¹ Yawe aebele Mose ati, ² “Konkomesha abena Israeli utile kuli bena, ilyo mukengila mu Kenani, icalo mwalapeelwa nge ca cishilano, imipaka ikaba nifi. ³ Ukufuma ku kapinda ka ku kulyo, umupaka ukalundako na matololo ya Sini, ukukonkafye umwapakanina icalo ca Edomu. Ku kabanga, umupaka wa ku kapinda ka ku kulyo ukutendekela ukufuma ku mpela ya Bemba Wamucele, ⁴ ukwabukila ku kapinda ka ku kulyo ka mupokapoka wa Sikopioni, ukuya ku Sini no kuya fika ku kapinda ka kulyo ka Kadeshi Banea. Elyo ukalola ku Hasa Ada, no kuya fika ku Asimoni, ⁵ uko ukabweluluka, mukukuminkanya akamana mainsa aka pa mupaka wa calo ca Egupto no kupelela kuli Bemba. ⁶ “Mupaka wenu uwa ku masamba uli nokuba lulamba lwa Bemba Mukalamba. Uyu e mupaka wenu ku masamba. ⁷ “Ku kapinda ka ku kuso kwenu umupaka ukakonka ukufuma kuli Bemba Mukalamba, ukufika ku lupili lwa Hori, ⁸ kabili ukufuma ku lupili lwa Hori mpaka ku Lebo Hamati. Elyo umupaka uli nokutwalilila ukufika na ku Sedadi, ⁹ na ku Sifuroni, no kuya pwila ku Hasa Enani. Uyu e mupaka wenu ku kapinda ka ku kuso. ¹⁰ “Ku kabanga umupaka ukakonka ukufuma ku Hasa Enani, ukufika ku Shefamu. ¹¹ Umupaka uli nokutentemuka ukufuma ku Shefamu mpaka ku Ribula, ku kabanga ka Aini no kutwalilila no mutentemuko ku kabanga ka bemba wa Kinereti. ¹² Elyo umupaka uli nokutentemukila ku mumana wa Yordani no kupelela kuli Bemba Wamucele. Iyi eili nokuba impanga yenu, ne mipaka ya calo konse konse.” ¹³ Mose akonkomeshe abena Israeli ati, “Penduleni pakwakana ici calo nge ca cishilano. Yawe nalanda ukucipeela ku nko pabula na citika, ¹⁴ pantu indupwa sha luko lwakwa Rubeni no luko lwakwa Gadi no luko citika ulwakwa Manase, nabapoka ica cishilano cabo. ¹⁵ Ishi nko shibili na citika nashipoka ica cishilano cabo lwa ku kabanga ukutulila akasuba ku Yordani na Yeriko.” ¹⁶ Yawe aebele Mose ati, ¹⁷ “Aya e mashina ya baume bali nokwakanya icalo nge ca cishilano, Eleasa shimapepo na Yoshua umwana mwaume wakwa Nuni. ¹⁸ Elyo sontapo intungulushi imo muli cila luko iyakwafwilisha ukwakanya icalo. ¹⁹ Aya e mashina yabo, Kalebu umwana mwaume wakwa Yefune, uwa mu luko lwakwa Yuda. ²⁰ Shemueli umwana mwaume wakwa Amiudi, intungulushi ukufuma mu luko lwakwa Simeoni. ²¹ Elidadi umwana mwaume wakwa Kisiloni, intungulushi ukufuma mu luko lwakwa Benjamini. ²² Buki umwana mwaume wakwa Yogili, intungulushi ukufuma mu luko lwakwa Dani. ²³ Hanieli Amieli umwana mwaume wakwa Efodi, intungulushi ukufuma mu luko lwakwa Manase umwana mwaume wakwa Yosefu. ²⁴ Kemueli umwana mwaume wakwa Shipitani, intungulushi ukufuma mu luko lwakwa Efulemu umwana mwaume wakwa Yosefu. ²⁵ Elisafani umwana mwaume wakwa Panaki, intungulushi ukufuma mu luko lwakwa Sebuloni. ²⁶ Palitieli umwana mwaume wakwa Asani, intungulushi ukufuma mu luko lwakwa Isaka. ²⁷ Ahiudi umwana mwaume wakwa Shelomi, intungulushi ukufuma mu luko lwakwa Asheri. ²⁸ Pedaheli umwana mwaume wakwa Amiudi, intungulushi ukufuma mu luko lwakwa Naftali.” ²⁹ Aba e baume Yawe akonkomeshe ukwakanya icalo ca cishilano ku bena Israeli mu calo ca Kenani.