¹ Yahweh aebele Mose na Aroni, alandile, ² "Landeni kubantu mu Israele, ati, 'Ifi efintu ifyamweo panama shonse ishapacalo ifyo mulingile ukulya. ³ Mulelya inama ishapanduka amabondo elyo neshibukula ifyakulya. ⁴ Lelo, kuli inama shimo ishishibukula nangula ishapanduka ifibondo, isho mwilalya, inama ishili nga ingamali, pamulandu shena shilabukula ifyakulya nomba tashapanduka amabondo. Eico ingamali yalikowela kuli mwebo. ⁵ Pamo na pati, pantu naena alabukula ifyakulya, nomba tapanduka fibondo, naena alikowela kuli mwebo. ⁶ Kalulu, pantu naena alabukula ifyakulya, nomba tapanduka ifibondo, naena alikowela kuli mwebo. ⁷ Inkumba nayena, nangula yali panduka ifibondo, nomba taibukula ifyakulya, yalikowela kuli mwebo. ⁸ Tamufwile ukulyako umunani, nangula ukwikata kufitumbi. Shena shalikowela kuli mwebo. ⁹ Kunama ishamweo ishikala mumenshi mulelyako shonse ishakwata utulebelebe neshakwata amapalo, nangu shamuli bemba nangu mutumana. ¹⁰ Lelo conse icamweo icishikwete utulebelebe nangula amapalo icamuli cimana cikalamba nangula mutumana, ukubikapofye nafyonse ifikulika pamenshi nangula ifya mweo fyonse ifya mumenshi-fyena ifi muletalukako. ¹¹ Pamulandu fyalikoweshiwa, mwilalyako umunofu wafiko; nangu, ukwikatako kufitumbi ifyafiko. ¹² Icintu conse icikala mumenshi icishakwata tulebelebe namapalo cena muletalukako. ¹³ Ifi efyoni mulingile ukutalukako no kukanalya: kapumpe, ikubi, ¹⁴ akambasa nabapungwa abali bonse, ¹⁵ nabamwankole bamitundu yonse, ¹⁶ imbuni, akambasa, isela, nenkoshi shamitundu yonse. ¹⁷ Talukeni pamo nakukapululu kanono nakufipululu ifikulu, inondo, ¹⁸ icipululu ica buuta nekubi, nacembe, ¹⁹ icipansankola, ne mitundu yankola yonse, pupute elyo nakansuswa. ²⁰ Kabili kufishishi fyonse ifipupuka nokwendela kumolu yane fyena mwebo muletalukako. ²¹ Kwena ekofili ifishishi efyo mwingalya ifipupuka ifyakwata amolu yane ifyalundinkana amapingu ayakutolokela pa mushili. ²² Kuti mwalya ifipaso pamo nga, makanta, inyense, neinshonkonono. ²³ Lelo utushishi tonse utwakwata amolu yane mwebo muletalukako. ²⁴ Nga mwaikatako kufitumbi mukalaba abakowela mpaka ukufika icungulo. ²⁵ Kabili uyo onse uuwasenda icitumbi afwile awasha ifyakufwala fyakwe nokubelelela uwakowela mpaka ukufika icungulo. ²⁶ Kabili inama shonse ishapanduka ifibondo ukwabula ukupwililika ukwakanika nangula ishishibukula ifyakulya shintu shakowela kuli mwebo. Eico uli onse uwaikatako akaba uwakowela. ²⁷ Muli ishi nama shonse ishakwata ifisansala ishendela kumolu yane, isho shintu shakowela kuli mwebo. Eico uyo onse uwaikatakofye kucitumbi akaba uwakowela ukufika necungulo. ²⁸ Kabili uyo onse uwasenda ifitumbi uwashe insalu kabili ali nokuba uwakowela mpaka ukufika icungulo. Ishinama shaba ishakowela kuli mwebo. ²⁹ Kunama shonse ishenda pamushili, ishi enama ishaba ishakowela kuli mwebo: imfuko, impuku, nembulu shonse mumitundu nemitundu, ³⁰ kolokombwa, insamba, malinso, imbulu, nalumfunyemba. ³¹ Kunama shonse ishikulika, ishi enama ishakowela kuli mwebo. Uyo onse uwaikatako kucafwa alimukuba uwakowela mpaka ukufika icungulo. ³² Ngacimo pali ifi cafwa caponena pali cimo, ico cintu cibe icakowela, cibe cintu capangwa kucimuti, insalu, kumukupo nangula cakumasako. Nangu apo cikele nangu apo ailebomba, cifwile cabikwa mumenshi; cikaba icakowela mpaka ukufika icungulo. Elyo cikaba icasanguluka. ³³ Lelo cimo panama ishakowela nga yaponena kucipe nangu mucipe icebumba, ninshi fyonse ifilimo nafyo fine fyakowela, neco cipe cakutobafye. ³⁴ Icakulya conse icikwetemo amenshi ayafumine mucipe ico cintu cakowela. Ne cakunwa conse icafumamo muli ico cipe naco cintu cakowela. ³⁵ Ponsefye apo ifitumbi fyaponena napo pene ninshi pakowela; pabenipa conto napamo nipa mbabula, fifwile ukufitoba fyonse. Pantu fyaba ifyakowela kabili filimukuba ifyakowela kuli mwebo. ³⁶ Lelo akamfukumfuku kamenshi kena nangu icishima apakutapa amenshi fyena fikaba ifyasanguluka; nomba uyo onse uwaikata kufimbi ena ninshi akowela. ³⁷ Nga cakutila icitumbi caponena pambuto shakubyala shena shilebafye ishasanguluka. ³⁸ Lelo ngacakutila imbuto muli amenshi, elyo paponena icitumbi, ifyo fyaba ifyakowela kuli mwebo. ³⁹ Inama imo pasho mulya ngayafwa, uyo onse uwaikatako ku citumbi ena ninshi akowela mpaka ukufika necungulo. ⁴⁰ Uyo onse uwalyako kucaifwila ali nokuwasha insalu shakwe kabili alinokuba uwakowela mpaka ukufika icungulo. Noyo onse uwasenda icitumbi afwile ukuwasha insalu shakwe nokuba uwakowela mpaka ukufika icungolo. ⁴¹ Inama shonse ishikulika pamushili shena muletalukako; shena teshakulyako. ⁴² Kuli conse icikulikila palufumo, nangufye icendala kumolu yane, nangu icakwata amolu ayengi-inama shonse ishikulika pamushili, ifi mwilalya, fintu fyakowela kuli mwebo. ⁴³ Mwilaikowesha mwebene kuli ifi fintu fyamweo ifikulika; mwiilenga ukuba abakowela kuli ifi fintu, nangu fyena ukumikowesha. ⁴⁴ Ninebo Yahweh Lesa wenu. Eico isungeni mwebene nokuba abamushilo, eico, mube abamushilo, pantu nebo ndiwamushilo, kabili mwilaikowesha mwebene kukulya icikulika conse pamushili. ⁴⁵ Ninebo Yahweh, newamifumishe mucalo ca Egupito, mukuba Lesa wenu. Eico kanshi beni abamushilo, pantu nanebo ndiwamushilo. ⁴⁶ Aya emafunde ayakukonka palwa nama, ifyoni, kufyamweo fyonse ifikala mumenshi, ⁴⁷ nakufibumbwa ifikulika pamulundu, eico mulelekanya pafintu ifyakowela nefishakowela, napakati kafintu ifyamweo ifiwa pakati kafintu ifyamweo ifishiliwa.