¹ Nomba mu lukuta mu Antioke, mwali bakasesema bamo naba kafundisha. Bali Barnaba, Simeone (uukutwa Nigere), Luki waku Kurene, Manaene (uwalelelwe pamo na wabo Herode umu tetraki), na Sauli. ² Nomba lintu balikushinshimuna Shikulu no kufunga, Mupashi wa Mushilo alilandile ati, "Mpatwileniko Barnaba na Sauli, kukubombo mulimo untu nkobetila." ³ Panuma ya kufunga ukulya, balipepele, no kubika iminwe pali aba bantu, bali batumine ukuya. ⁴ Eco Barnaba na Sauli, pakutumwa ukupitila muli Mupashi wa Mushilo, balitentemukile ku Selukia, ukufuma uko baile mu bwato ku Kupro. ⁵ Lintu bali mu musumba wa Salami, bali bilile icebo cakwa Lesa mu masunagoge ya baYuda. Na Yohane ali nabo ewali kubafwilishako. ⁶ Lintu bapitene mu cishi conse ukufika ku Pafu, balisangileko uwa manga , umu Yuda kasesema wa bufI, uo ishina lyakwe balikumwita Bar - Yesu. ⁷ Uyu uwa manga aliku mulashi, Sergi Pauli, ali muntu uwa kucenjela. Uyu muntu alikutile Barnaba na Sauli, pantu alikufwaisha ukumfwa icebo cakwa Lesa. ⁸ Lelo Eluma ''uwa manga'' (ifi efyo ishina lyakwe likopilibulwa)ali kuba talika; ali kwesha mulashi ukufuma ku citetekelo. ⁹ Lelo Sauli, uukoitwa kabili Paulo, aliswilemo Mupashi wa Mushilo, ali mulolekeshe ¹⁰ kabili alilandile, "We mwana wa ciwa, uwa isulamo ubucenjeshi ubwamisango yonse no bubifi. Uli mulwani wa bulungami bwa misango yonse. Tawakaleke ukupondamika inshila shakololoka isha kwa Shikulu, bushe ukaleka? ¹¹ Nomba mona, ukuboko kwa kwa Shikulu kukoba pali webo. Ukosanguke mpofu. Tawakamonepo akasuba ku nshita." Apopene paliwilile pali Eluma kamfwa ne mfinshi; alitampile ukwendauka akofwayo uwa ku mutungulula ku ku boko . ¹² Panuma umulashi amona ifya citikile, alitetekele, pantu ali sungukile ku masambilisho ya pali Shikulu. ¹³ Nomba Paulo na ba nankwe balimine mu bwato ukufuma ku Pafu kabili balifikile ku Perga wa mu Pamfulia. Lelo Yohane alibashile kabili alibwelelemo ku Yerusalemu. ¹⁴ Paulo na ba nankwe balyendele ukufuma ku Perga no kufika ku Antioke wa mu Pisidia. uko kwine balingile mwi sunagoge pa bushiku bwe Sabata no kwikala panshi. ¹⁵ Panuma ya kubelenga mu malango na bakasesema, intungulushi ya mwi sunagoge bali batumine imilayi , ukwebati, ''Ba munyinane, umfwa mulikwetepo imbila ya ku koselesha abantu kuno, ilandeni.'' ¹⁶ Eco Paulo aiminine no kukapisha ku kuboko kwakwe; alilandile ati, ''Mwe baume bamu Israeli na mwebo mwebatina Lesa, kutikeni. ¹⁷ Lesa wa bena Israeli alisalile ba shifwe no kulenga abantu ukufulisha ulo baikele mu calo ca Egupti, no kuboko ukwa sumbulwa aliba fumishemo. ¹⁸ Pa myaka nalimo amakumi yane alibeleshenye na bena mu ciswebebe. ¹⁹ Panuma ya konaula inko cinelubali mu calo ca Kanani, alipele abantu besu icalo cabo nge ca bupyani. ²⁰ Ifi fyonse ifintu fyalicitike pa myaka ukicila 450. Panuma ya ifi fintu fyonse, Lesa alibapele bakapingula ukufika kuli Samwele kasesema. ²¹ Nolu abantu balilombele mfumu, na Lesa alibapele Sauli umwana mwaume wa kwa Kishi, umwaume wa mu mukowa wa kwa Benyamini, ukuba imfumu pa myaka amakumi yane. ²² Panuma Lesa alimufumishe pa bufumu, alimishe Dabidi ukuba imfumu yabo. Ni pali Dabidi epo Lesa akomaile, ukulanda ati, ndisangile Dabidi umwana mwaume wa kwa Yese umuntu uwaba pa mutima wandi, uucita conse ico nkofwaya ena ukucita.' ²³ Ukufuma mu bufyashi bwa uyu muntu Lesa alileta kuli Israeli Umupusushi, Yesu, ngefyo alikulaya ukucita. ²⁴ Lintu Yesu talafika, Yohane alikubila ulubatisho lwakulapila ku bena Isreali bonse. ²⁵ Lintu Yohane