¹ Nomba mwali umuntu mu musumba wa Kaisarea, uwe shina lya Korneli, mushika wa mpuka ya cina Italia. ² Ali ni kapepa, uutina Lesa na bonse aba nga'nda yakwe, alepelesha nefya nkumbu ku bantu, kabili alikupepa kuli Lesa no mukosha. ³ Na pa nsa iyakulenga pabula mu kasuba, alimwene bwino bwino mu cimonwa mulimo malaika wakwa Lesa akoisa kuli ena. Malaika alilandile kuli ena, "Korneli!" ⁴ Korneli atontele amenso kuli malaika kabili alitinine no kwasuka ati, "Cinshi mukwai, shikulu?" Malaika alilandile kuli ena, "Amapepo yobe nefya nkumbu fyobe filininike ku mulu kubati cibukisho ku cinso cakwa Lesa. ⁵ Nomba tuma abantu ku musumba wa Yopa bese no muntu we shina lya Simone uwitwa Petero. ⁶ Akoikala na kanuka wa mpampa uwitwa Simone, Inga'nda yakwe ili mululamba lwa bemba." ⁷ Ulo malaika uwalikulanda nankwe afuminepo, Korneli alikutile babili aba mubabomfi ba mu nga'nda yakwe, no mushilika uwali kapepa mu mpuka ya balikumubombela. ⁸ Korneli alibebele fyonse ifyacitike no kubatuma ku Yopa. ⁹ Nomba ubushiku bwakonkelepo ne nsa iyakulenga mutanda, ilyo bali pa bulendo kabili bakopalama ku musumba, Petero alininine pa nga'nda ya pamulu mu kupepa. ¹⁰ Kabili alyumfwile insala no kufwaya ukulya, lelo ilintu abantu bali bakoipika ifya kulya, alikwete icimonwa, ¹¹ No kumona umulu waisuka ne cipe cikoikila kubati cisalu icikulu cikoikila panshi cilikwete ififutu fine. ¹² Muli ico mwali misango yonse ya nama sha molu yane ne fikulika panshi ne fyuni fya mu mulu. ¹³ Nolu kwalishile ishiwi kuli ena ati: Ima, Petero, ipaya no kulya." ¹⁴ Lelo Petero alilandile ati, "Teco, mwe Shikulu, pantu nshatala ndya icinangwa conse nangu icakukowela." ¹⁵ Lelo ishiwi lyalishile kuli ena umuku wakulenga bubili: "ifyo Lesa asangulwile wieba ati cinangwa." ¹⁶ Ici cacitikile imiku itatu; nolu icipe calisendelwe mu mulu. ¹⁷ Nomba lintu Petero ali napeshiwa amano pa cimonwa amwene nomo calolele, moneni, abantu abatuminwe kuli Korneli baliminine pa mpongolo, panuma yakwipusha inshila ya ku nga'nda. ¹⁸ Balibilikishe no kwipusha nga cakuti Simone, uwitwa Petero alikwikala palya. ¹⁹ Lintu Petero, alikutontonkanya pa cimonwa, Mupashi alimwebele, "Mona, abantu ba tatu bakokufwaya. ²⁰ Ima utentemuke no kuya nabo. Wishinga shinga ukuya nabo, pantu ndibatumine." ²¹ Eco Petero alitetemukile ku bantu no kulanda, "Ninebo mukofwaya findo mwaishila?" ²² Balandile, " Mushika uwitwa Korneli, umuntu umulungami kabili uutina Lesa, kabili ulandilwe fyabune ku luko lonse ulwa bena Yuda, alipelwe imbila ukufuma kuli Lesa ukupitila muli malaika wa mushilo no kumweba ukutumwa kuli mwebo ukwisa ku nga'nda yakwe pakwebati omfwe icebo ukufuma kuli mwebo." ²³ Eco Petero alibetile ukwingila no kwikala nabo. Ulucelo lwakonkelepo alimine kabili alile nabo na bamo ba munyina ukufuma ku Yopa balimushindike. ²⁴ Ubushiku bwakonkelepo balingile mu Kaisarea. Korneli alikubalolela; alikutile bonse balupwa ne fibusa. ²⁵ Calishile kuba ati lintu Petero aingile, Korneli alimukumenye no kuwila pa nkasa shakwe no