¹ Mu mawanga ya Moabu, mupepi no mumana wa Yordani ukulungatana na Yeriko, Yawe aebele Mose ati, ² “Konkomesha abena Israeli ukupeelako abena Levi imisumba iyakwikalamo mu ca cishilano bali nokupeelwa. Kabili muli nokubapeela ne fitungu fyakucemenamo ifitekwa fyabo ukushinguluka imisumba. ³ Elyo bakakwata imisumba iyakwikalamo, pamo ne fitungu bakalacemenamo iŋombe, impaanga ne fitekwa fyabo fimbi. ⁴ Ifitungu fyakucemenamo ifitekwa fyabo, ifyashinguluka imisumba iyo mulepeela abena Levi, fili nokutendekelafye kunse ye linga, monse monsefye fili nokulepa bamita imyanda ine na makumi yasano. ⁵ Kunse ya musumba, mukapime bamita imyanda pabula lubali ku kabanga, bamita imyanda pabula lubali ku kulyo, bamita imyanda pabula lubali ku masamba, bamita imyanda pabula lubali ku kuso, ukubika umusumba pakati. Bakakwata ici citungu ngo mwakucemena ifitekwa fya muli iyi misumba. ⁶ “Imisumba mutanda muli nokupeela abena Levi ikaba misumba yakufisamamo nga cakuti umuntu aipaya umuntu mubiye. Kabili mukalundepo ne misumba imbi amakumi yane na ibili. ⁷ Yonse pamo iyo muli nokupeela abena Levi ili nokuba amakumi yane na cine konse konse, kumo kwine ne fitungu ifyakucemenamo ifitekwa. ⁸ Imisumba iyo muli nokupeela abena Levi, ukufuma ku mpanga ya calo ca bena Israeli, ili nokulinganafye no bukulu bwa citungu ico cila luko lukwete. Pokeniko imisumba iyingi ku nko ishikwete ikulu, lelo abakwete inono, muli nokufumyako inono.” ⁹ Kabili Yawe aebele Mose ati, ¹⁰ “Landa ku bena Israeli utile kuli bena. Ilyo mukabuka umumana wa Yordani no kuya mu calo ca Kenani, ¹¹ mukasale imisumba imo, imisumba umwakufisama umuntu nga aipaya umuntu mubiye ukushili ku mufulo, eko afulumukila. ¹² Shikaba ni ncende shakufisamamo ukufuma ku wacilandushi, pakuti umuntu uuli no mulandu wakwipaya umuntu mubiye bemwipaya kano batala bamulubulwisha pa cinso ca lukuta. ¹³ Iyi misumba mutanda iyikapeelwa, ikaba misumba yenu iyakufisamamo, ¹⁴ Mukapeele imisumba itatu kwishilya lya Yordani, elyo imbi itatu ikabe mu calo ca Kenani nge misumba yakufisamamo. ¹⁵ Iyi misumba mutanda ikaba ni ncende shakufisamamo abena Israeli, abenafyalo na bantu bambi mwikala nabo pakuti umuntu, uwaipaya umubiye ukushili ku mufulo, kuti abutukila kulya kwine. ¹⁶ “Nomba, nga cakuti umuntu akoma umubiye ne cela pakuti afwe, ni ntalamisoka. Ntalamisoka afwile ukupingwilwa ukwipaiwa. ¹⁷ Nangu nga cakuti umuntu ali ne libwe mu minwe yakwe ilingepaya umuntu, ilyo atoba umuntu afwa, ninshi ni ntalamisoka. Ntalamisoka afwile ukwipaiwa. ¹⁸ Nangu nga cakuti umuntu ali ne cimuti mu minwe yakwe icingepaya umuntu, ilyo abola umuntu afwa, ninshi ni ntalamisoka. Ntalamisoka afwile ukwipaiwa. ¹⁹ Kalandula wa mulopa euli nokwipaya ntalamisoka. Nga amukumanya ali nokumwipaya. ²⁰ “Nga cakuti umuntu umo alipata umubiye, elyo amusunka nangu amusukushila icintu cimo ku mufulo pakuti afwe, ²¹ nangu amuma ikofi mu lupato pakuti afwe, ulya muntu ali no kwipaiwa pantu ni ntalamisoka. Kalandula wa mulopa ali nokwipaya ntalamisoka ilyo akamukumanya. ²² “Lelo nga cakuti ukwabula ulupato umuntu asunka umubiye mukupumikisha, nangu amusukushila icintu cimo, ²³ nangu tamumwene, nga amulasa ilibwe ilingamwipaya no kufwa afwa, nomba ico tali mulwani wakwe, kabili tafwaile kumucena, ²⁴ ulukuta lufwile ukupingula umulandu pakati kakwe na kalandula wa mulopa ukukonka na mafunde aya. ²⁵ Ulukuta luli nokucingilila uwapeelwa umulandu wakwipaya umubiye kuli kalandula wa mulopa, no kumubweseshamo ku musumba wakufisamamo uko abutukile. Afwilefye ukwikalilila uko kwine mpaka shimapepo mukalamba alipo uwasubwa amafuta yamushilo akafwe. ²⁶ Lelo uuli no mulandu nga afuma mu mipaka ya musumba abutukileko, ²⁷ elyo na kalandula wa mulopa amukumanya kunse ya musumba, kalandula wa mulopa kuti amwipaya, apabula ukukwata umulandu wakwipaya umuntu. ²⁸ Uwamulandu afwile ukwikala mu musumba afisamamo, mpakafye napo shimapepo mukalamba akafwila, lyena kuti abwelelamo ku mpanga yakwe. ²⁹ Aya e mafunde yenu ne fipope ifyo mwakulakonka umukakonkanina inkulo, konsefye uko mukalaikala. ³⁰ “Umuntu onse uwaipaya mubiye, ali nokwipaiwa nge ntalamisoka bakambone nga bamushinina. Lelo kambone nga alifye umo, tabali na kumwipaya iyoo. ³¹ Tecakwesha ukusumina ukupoka icakulubwilapo ntalamisoka uulingile ukufwa. Uyu ena mu cinefye afwile ukwipaiwa. ³² Tecakwesha kusumina ukupoka icakulubwilapo onse uwafulumukila mu musumba wakufisamamo, pakuti asuminishiwe ukubwelelamo ku mpanga yakwe no kuya ikala ilyo shimapepo mukalamba uulipo talati afwe. ³³ Tecakwesha kukowesha icalo muleikalamo. Ukusumya umulopa kulakowesha icalo, no kufutilako pa bubifi teti ficitike pali ici calo apo umulopa usumine, kanofye pa mulopa wa muntu uwasumishe umulopa. ³⁴ Tecakwesha kukowesha calo umo mwikala, kabili emo na ine njikala. Pantu ine ne Yawe, njikala pakati ka bena Israeli.”