¹ Yawe aebele Mose ukuti, ² “Konkomesha abena Israeli ukulatamfya umuntu onse mu nkambi uwalwala ubulwele bonse ubwambukila pa nkanda, nangu uo umubili wakwe upompa amafina mu musangofye onse, nangu umuntu onse uwakowela mukukumya ku citumbi ca muntu. ³ Muletamfya aba bantu bonse abakowela abaume na banakashi mu nkambi, epakuti belakowesha nkambi yabo, umo ine njikala pakati kenu.” ⁴ Abena Israeli balyumfwilile no kutamfya bonse abakowela ukufuma pa nkambi. Bacitilefye umo mwine Yawe akonkomeshe Mose. ⁵ Yawe aebele Mose ati, ⁶ “Eba abena Israeli ukuti, umwaume nangu umwanakashi onse nga abifya ku mubiye mu nshila iyili yonse pakukanaba uwacine kuli ine ne Yawe, ala ninshi aba no mulandu kuli ine. ⁷ Uyu muntu afwile ukuyebelela no kufuta pa bubifi acitile. Afwile kabili alundepo cimo ica pali fisano pali ifyo alefuta ifyakupeela umuntu abifishe. ⁸ Lelo uyo muntu babifishe nga cakuti afwa elyo takwete ba lupwa bakufutako, ninshi umuntu uwabifya ali nokufuta kuli Yawe, ali nokupeela icakufuta kuli shimapepo, pamo pene na sukusuku uwakuleka ilambo lyakufuta pa fibi fyakwe. ⁹ Onse umutuulo wamushilo untu abena Israeli baleta kuli shimapepo wakulaba wakwe. ¹⁰ Ifyabupe fyamushilo fyonse ifyo umuntu atuula fyakwe, nomba ifyo apeela shimapepo fyena fyakwa shimapepo.” ¹¹ Elyo Yawe aebele Mose ati, ¹² “Landa ku bena Israeli no kubeba ukuti ngo mwanakashi apondokela umulume wakwe no kukanaba uwacishinka, ¹³ alala no mwaume umbi mu bumfisolo, kabili ifyo acita tafishibikwe ku mulume, no kukowela kwakwe takwishibikwe ico kushali bakambone abamusangilishe, ¹⁴ nga cakuti umwaume aikatwa no bufuba, alatunganya no mukashi, elyo kabili caba icacine nangu limbi tecacine tabembuka, ¹⁵ kanshi umwaume uyo ali nokutwala umukashi wakwe kuli shimapepo. Pakuya kuli shimapepo, ali nokusenda ubunga bwa mutuulo bwa bale icapekumi cimo ca ku cipimo ca efa, ubwa pa mulandu wa mukashi. Lelo tafwile ukwitilapo amafuta nangu ukubikapo icinyamuti ca fulankinisenshi icanunka ubusaka pa bunga, pantu mutuulo wa cabunga uwa mulandu wa bufuba kabili mutuulo wa cabunga uwa cibukisho pakuti icishinka cishibikwe. ¹⁶ “Shimapepo nao ali nokubuula uyu mwanakashi no kumwiminika pa cinso cakwa Yawe. ¹⁷ Elyo shimapepo akabuule amenshi yamushilo no kuyabika mu mutondo we bumba, kabili akabikemo no lukungu lwa mukati ke Tenti lyakwa Lesa. ¹⁸ Ilyo shimapepo aiminika umwanakashi pa cinso cakwa Yawe, ali nokukakula umushishi wa uyo mwanakashi, no kubika ubunga bwa mutuulo bwa cibukisho mu minwe ekate, ekutila umutuulo wa cabunga wa pa bufuba. Shimapepo nao ninshi naikata ulunweno lwa menshi ayakantuka ayaleta ukulapishiwa. ¹⁹ Elyo shimapepo akalenga umwanakashi ukulapa nokutila kuli ena, ‘Iwe nga cakuti tawapondweke no mwaume umbi talala nobe, nga tawabembwike no kuikowesha ilyo waliba no mulume obe, aya menshi ayakantuka ayaleta ukulapishiwa tayakuletele ubwafya nangu bumo. ²⁰ Lelo, nga walipondoka walala no mwaume umbi no kuikowesha ilyo waliba no mulume obe, Yawe nalenge abantu bonse bakulapishe no kukuseluka. ²¹ Nalenge icisa cabufyashi cobe cisalwe ne fumo lyobe lifimbe. ²² Amenshi aya ayaleta ukulapishiwa nayengile mu mubili obe, ne fumo lyobe lifimbe ne cisa cabufyashi cobe cisalwe.’ Umwanakashi nao pakwasuka atile, ‘Ameni, cibe ifyo fine.’ ²³ “Elyo shimapepo afwile ukulemba ishi ntipu mu citabo icipombwa, kabili akasambile amalembo alembele mu menshi ayakantuka. ²⁴ Shimapepo akapeela umwanakashi amenshi yakantuka ayaleta ukulapishiwa, nayo yakamuletele ukukalipwa munda nganshi. ²⁵ Shimapepo ali nokupoka ubunga ku mwanakashi ubwa mutuulo wa bufuba, abutambike kuli Yawe no kubuleta ku bulambo. ²⁶ Elyo abuulepo ulupi lumo ulwa bunga ngo mutuulo wacibukisho no kubocela pa bulambo, panuma ya ifi aleke umwanakashi anwe amenshi. ²⁷ Nga cakuti aliikowesha no kukanaba uwacishinka nga anwa amenshi ayaleta ukulapishiwa, lyena yakamulenga ukukalipwa nganshi, ifumo lyakwe likafimba ne cisa cakwe cikesalika. Uyu mwanakashi akaba uwalapishiwa mu bantu bakwe. ²⁸ Nomba nga cakuti uyu mwanakashi wakaele, no kuikowesha taikowesha, amenshi tayali nakumucita nangu kamo, cikalangwa ukuti wakaele, akafyala na bana. ²⁹ kuikowesha ilyo aba no mulume, ³⁰ nangu umwaume alatunganya umukashi wakwe no kuba no bufuba. Umwanakashi ali nokwimikwa pa cinso cakwa Yawe, na shimapepo ali nokucita kuli ena fyonse ukulingana ne funde ili line. ³¹ Umwaume tali nakukwata mulandu nangu panono, nomba umwanakashi nga euli no mulandu wa bubifi, ena alingile ukukandwa pa bubifi. ena alingile ukukandwa pa bubifi bwakwe.”