¹ Awe cali ifyo fine mu Ikoniami Paulo na Barnaba baingile ca pamo mwi sunagoge lya ba Yuda no kulanda mu musango wakwebati ibumba ilikalamba ilya baYuda na baGriki balitetekele. ² Lelo abaYuda abalikukana ukumfwa basongelekenye imitima yabena fyalo no ku kulenga bena ukufulilwa ababwananyina. ³ Eco balikele kulya inshita iyitali no kulanda mu kushipa mu maka yakwa Shikulu, ilyo ena alikupela ubunte pa mbila ya kusenamina kwakwe. Acitile ifi ku fishibilo ne fipapusho ku minwe yakwa Paulo na Barnaba. ⁴ Lelo abantu ba mumusumba balyakanikemo; bambi bali kulubali lwa baYuda, bambi ku batumwa. ⁵ Bonse abenafyalo na baYuda (pamo pene ne ntungulushi shabo) balyeseshe ukubacusha no kubapola amabwe. ⁶ Nomba ulo baishibe ifi balibutukile ku mishi ya mu Lukonia, Lastra na Debe ne mpanga yashingulukako, ⁷ Eko batwalilile ukubile mbila nsuma. ⁸ Ku Lustra kwali umwaume umo, uwabulebe ku makasa, alilemene ukufuma munda muli nyina, talikwenda. ⁹ Uyu muntu alyumfwile paulo akolanda. Paulo ali tontele amenso pali ena nokumonamo icicetekelo cakundapwa. ¹⁰ Eco alandile kuli ena mwi shiwi ilikulu,''iminina na makasa yobe.'' Nolu muntu alitolawike no kwendaenda. ¹¹ Ulo ibumba lyamwene ifyo paulo acitile, balisanswile amashiwi, no kulanda mu chilimi ca ku Lukonia,'' imilungu yaisa kulifwebo mu cimpasho ca bantunse ''. ¹² Balitile Barnaba ''seusi'' na Paulo ''Hermesi'' pantu ewalikutungulula icebo. ¹³ Shimapepo wakwa seusi, uo itempele lyakwe lyali kunse ya musumba, baliletele ing'ombe iilume ne fikako fya maluba ku mpongolo; ena na mabumba balafwayo atukula ilambo. ¹⁴ Lelo ulo abatumwa, Barnabas na Paulo, baumfwile ifi, balilepawile amalaya yabo no kuya bwangu bwangu mwibumba, ukulila mukubilikisha ati, ¹⁵ Mukwai mwebantu, nindo mukocitila fi? Nafwe tuli bantunse, abali nga mwebo: Tuko mweba mbila nsuma ukweba ati mufume kuli ifi fintu ifyafye mupilibukile kuli lesa wa mweo, uwalengele umulu, isonde, na bemba, nafyonse ifyabamo. ¹⁶ Munkulo ishapita, alilekele inko shonse ukuya mumibele yashiko. ¹⁷ Lelo, nalo lwine tailekele fye ukwabula ubunte, pakweti alicitile fyabune noku mipela imfula ukufuma mu mulu ne nshita shakusombala ifisabo, no kwisusha mu mitima yenu ifyakulya nefya kusanksamusha,''. ¹⁸ Nalo lwine naya amashiwi, Paulo na Barnaba balifililwe ukukanya ibumba no ilyali kufwaya ukubepaila ilambo. ¹⁹ Lelo bamo abaYuda ukufuma ku Antioke na Ikoniami balishile kuntukawila ibumba. Balipolele paulo amabwe nokumukulila kunse yamusumba, ati alifwile. ²⁰ Lelo ulo abasambi bamushingulwike, alimine aingila na mu musumba. Ubushiku bwakonkelepo alile ku Derbe na Barnlaba. ²¹ Panuma yakubila imbila nsuma muli ulya musumba no kulenga abasamba abengi, Babwelele ku Lustra, ku Ikoniami, naku Antioke. ²² Balikukoseleshe imitima yabasambi no kuba konkomesha ukutwalilila mucicetekelo, nokubeba ati ''tuli no kwingila mu bufumu bwakwa lesa pakupita mu bucushi ubwingi.'' ²³ Awe ulo basontole abakalamba munkuta shonse, kabili bapepele Shikulu, uo batetekelemo. ²⁴ Elo bapitile mu Pisidia bafikile ku Pamfulia. ²⁵ Kabili ulo balindile icebo mu Perga, batentemukile ku Attalia. ²⁶ Ukufuma uku baile mu bwato ku Antioke, uko basekeshiwe ku kusenamina kwa kwa Lesa kuku bomba umulimo uwo bafikilishe. ²⁷ Ulo bafikile mu Antioke nokulonganika ulukuta capamo, balilondolwele fyonse ifyo lesa acitile pamo nabo, nefyo aiswileko icibi ca citetekelo kubena fyalo. ²⁸ Balikele inshita ntali na basambi.