¹ Ifi efyo ukukonkana kwa lwendo lwa bena Israeli kwali ilyo bafumine mu Egupto impuka ne mpuka mukutungululwa na Mose elyo na Aroni. ² Mukukonkomeshiwa na Yawe, Mose alelemba ififulo baletuushamo mu lwendo lwabo. Kanshi ulwendo lwabo ukukonkana nomo baletuusha lwali ngefi. ³ Abena Israeli bafumine mu Ramesesi pa bushiku bwalenga ikumi limo na shisano mu mweshi wantanshi, pa bushiku bwakonka pe Pasaka, inshikunkulu ya Cakucilila. Bafumine ne cilumba ilyo abena Egupto balemonako, ⁴ ninshi bena baleshiika amabeli yabo yonse ayo Yawe aipeye pakati kabo. Pantu Yawe ninshi naleta ubupingushi pa milungu yabo. ⁵ Abena Israeli bafuma mu musumba wa Ramesesi no kuya cita inkambi ku Sukoti. ⁶ Ilyo bafuma pa Sukoti, bacita inkambi ku Etamu, pa mpela ya matololo. ⁷ Ilyo bafuma ku Etamu, bayalulukila ku Pi Hairoti ku kabanga ka Baali Sefoni, no kucita inkambi mupepi na Migidoli. ⁸ Bafuma ku Pi Hairoti bapita muli Bemba Wakashika baya mu matololo. Kabili ilyo baendele inshiku shitatu mu matololo ya Etamu, bacita inkambi pa Mara. ⁹ Ilyo bafuma ku Mara no kuya ku Elimu, uko ukwali utumfukumfuku ikumi limo na tubili ne miti ya tuncindu amakumi cine lubali, kabili eko bacita inkambi. ¹⁰ Ilyo bafuma ku Elimu, bacita inkambi mupepi na Bemba Wakashika. ¹¹ Ilyo bafuma kuli Bemba Wakashika, baya cita inkambi mu matololo ya Shini. ¹² Ilyo bafuma ku matololo ya Shini, bacita inkambi ku Dofuka. ¹³ Ilyo bafuma ku Dofuka, bacita inkambi ku Alushi. ¹⁴ Ilyo bafuma ku Alushi, bacita inkambi ku Refidimu, ukushali menshi yakunwa abantu. ¹⁵ Ilyo bafuma ku Refidimu, bacita inkambi mu matololo ya Sinai. ¹⁶ Ilyo bafuma ku matololo ya Sinai, baya cita inkambi ku Kibroti Hatafa. ¹⁷ Ilyo bafuma ku Kibroti Hatafa, baya cita inkambi ku Haseloti. ¹⁸ Ilyo bafuma ku Haseloti, baya cita inkambi ku Ritima. ¹⁹ Ilyo bafuma ku Ritima, baya cita inkambi ku Rimoni Peresi. ²⁰ Ilyo bafuma ku Rimoni Peresi, baya cita inkambi ku Libina. ²¹ Ilyo bafuma ku Libina, baya cita inkambi ku Risa. ²² Ilyo bafuma ku Risa, baya cita inkambi ku Keelata. ²³ Ilyo bafuma ku Keelata, bacita inkambi ku lupili lwa Shefa. ²⁴ Ilyo bafuma ku lupili lwa Shefa, baya cita inkambi ku Harada. ²⁵ Ilyo bafuma ku Harada, baya cita inkambi ku Makeloti. ²⁶ Ilyo bafuma ku Makeloti, baya cita inkambi ku Tahati. ²⁷ Ilyo bafuma ku Tahati, baya cita inkambi ku Tera. ²⁸ Ilyo bafuma ku Tera, baya cita inkambi ku Mitika. ²⁹ Ilyo bafuma ku Mitika, baya cita inkambi ku Hashimona. ³⁰ Ilyo bafuma ku Hashimona, baya cita inkambi ku Moseroti. ³¹ Ilyo bafuma ku Moseroti, baya