¹ Abena Rubeni na bena Gadi, abakwete iŋombe ne mpaanga ishingi, bamwene ifyalo fya ku Yaseri na Gileadi ukuti fisuma nganshi ukutekelamo ifitekwa. ² Elyo baya kuli Mose na Eleasa shimapepo ne ntungulushi sha lukuta, babeba abati, ³ “Ataroti, Diboni, Yaseri, Nimura, Heshiboni, Eleale, Sebamu, Nebo na Beoni, ⁴ icalo ico Yawe apokolwele pa cinso ca lukuta lwa bena Israeli nacilinga ukutekelamo ifitekwa, na babomfi benu nabakwata ifitekwa.” ⁵ Batile, “Nga cakuti mwatulangulukilako, lekeni cino calo cipeelwe ku babomfi benu pakuti cibe icuma cesu. Mwituleka twabuke Yordani.” ⁶ Mose atile ku bena Gadi na bena Rubeni, “Bushe mulefwaya ukushala no kwikala kuno ilyo abanenu baleya ku nkondo? ⁷ Bushe cinshi ico muletompwela imitima ya bena Israeli pakuti beya mu calo Yawe abapeela? ⁸ Ifi fine efyo na bashinwe bacitile, ilyo nabatumine ukufuma ku Kadeshi Banea kukuya lengula icalo. ⁹ Panuma yakuya fika kwishika lya Eshikoli no kumona icalo, babwelele no kutompola imitima ya bena Israeli mukukanaingila mu calo Yawe abapeele. ¹⁰ Yawe alifulilwe nganshi, ubo bushiku alapa noyu mulapo ati, ¹¹ ‘Pantu aba bantu tabankonkele ne mitima yabo yonse, tapali nangu umo umwaume uuli ne myaka amakumi yabili nangu ukucilapo, uwafumine mu Egupto, uukamona icalo nalaile mukulapa ukupeela Abrahamu, Isaki na Yakobo. ¹² Tapali nangu umo kanofye Kalebu mwana Yefune umwina Kenasi na Yoshua mwana Nuni, pantu bena balikonkele Yawe ne mitima yabo yonse.’ ¹³ Yawe afulilwe abena Israeli, abalenga no kululumba mu matololo pa myaka amakumi yane, mpakafye inkulo ya balya bonse abacitile ifyabipa pa cinso cakwe yasuka yapwa. ¹⁴ Kabili moneni, mwe luko lubifi, mwaibika pa fifulo fya bashinwe, no kulenga Yawe alundepo ukufulilwa Israeli. ¹⁵ Nga cakuti mwataluka ukumfwila Yawe, nakabili line akabalekako aba bantu bonse mu matolo, kabili nimwe mukalenga ukuti bonaike.” ¹⁶ Elyo bapalamine kuli ena abati, “Tulefwaya tukuule amacinka ya fitekwa fyesu, ne misumba ya banakashi besu na bana. ¹⁷ Lelo tuli abaipekanya mukuipangasha fwe bene no kuba pantanshi ya bena Israeli, mpakafye tukabafishe mu cifulo cabo. Lelo pali ino nshita abanakashi besu na bana nababale bekale mu misumba ya malinga, pakubacingililako ku bekashi ba calo. ¹⁸ Tatwakabwelele ku mayanda yesu, mpakafye umwina Israeli onse akapokelele ica cishilano cakwe. ¹⁹ Ifwe tatwakapokeko icacishilano pamo nabo mwishilya lya mumana wa Yordani, pantu ifwe ica cishilano cesu caba kuno bushilya ku kabanga ka Yordani.” ²⁰ Elyo Mose atile kuli bena, “Kuti mwabwelelamofye nga cakuti mwacita ici. Mwaipangasha mwe bene pa cinso cakwa Yawe ukuya ku bulwi, ²¹ kabili nga abaipangasha bonse mwaya abuka Yordani pa cinso cakwa Yawe, mpaka akafulumunemo abalwani bakwe ²² no kucimfya cilya calo pa cinso cakwe, lyena kuti mwabwelelamo no kuba abakaele kuli Yawe na ku bena Israeli. Kabili ici calo cikaba cuma cenu pa cinso cakwa Yawe. ²³ Lelo nga mwafilwa ukucita ico mwalaya, ninshi mwabifya kuli Yawe. Elyo muli nokushininkisha ukuti ububifi bwenu buli nokuba pali imwe. ²⁴ Kuuleni imisumba ya banakashi benu na bana, na macinka ya fitekwa, lelo mucite ico mulaile!” ²⁵ Abena Gadi na bena Rubeni batile kuli Mose, “Ifwe fwe babomfi bobe tuli nokucita ifyo wakonkomesha we mfumu yesu. ²⁶ Abana besu na bakashi, imikuni yesu ya mpaanga ne imbushi ne ŋombe, fikashala mu misumba ya Gileadi. ²⁷ Lelo ababomfi benu, umwaume onsefye uipangeshe ku bulwi, ali no kwabuka mukulwisha pa cinso cakwa Yawe, pamo ngefyo wasosa we mfumu yesu.” ²⁸ Elyo Mose apeele ifipope pali bena kuli Eleasa shimapepo na Yoshua mwana Nuni ne ntungulushi sha ndupwa sha nko sha bena Israeli. ²⁹ Atile kuli bena, “Nga cakuti abena Gadi na bena Rubeni, umwaume onsefye uuipangeshe ku bulwi, ayabuka Yordani na imwe pa cinso cakwa Yawe, lyena ilyo mwapoka icalo, nemwe muli nokubapeela icalo ca Gileadi nge cuma cabo. ³⁰ Lelo nga tababwike mumana nabaipangasha na imwe pamo, bafwilefye ukukwatako icitungu mu calo ca Kenani.” ³¹ Abena Gadi na bena Rubeni bayaswike abati, “Ababomfi benu bali nokucita ifyo Yawe alandile. ³² Tuli nokwabuka umumana ukuya mu calo ca Kenani pa cinso cakwa Yawe natuipangasha, lelo icuma ca cishilano cesu cikaba nici kuno kwishilya lya Yordani.” ³³ Elyo Mose apeele ku bena Gadi, abena Rubeni na citika wa luko lwakwa Manase mwana Yosefu icalo cakwa Sihoni imfumu ya bena Amoli, ne calo cakwa Ogi imfumu ya bena Bashani. Icalo conse kumo kwine ne misumba yabamo, ne citungu ca mpanga yonse iyabashingulwike. ³⁴ Abena Gadi bakuulile Diboni, Ataroti, ³⁵ Aroeli, Atiroti Shofani, Yaseri, Yogebea, ³⁶ Beti Nimura na Beti Harani, nge misumba yakuulililwako amalinga no kukuula amacinka ya fitekwa fyabo. ³⁷ Abena Rubeni nakabili bakuula Heshiboni, Eleale na Kiriataimu, ³⁸ pamo pene na Nebo, Baali Meoni (aya mashina baliyalwile) na Sibuma. Imisumba imbi bakuulile baliinike amashina. ³⁹ Aba mu lupwa lwakwa Makiri mwana Manase baile ku Gileadi, bapoka icalo no kufulumunamo abena Amoli abaleikalamo. ⁴⁰ Elyo Mose apeela Gileadi ku bena Makiri, aba mu lupwa lwakwa Manase, kabili eko balaikala. ⁴¹ Yairi uwa mu lupwa lwakwa Manase apokolola imishi yabo no kulaita ati Hafoti Yairi, ⁴² Kabili Noba nao apokolola Kenati ne mishi yali mumbali, no kulaita ati Noba, pamo nga fintu balemwita.