ku mushinshimuna. ²⁶ Lelo Petero alimwimishe, no kulanda ati, "Ima! nanebo ndi muntu." ²⁷ Lintu Petero alikulanda nankwe, alingile mukati kabili alisangile abantu abengi balilongene. ²⁸ Alilandile kuli bena, "Mwebo mwebene mwalishiba ukwebati tacasuminishiwa umu Yuda ukupalamana nangula ukutandalila umwina fyalo. Lelo Lesa alindangile ukwebati nshifwile ukwita uli onse icinangwa nangu icakukowela. ²⁹ Emulandu wine njishile ukwabula ukukana, ulo nakutilwe. Eco nkomwipusha mulandu nshi mwanjitile." ³⁰ Korneli alyasukile, "Papite inshiku shine, nalimukupepa munga'nda yandi pa nsa yakulenga pabula; kabili nalimwene umuntu aliminine ukulungatana nandibo alifwele ifyakubuta. ³¹ Alilandile Korneli amapepo yobe yalyumfwikile kuli Lesa, kabili nefya nkumbu fyobe filibukishe Lesa palwa webo. ³² Eco tumako umo ku Yopa, akwitileko umuntu wainikwa Simone uwitwa Petero. Aikala mu nga'nda yakwa kanuka wa mpanga uwe shina lya Simone, mululamba lwa bemba.' ³³ Eco apo pene nalitumine kuli mwebo. Na mwebo mwawamya pakwisa. Eco nomba tulikumene bonse pamo pa cinso cakwa Lesa ukulanda ati tumwe fyonse ifyo mutungulwile kuli Shikulu ukulanda." ³⁴ Elo Petero alyasamwine akanwa no kulanda ati, "Icine cine naishiba ukwebati Lesa taba na kapatulula. ³⁵ Lelo, muluko lonse onse uukomutina kabili uucite milimo ya kulungama alipokelelwe kuli ena. ³⁶ Ulishibe mbila iyo atumine ku bantu bakwa Israel, ulo abilile mbila nsuma pa mutende muli Yesu Kristu, uuli Shikulu wa bonse - ³⁷ mwebo bonse mwalishiba ifyacitikile mu ncende yonse iya Yudea, ukutendekela mu Galili, panuma ya lubatisho ulo Yohane abilile. ³⁸ Yesu waku Nasalete, ifyo Lesa amusubile no Mupashi wa Mushilo na maka. Alyendawike ukubomba umulimo wa bune no kuposha bonse abatitikishiwe na kasebanya, ico Lesa ali nankwe. ³⁹ Nafwebo tuli ba kambone ba ifi fintu ifyo Yesu acitile, monse mu calo ca ba Yudea na mu Yerusalemu. Balimwipeye, pakumutanika pa ci muti. ⁴⁰ Lelo Lesa alimubushishe pa bushiku bwakulenga shitatu no kumulenga ukumoneka, ⁴¹ teku bantu bonse, lelo ni kuli bakambone abasontelwe kabela kuli Lesa - nifwe fwe balikulya no kunwa panuma ya kubuka kwakwe ku bafwa. ⁴² Kabili alitunkonkomeshe ukubila ku bantu no kushimikisho ukweba ati uyu ewasalwa kuli Lesa ukuba kapingula wa ba mweo na bafwa. ⁴³ Nikuli ena bakasesema bonse bashimika ukwebati onse uwa mutetekela akapokelela ukwelelwa kwa membu mwi shina lyakwe." ⁴⁴ Lintu Petero ali akolanda ifi fintu, Mupashi wa Mushilo aliwilile pali bonse abali kumfwe mbila. ⁴⁵ Abena kusembululwa abatetekele - na bonse abaishile na Petero balipapile, pantu ica bupe ca Mupashi wa Mushilo calipongolweke napa bena Fyalo. ⁴⁶ Ico balibomfwile bakolandila mu ndimi shimbi no ku lumbanya Lesa. Nolu Petero alibasukile, ⁴⁷ "Bushe kuli umo uwingakanya aba bantu ukukana batishiwa, aba bantu abapokelela Mupashi wa Mushilo pamo na fwebo bene?" ⁴⁸ Nolu ali bakonkomeshe ukwebati nabo babatishiwe mwi shina lyakwa Yesu Kristu. Nolu balimwipwishe ukwebati ekale nabo inshiku na shimbi.