alikupwisha umulimo wakwe, alilandile ati, 'Bushe mukotontonkanya nine nani? Tenebo. Lelo kutikeni, umo akoisa panuma yandi, uyo indyato sha makasa yakwe nshingaba uwakulinga ukukakula.' ²⁶ Ba munyinane, abana ba mu bufyashi bwakwa Abrahamu, na pali mwebo bonse abatina Lesa, ni kuli fwebo uko imbila ya pusukilo yatumwa. ²⁷ Pantu abo abekala mu Yerusalemu na ba kateka babo taba mwishibe, kabili elintu bafikilishe amashiwi ya ba kasesema aya kobelengwa cila Sabata mu kumuseka. ²⁸ Nangula tabasangile umulandu waku mupingwilo kufwa, bali kweba Pilato ati amwipaye. ²⁹ Ulo bakopwishafye ifintu fyonse ifyalembelwe pali ena, bamutentemwine pa ci muti no kumulalika mu nshishi. ³⁰ Lelo Lesa alimubushishe ku bafwa. ³¹ Alimonekele inshiku ishingi kuli abo abafumine na ena ku Galili ukulola ku Yerusalemu. Aba bantu nomba ni ba kamboni bakwe ku bantu. ³² Eco tukomweba imbila nsuma: Icilayo ico caishile ukufuma kuli bashifwe. ³³ Lesa alifikilisha kuli fwebo, fwe bana babo, pakubusha Yesu. Ngefyo calembwa mu malumbo icipandwa cha bubili: 'Uli Mwana wandi, Lelo ndisangukile Wiso.' ³⁴ Lelo palwa ku mubusha ku bafwa, no kukana bwekelako, Lesa akolanda muli iyi nshila; "Nkokupela amapalo ya mushilo kabili aya cine ayalailwe kuli Dabidi." ³⁵ Emulandu wine akolandila mu malumbo na yambi, 'Tamwasuminishe uwa Mushilo Wenu ukubola.' ³⁶ Pantu lintu Dabidi apyungile ukufwaya kwa kwa Lesa mu nkulo yakwe, alilele utwamfwa; alibikile pamo na bawishi no mubili wakwe wali bolele. ³⁷ Lelo untu Lesa abushishe tamwene ukubola. ³⁸ Eco lekeni cishibikwe kuli mwebo, ba munyinafwe, ukwebati muli uyu muntu ukwelelwa kwa membu emo kubililwa kuli mwebo. Amalango yakwa Mose yalifililwe ukumilenga abakulungama. ³⁹ Lelo muli uyu umuntu Lesa alalenga onse uwatetekela uwa kulungama. ⁴⁰ Eco kanshi cenjeleni ukwebati icintu ico bakasesema balandilepo taciponene pali mwebo. ⁴¹ "Lolesheni, mwebo mwe basusha, kabili papeni no konaike; Pantu nkocito mulimo mu nshiku shenu, umulimo uyo tamwakatale amusumina, nangula umo enga mubilila."' ⁴² Lintu Paulo na Barnaba baile, abantu balikubapapata ukwebati bengalanda ifyebo fimo fine pe Sabata lyakukonkapo. ⁴³ Ulo kulongana kwa mu sunagoge kwapwile, aba Yuda abengi ne nsangu ishishinshimuna balikonkele Paulo na Barnaba, abalikulanda kuli bena no kubakonkomesha ukwikalilila mu kusenamina kwa kwa Lesa. ⁴⁴ Pe Sabata lya konkelepo, nicikangafye umusumba onse walikolongene pamo mukumfwa icebo cakwa Shikulu. ⁴⁵ Lintu aba Yuda bamwene amabumba, baliswilemo akalumwa no kupililika amashiwi yalikulanda Paulo no kumutuka. ⁴⁶ Lelo Paulo na Barnaba balilandile mukupama ati, "Cali icayana ukwebati icebo cakwa Lesa cibale cibilwe kuli mwebo. Camoneka kubati mukocisunka ukufuma kuli mwebene no kuilinga abashi yene umweo wa muyaya, moneni, tukoya ku Bena fyalo. ⁴⁷ Pantu efyo Shikulu akotweba, ukweba ati, "Ndi musontele ukuba ulubuto ku Bena fyalo, ukwebati mwingaleta ipusukilo ku mpela ye sonde."' ⁴⁸ Lintu Abena fyalo baumfwile ifi, balisansamukile kabili balitotele cebo cakwa Shikulu. Abo bonse abalikusontwa ku mweo wa muyayaya balisumine. ⁴⁹ Icebo cakwa Shikulu calisalangene mu citungu conse. ⁵⁰ Lelo aba Yuda ba songeleshe abanakashi abakankala abashinshimuna na baume bakalamba mu mushi. Balimishe ukupakaswa pali Paulo na Barnaba no ku bafumya mu citungu cabo. ⁵¹ Lelo Paulo na Barnaba ba kuntile ulukungu ku makasa yabo mu kubasusha. Nolu balile ku musumba wa Ikonia. ⁵² Na basambi baliswilemo ne nsansa no Mupashi wa Mushilo.