¹ Elyo Yawe aebele Mose ati, ² “Landa ku bena Israeli no kubeba ukuti, umwaume nangu umwanakashi onse nga apanga icilayo icakuipatwila kuli Yawe ngo Munasiliti, afwile ukuleka ukunwa ubwalwa bwa mwangashi ne cakunwa conse icikola. Elanwa icakunwa nangu cimo icakantuka icakamwa ku myangashi nangu icikola ca fintu fimbi. ³ Tafwile kunwa icakunwa ca fitwalo fya myangashi nangu kulya imyangashi iyauma nangu iyishauma. ⁴ Apofye acili Munasiliti, talingile kulya icili conse icafuma ku mwangashi, inseke nangufye ifipapa. ⁵ “Uyu muntu pa nshiku shonsefye isha cilayo cakwe icakuipatula, tafwile ukubeya ku mutwe, umushishi nangu imyefu. Afwile ukuba wamushilo mpaka inshiku alaile ishakuipatwila kuli Yawe shapwa. Alingile ukuleka umushishi ne myefu yakwe yalakulafye. ⁶ Inshita yonse iyo aipatwila kuli Yawe tali nakupalama ku citumbi ca muntu. ⁷ Nangufye cakwa wishi nangu nyina, nangu indume yakwe nangu inkashi yakwe nga ebafwile, tafwile kuikowesha pa mulandu wabo. ⁸ Pantu icishibilo cakumwishibilako ukuti aliipatwila kuli Lesa caba pa mutwe wakwe. Yonse inshita iyo ailubwila kuli Yawe aba uwamushilo. ⁹ “Kabili nga cakuti umuntu afwa imfwa yakupumikishafye pa menso ya Munasiliti, ninshi umushishi alubwila kuli Yawe wakowela. Alingile ukubeya umushishi ne myefu pa bushiku bwalenga cine lubali bwa kusangulula kwakwe. ¹⁰ Elyo pa bushiku bwalenga cine konse konse ali nokuleta utubondo twa nkunda tubili nangu utupele tubili kuli shimapepo pa mwinshi we Tenti Lyakukumaninamo. ¹¹ Shimapepo nao ali nokuleka kamo ngo mutuulo wakwelelwa pa fyabubifi, elyo kambi nako ilambo lyakoca pakufuta pa fyabubifi fyakwe, pantu alikowela pakuba apali icitumbi ca muntu. Pali bulya bushiku bwine, ali nokusangulula umushishi wakwe nakabili. ¹² Afwile ailubwila umwine kuli Yawe inshita yonse ilya aipatula, kabili afwile ukuleta na kana ka mpaanga akalume aka mwaka umo aka mutuulo wakufuta pa fyabubifi. Inshiku aipatwile kale tashakabe nelyo cimo pantu aisa kowela panuma yakuipatula. ¹³ “Nomba ili e funde lyakukonka Umunasiliti inshita yakwe iyakuipatwila nga yapwa. Bafwile ukumuleta pa mwinshi we Tenti Lyakukumaninamo. ¹⁴ Palya epo ali nokupeelela imituulo yakwe iyi kuli Yawe: Akana ka mpaanga akalume aka mwaka umo akabula akalema akakuleka ilambo lyakoca, akana ka mpaanga akakota aka mwaka umo akabula ubulema aka mutuulo wakwelelwa pa bubifi, elyo na sukusuku umo uwabula ubulema uwakutuula umutuulo wakwampana pamo. ¹⁵ Alundepo umutuulo wa cabunga no wa cakunwa, umuseke umo uwa mikate yabulamo intutumushi, no tumikate twapangwa ku bunga bwa ŋanu ubwapeleka bwino ubwasanshiwamo na mafuta ya miolifa, elyo no tumikate twapapatala utwasubwako amafuta ya miolifa, pamo no mutuulo wa cabunga no wa cakunwa. ¹⁶ “Shimapepo ali nokutuula fyonse ifi pa cinso cakwa Yawe kabili atuulile umutuulo wakwelelwa pa bubifi ne lambo lyakoca. ¹⁷ Ali nokutuula umutuulo wakwampana pamo no kutuula ilambo lya sukusuku kuli Yawe, umuseke umo uwa mikate iyabula intutumushi, umutuulo wa cabunga no wa cakunwa. ¹⁸ Elyo pa mwinshi we Tenti Lyakukumaninamo Umunasiliti abeye imishishi apatwilile kuli Yawe no kuiposa mu mulilo apalepya umutuulo wakwampana pamo. ¹⁹ “Umunasiliti nga apwisha ukubeya umushishi wakuipatwilapo, shimapepo ali nokubuula ukuboko kwakwa sukusuku uwaipikwa, elyo na mu museke namo abuulemo umukate umo uwatikama na kamukate kamo akapapatala, fyonse umwabula intutumushi, no kupeela Umunasiliti pakuti eo ekate. ²⁰ Shimapepo ali nokutambika ifi fyonse kuli Yawe ngo mutuulo wa cakutambika. Fyena fyamushilo ifyo shimapepofye eka ewingasendako pamo ne cisao icatambikwa ne tanta ilituulilwe. Panuma ya ifi, Umunasiliti kuti anwa umwangashi. ²¹ “Kanshi ili e funde lya Munasiliti uwalaya icilayo kuli Yawe ukulingana no kupatulwa kwakwe, ukucilapo pafyo umwine engaitemenwa ukupeela. Afwile ukufikilisha ifyo alaile ukulingana ne funde lya bunasaliti.” ²² Yawe aebele Mose ati, ²³ “Webe Aroni na bana bakwe abaume ukuti, aya e mashiwi balebomfya pakupaala abena Israeli, baletila, ²⁴ “Yawe alemupaala no kumubaka. ²⁵ Yawe alenge icinso cakwe cimusanikile, kabili amukwatile ne cikuuku. ²⁶ Yawe namulange icinso cakwe kabili amupeele no mutende. “Ifi efyo bakalalumbula ishina lyandi, ²⁷ ilyo balepaala abena Israeli, na ine kabili nkabapaala.”