¹ Nomba pali ilya nshita Herode imfumu alibikile amaboko pali bamo aba mu lukuta ukwebati enga bacusha. ² Alipeye Yakobo munyina wakwa Yohane ku lupanga. ³ Panuma ulo amwene kwebati calisekeshe aba Yuda, alikonkenyepo ukwikata Petero nankwe. Ulo cali ni mu nshiku sha mukate utatutumuka. ⁴ Panuma ulo ba mwikete. alimubikile mu cifungo, ku mabumba yane ayaba shilika eko amupele ukulindwa; alikupanga ukumuleta ku bantu panuma ya Cakucilila. ⁵ Petero balimusungilwe mu cifungo, lelo amapepo yalipelwe kuli Lesa kuba lukuta mukukonkanya. ⁶ Pa nshita ya bushiku ulo Herode talamuleta mukulubulula, Petero alilele pakati ka ba shilika babili, ninshi alikakilwe mu minyololo, lintu naba kalinda pa mulola wa mwinshi wa cifungo bakolinda. ⁷ Moneni, malaika wa kwa Shikulu mukupumikisha alimonekele pali ena, kabili ulubuto lwalisanika mu kamuputule ka cifungo. alyumine Petero mulubafu kabili ali mubushishe no kumweba ati, "Ima bwangu," Kabili iminyololo yaliponene ukufuma kumaboko yakwe. ⁸ Malaika alimwebele ati, "Kako mushipi obe kabili fwala ne ndiato. "Petero alicitile fyo fine. Malaika alimwebele ati, "Fwala ne laya lyobe ilyakunse kabili unkoka." ⁹ Petero alikonkele malaika kabili alifumine panse. Taishibe ukwebati ifyo malaika alikucita fya kubutuntulu. Alikutontonkanya ati akomona icimomwa. ¹⁰ Panuma bapita pali kalinda wa ntanshi no wa cibili, balishile ku cibi ca cela icalola mu musumba; calibesukile icine. Balifumine kabili alimushile apopene. ¹¹ Lintu Petero akutuluka, alilandile ati, "Nomba ndishibile mucine ukwebati Shikulu alitumine malaika wakwe no ku ndubula ukufuma mu minwe ya kwa Herode, no kufuma kuli fyonse ifyo aba Yuda balikufwaya ficitike. ¹² "Lintu aishibe fi. alile ku ng'anda ya kwa Maria nyina wakwa Yohane, kabili uwitwa Marko, uko abantu abengi balongene kabili balikupepa. ¹³ Ulo akonkosha pa mwinshi wa mpongolo, umukashana umumbofi uwalikwitwa Roda alishile mukwasuka. ¹⁴ Lintu aishiba kwebati lishiwi lyakwa Petero, alyumfwile nsansa icakwebati alifililwe no kwisulako ku mpongolo, na pali ci alile akobutuka mu muputule, alibebele ati Petero aliminine pa mwinshi. ¹⁵ Balimwebele ati, "Ulifulungene."Lelo alimpampaminepo ukwebati eo. Bena ekweba ati, "Ni malaika wakwe." ¹⁶ Lelo Petero alikonkenyepo ukukonkonsha, kabili ulo baisulako ku cibi, balimumwene kabili balipapile. ¹⁷ Petero alibakapishe ku kuboko ukwebati babe tondolo no kubeba ifyo Shikulu amufumishe mu cifungo. Alibebele ati, "Kafisheni fi fintu kuli Yakobo na bamunyinane." Nolu alifumineko kabili alile ku ncende imbi. ¹⁸ Nomba lintu kwabuta, takwali kanono pafyalubene mu bashilika pamulanda wa fyacitikile Petero. ¹⁹ Panuma Herode amufwailisha lelo tamusangile, alipwishe ba kalinda no ku bapingwila ukufwa. Nolu Herode alitentemukile ukufuma ku Yudea ukwisa ku Kaesarea kabili alikele kulya. ²⁰ Nomba Herode alifulilwe abantu ba ku Turi na Sidone. Balile kuli ena no buyo bumo, na panuma bapapatile Blasti, kangalila wa mfumu, ukuti abafwilishe, balipwishe palwa mutende pantu icalo cabo alikupokelela ifilyo ukufuma mu calo ca mfumu. ²¹ Pa bushiku ubwasontelwe Herode alifwele amalaya ya bufumu kabili alikele pa cipuna ca bufumu, alilandile amashiwi ku bantu. ²² Abantu balibilikishe, "Ili lishiwi lya mulungu, te lya muntu!" ²³ Apopene malaika wakwa Shikulu ali munine, Pantu tapele bukata kuli Lesa, balimulile ku mititi kabili alifwile. ²⁴ Lelo ishiwi lya kwa Lesa lyalile lilakula no ku sanduluka. ²⁵ Eco ulo Barnaba na Sauli bapwile milimo yabo balibwelele ukufuma ku Yerusalemu, amalembo yakale sana yali kubelengwe fi, balibwelele ku Yerusalemu, baliletele nabo Yohane, kabili uwitwa Marko.