¹ Yawe aebele Mose na Aroni, ati, ² “Pendeni abena Koati aba mu luko lwakwa Levi, mubapendele mu ndupwa na mu mayanda yabo. ³ Mupende abaume bonse abali ne myaka amakumi yatatu ukufika na ku makumi yasano, abesa mukubombela mwi Tenti Lyakukumaninamo. ⁴ Umulimo wa bena Koati mwi Tenti Lyakukumaninamo wakusunga ifintu ifyamushilo nganshi. ⁵ “Ilyo mwalasela pa nkambi, Aroni na bana bakwe abaume baleingila mwi Tenti Lyakukumaninamo no kukobola icisalu icacingako Imbokoshi ya Cipangano. Balefimba Imbokoshi ya Cipangano icisalu cine ici. ⁶ Elyo kabili bafwile ukufimbapo ne cakufimbapo na cimbi ica mpapa ishisuma ishatelela, ne nsalu yacifufya pamulu, elyo babikeko ne fimuti fyakupingilako. ⁷ “Petebulo lya mikate yakuba pa cinso candi, baleansapo insalu iyacifufya, elyo babikepo imbale, inweno shakubikamo ububani ne nweno sha mituulo ne mitondo ya mituulo ya fyakunwa. Imikate yakubapo inshita yonse petebulo yena taifwile ukubulwapo. ⁸ Pali ifi balefimbapo insalu iyakashika pamulu, elyo kabili balefimbapo ne cakufimbapo na cimbi ica mpapa ishisuma ishatelela, elyo babikeko ne fimuti fyakupingilako. ⁹ “Balebuula insalu yacifufya, balefimba pa cakutekapo ifisaniko, kumo kwine ne fisaniko, ifyakushimishako nangu ukukushishako ulubuuto ne mbale sha mito. Kabili na pali fyonse ifisungilwamo amafuta yakusanikila. ¹⁰ Elyo balepomba icakutekapo ifisaniko pamo pene ne fibombelo fyonse mu cakufimbapo ica mpapa ishisuma ishatelela, elyo babike na pa mitembo yakusendelapo. ¹¹ “Pa bulambo bwa golide balefimbapo insalu yacifufya, balefimbapo ne cakufimbapo na cimbi ica mpapa ishisuma ishatelela, elyo babikeko ne fimuti fyakupingilako. ¹² Balebuula ne fipe fyonse ifyo babomfya mu cifulo camushilo, no kufipomba mu nsalu yacifufya. Kabili balefimbako ne cakufimbapo na cimbi ica mpapa ishisuma ishatelela, babike na pa mitembo yakusendelapo. ¹³ Bali nokukusa imito pa bulambo bwa mukuba no kwansapo insalu iyakashikila. ¹⁴ Nga bayanshikapo, elyo babikapo ifipe fyonse ifyo babomfya ku bulambo, ifyakubikapo umulilo ne mitunkwilo na bafosholo ne misambilo. Elyo bali nokufimbapo ne cakufimbapo ica mpapa ishisuma ishatelela, elyo babikeko ne fimuti fyakupingilako ¹⁵ Ilyo Aroni na bana bakwe abaume bapwisha umulimo wakukupilisha bwino icifulo camushilo pamo pene ne fipe fya mu cifulo camushilo, ninshi na bonse mwaipekanya ukukuuka pa nkambi, elyo abena Koati bali nokwisa fisenda. Lelo nabo bene tabafwile kwikata ku fipe fyamushilo, epali bafwa. Awe abena Koati ebakulasenda ifya mwi Tenti Lyakukumaninamo. ¹⁶ “Eleasa mwana Aroni shimapepo, ewakulamona pa mafuta ya mu fisaniko, ububani ubwanunka ubusaka, imituulo ya fyabunga na mafuta yakusuba. Ewakulamona pe Tenti lyakwa Lesa pamo ne filimo, icifulo camushilo pamo pene ne fibombelo fyamushilo ifisangwamo.” ¹⁷ Yawe aebele Mose na Aroni, ati, ¹⁸ “Mwikaleka aba mu ndupwa shakwa Koati ukuti bakalobe ukufuma ku bena Levi. ¹⁹ Kanshi pakuti aba bantu tabafwile ilyo bapalama ku fipe fyamushilo, lelo bakekala abamweo, ifi efyo muli nokubacitila. Aroni na bana bakwe abaume ebakulatangila pakwingila mu cifulo camushilo nokulangilila cila muntu umulimo ali nokubomba neco ali nokusenda. ²⁰ Lelo aba mu ndupwa shakwa Koati tabafwile kwingila mu cifulo camushilo kukumona uko bashimapepo balelonga ifipe fyamushilo, nangu pa nshitafye inono, pantu kuti bafwa.” Imilimo ya bena Geshoni ²¹ Yawe aebele Mose ati, ²² “Penda abena Geshoni aba mu luko lwakwa Levi, ubapendele mu ndupwa na mu mayanda yabo. ²³ Upende abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo. ²⁴ Iyi e milimo abena Geshoni bakalabomba pamo no kulasenda ifipe. ²⁵ Ebakalasenda ifisalu fyakucinga kwi Itenti lyakwa Lesa, Itenti Lyakukumaninamo ne cakufimbako icamukati ne cakufimbapo cakunse ica mpapa ishisuma ishatelela, pamo pene ne fyakufimba pa mwinshi we Tenti Lyakukumaninamo. ²⁶ Ebakalasenda ne fisalu fyakucinga ulubansa lwa kwi Tenti lyakwa Lesa no bulambo, icisalu cakucinga pa mwinshi wakwingililapo mu lubansa, imyando na fyonse ifibombelo ifyakubomfyafye muli iyi milimo. Abena Geshoni ebali nokubomba fyonse ifilefwaikwa kuli ifi fintu. ²⁷ Imilimo bakalabomba yonse, cibe yakusenda ifipe nangu yakubombafye, Aroni na bana bakwe abaume ebo bakalebakonkomesha. Uli nokubalanga fyonse ifyo bali nokusenda. ²⁸ Iyi e milimo bakalabomba mwi Tenti Lyakukumaninamo aba mu ndupwa shakwa Geshoni. Itama mwana shimapepo Aroni ewakulabangalila mu milimo yabo.” Imilimo ya bena Merari ²⁹ Yawe aebele Mose, ati, “Penda abena Merari, ubapendele mu ndupwa na mu mayanda yabo. ³⁰ Upende abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo ³¹ Abena Merari ebakalabomba umulimo wakusenda impanda shakwimikila Itenti Lyakukumaninamo ne myalo, inceshi no twakwimikamo impanda shakwimikila Itenti lyakwa Lesa. ³² Kabili ebakalasenda ne nceshi shakucinga ulubansa, ifyakwimikamo inceshi, impopo ne myando ne fipe fyakubomfya kuli uyu mulimo. Cila mwaume mumupeelele kabela ifipe ali nokusenda. ³³ Iyi e milimo indupwa sha bena Merari shili nokulabomba mwi Tenti Lyakukumaninamo. Itama mwana shimapepo Aroni ewakulabangalila mu milimo yabo.” Indupwa sha bena Levi shonse shapendwa ³⁴ Kanshi Mose na Aroni ne ntungulushi sha lukuta lwa bena Israeli epakupenda abena Koati, mu ndupwa na mu mayanda yabo. ³⁵ Abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo, ³⁶ impendwa yabo mu ndupwa mu ndupwa shabo yali amakana yabili ne myanda cine lubali na makumi yasano (2,750). ³⁷ Kanshi iyi eyali e mpendwa ya bantu ba mu ndupwa sha bena Koati bonse, ababomba mwi Tenti Lyakukumaninamo, abo Mose na Aroni bapendele ngefyo Yawe akonkomeshe Mose. ³⁸ Abena Geshoni nabo bapendelwe mu ndupwa na mu mayanda yabo. ³⁹ Abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo, ⁴⁰ impendwa mu ndupwa mu ndupwa shabo yali amakana yabili ne 2,630. ⁴¹ Kanshi iyi eyali e mpendwa ya bantu bonse aba mu ndupwa sha bena Geshoni, abalebomba mwi Tenti Lyakukumaninamo, abo Mose na Aroni bapendele ngefyo Yawe abakonkomeshe. ⁴² Abena Merari nabo bapendelwe mu ndupwa na mu mayanda yabo. ⁴³ Abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo, ⁴⁴ impendwa yabo mu ndupwa mu ndupwa shabo yali 3,200. ⁴⁵ Kanshi iyi eyali e mpendwa ya bantu bonse aba mu ndupwa sha bena Merari, abo Mose na Aroni bapendele ngefyo Yawe akonkomeshe Mose. ⁴⁶ Kanshi Mose na Aroni ne ntungulushi sha bena Israeli bapendele bonsefye abena Levi, mu ndupwa na mu mayanda yabo. ⁴⁷ Abaume bonse abali ne myaka amakumi yatatu ukufika na ku makumi yasano, abalingile ukulabombela mwi Tenti Lyakukumaninamo no kusenda ifipe, ⁴⁸ impendwa yabo yali 8,580. ⁴⁹ Ngefyo Yawe akonkomeshe Mose, umuntu onse alipeelwe umulimo wakubomba ne cipe icakusenda. Awe bonse balipendelwe ngefyo Yawe akonkomeshe Mose.