wainikwe Ludia, kashitisha washa kukashikila ukufuma ku musumba wa Tuatira, uwali kushinshimuna Lesa, alikutikishe kuli fwebo. Shikulu alimwiswile umutima mu kumfwikisha ku fyali kulanda Paulo. ¹⁵ Ulo ena na ba ng'anda yakwe ba batishiwe, alitupapatile fwebo ukwebati, "Umfwa mwanshinikisha nebo ukuba wa cishinka kuli Shikulu, iseni no kwikala mu ng'anda yandi." Kabili alitulombele fwebo mukunakilila. ¹⁶ Calishile kuba ngefi ukwebati, ulo twali kuya ku ncende ya mapepo, umukashana umo uwa muli bunkole uyo uwakwete umupashi wa lubuko alitukumenye fwebo. Ena aliletele ba shikulu wakwe ubunonshi ubwingi mu kubuka. ¹⁷ Uyu mwanakashi alikukonka Paulo pa numa kabili nefwe no kubilikisha, ukwebati, "Aba bantu babomfi ba kwa Lesa uwapulamo. Ba kobila kuli mwebo inshila ye pusukilo." ¹⁸ Alicitile fi pa nshiku ishingi. Lelo Paulo, pakuba uwa kukalifiwa kuli uyu mukashana, alipilibukile no kulanda ku mupashi, "Nkokweba webo mwi shina ilya Yesu Kristu ukufuma muli ena." Kabili walifune muli ena panshita ilya ine. ¹⁹ Ulo shikulu wakwe ba mwene ukwebati isubilo lya bunonshi bwabo nomba lyaya, balikete Paulo na Sila kabili balibatantanishishe mu ncende ya mushika ku ba buteko. ²⁰ Ulo ba baletele kuli ba kapingula balyebele ati, "Aba bantu bakofundaula umusumba wesu. Ba Yuda. ²¹ Ba kobila intambi ishitasuminishiwa ku bena Roma ku kushipokelela nangu kushicita." ²² Kabili ibumba lyonse lyalimiine Paulo na Sila; ba kapingula balilepawile amalaya yabo ukufuma kuli bena kabili balibapele ukulopolwa ku nkoto. ²³ Ulo ba bapumine amakofi ayengi, balibaposele na mu cifungo kabili baebele na kalinda wa cifungo ukubalinda mu bucingo ubwafikapo. ²⁴ Napanuma ya kupokelelai ci cipope, kalinda wa cifungo alibaposele mu cifungo ca mukati, kabili alikakilile na makasa yabo mu makusu. ²⁵ Na mu nshita ya bushiku pakati Paulo na Sila balikupepa no kwimba inyimbo kuli Lesa, kabili abafingwa banabo balikumfwa kuli bena. ²⁶ Na mukupumikisha kwalishile icinkukuma, ica kwebati ne mifula ya cifungo yalisunkene, kabili apopene iminshi yalisukile na kuli onse iminyololo yalikakulwike. ²⁷ Na kalinda wa cifungo alisantamwike ukufuma mutulo kabili alimwene iminshi ya cifungo ilisukile; alikulile ulupanga lwakwe ico alikufwaya ukuiipaya umwine, pantu alitontonkenye ukwebati abafungwa balibutukile. ²⁸ Lelo Paulo alibilikishe ne shiwi ilikalamba, ukwebati, "Wiicita cabubi we mwine, pantu bonse emo tuli." ²⁹ Kalinda wa cifungo alisanikile inyali no kubutukila mukati Kabili, alikututuma ku mwenso, aliwile pali Paulo na Sila, ³⁰ kabili alibafumishe panse no kwebati, "Mwe shikulu, kuti nacita shani pa kupusuka?" ³¹ Balimwebele ati, "Utetekele muli Shikulu Yesu, kabili webo ukapusuka, webo na ba ng'anda yobe." ³² Balishimike icebo ca kwa Shikulu kuli ena, pamo na onse uwali mu ng'anda yakwe. ³³ Kabili kalinda wa cifungo alibasendele mu nsa ilya ine iya bushiku , no kubasamba ifilonda fyabo, kabili ena na abo bonse aba mu ng'anda yakwe balibatishiwe apopene. ³⁴ Kabili ulo alikuleta Paulo na Sila pa mulu wa ng'anda yakwe kabili alibikile ne ifya kulya pali bena, alisekelele apakalamba pamo nabo aba mung'anda yakwe, ukwebati alitetekele Lesa. ³⁵ Nomba ulo bwacele ulucelo, ba kapingula balitumine akasebo ku balinshi, ukwebati, "Lekeni abo bantu balekuya." ³⁶ Kalinda alifishishe ifi fyebo kuli Paulo, ukwebati, "Ba kapingula balitumine akasebo kuli nebo ukwebati mileke mulekuya. Eco nomba iseni panse, no kuya mu mutende." ³⁷ Lelo Paulo alilandile kuli bena, "Balitumine pa lwalala ukwabula ukutulubulwisha, nangu caba ukwebati fwebo tuli bena Roma bakaya - kabili balituposele fwebo mu cifungo. Bushe nomba bakofwaya fwebo tulekuya mu nkama? Awe! Lekeni bena bese abene no kutufumya panse." ³⁸ Abalinshi balile kufisha ifi fyebo kuli bakapingula, kabili ulo baumfwile ukwebati Paulo na Sila bena Roma, baliketwe mwenso. ³⁹ Ba kapingula balishile kulomba ubwelelo kuli bena kabili balibaletele panse, ukubalomba ukuya ukufuma mu musumba. ⁴⁰ Kabili Paulo na Sila balile ukufuma mu cifungo kabili balishile ku ng'anda yakwe Ludya. Ulo Paulo na Sila bamwene baminyinane, bali bakoseleshe kabili nolu balifumine mu musumba.