cita inkambi ku bena Yaakani. ³² Ilyo bafuma ku bena Yaakani, bacita inkambi ku Hagidigadi. ³³ Ilyo bafuma ku Hagidigadi, bacita inkambi ku Yotibata. ³⁴ Ilyo bafuma ku Yotibata, bacita inkambi ku Aburona. ³⁵ Ilyo bafuma ku Aburona, bacita inkambi ku Esioni Geberi. ³⁶ Ilyo bafuma ku Esioni Geberi, bacita inkambi ku Kadeshi, mu matololo ya Sini. ³⁷ Ilyo bafuma ku Kadeshi, bacita inkambi ku lupili lwa Holi mu mupaka wa calo ca Edomu. ³⁸ Yawe akonkomeshe Aroni shimapepo ukuya pa mulu wa lupili lwa Holi, epo aile fwila pa bushiku bwakutampa umweshi walenga isano, mu mwaka walenga amakumi yane apo abena Israeli bafumine ku Egupto. ³⁹ Aroni ali ne myaka umwanda umo na makumi yabili na itatu 123, ilyo afwile pa lupili lwa Holi. ⁴⁰ Imfumu ya ku Aradi, iya bena Kenani iyaleikala ku matololo ya Negebu, yaumfwa ukuti abena Israeli baleisa. ⁴¹ Ilyo bafuma ku lupili lwa Holi, bacita inkambi ku Salimona. ⁴² Ilyo bafuma ku Salimona, bacita inkambi ku Punoni. ⁴³ Ilyo bafuma ku Punoni, bacita inkambi ku Oboti. ⁴⁴ Ilyo bafuma ku Oboti, bacita inkambi ku Iye Habarimu mu mupaka wa Moabu. ⁴⁵ Ilyo bafuma ku Iye Habarimu, bacita inkambi ku Diboni Gadi. ⁴⁶ Ilyo bafuma ku Diboni Gadi, bacita inkambi ku Alimoni Dibilataimu. ⁴⁷ Ilyo bafuma ku Alimoi Dibilataimu, bacita inkambi mu mpili sha Habarimu mupepi na Nebo. ⁴⁸ Ilyo bafuma ku mpili sha Habarimu, bacita inkambi mu mawanga ya Moabu mupepi no mumana wa Yordani, ukulungatana no musumba wa Yeriko. ⁴⁹ Kulya kwine mu mawanga ya Moabu bacita inkambi mu lulamba lwa mumana wa Yordani ukufuma ku Beti Yeshimoti ukufika na ku Abeli Shitimu. ⁵⁰ Mu mawanga ya Moabu mu lulamba lwa Yordani, ukulungatana no musumba wa Yeriko, Yawe aebele Mose ati, ⁵¹ “Landa ku bena Israeli utile kuli bena, ‘Nga mwayabuka umumana wa Yordani, mwaya mu Kenani, ⁵² mufwile ukufulumunamo bonse abekalamo ku cinso cenu. Kabili monaule utulubi utwabaswa no twabumbwa, elyo mubongolole ne ncende shonse shakupepelamo isho bacindika. ⁵³ Pokeni icalo, muleikalamo pantu nimupeela icalo ukuba cenu. ⁵⁴ Pakwakana icalo mukalependula ukulingana ne nko shenu. Uluko ulukalamba mukalupeele impanga iyikalamba, no luko ulunono mukalupeele impanga inono. Conse icasuminishiwa pakupendula cikaba e cipande ca mpanga yabo. Yakaneni ukulingana ne nko sha fikolwe fyenu. ⁵⁵ Lelo nga mwafilwa ukufulumunamo bonse abekalamo mu calo, abo mukashamo bakaba fyakumusonkola mu menso yenu, kabili nge myunga mu mbafu shenu. Bakalamucusha mu calo umo mukekala. ⁵⁶ Elyo nomba na ine nkamucitila ifyo napanga ukubacitila.’”