¹ Yawe aebele Mose ati, ² “Citila abena Israeli icilandushi pa bena Midiani. Panuma ya ifi elyo uli nokuya lala ukwalala ifikolwe fyobe.” ³ Elyo Mose aebele abantu ati, “Peeleni ifita fimo ifyanso tuleya ku nkondo kukulwisha abena Midiani, tuye cita icilandushi cakwa Yawe pali bena. ⁴ Cila luko lwa bena Israeli musalemo abakuya ku nkondo ikana limo limo.” ⁵ Kanshi abena Israeli epakusala abantu abakuya ku nkondo, ikana limo limo ukufuma kuli cila luko, bonse pamo bali amakana ikumi limo na yabili. ⁶ Elyo Mose abatuma ku nkondo, ikana limo limo ukufuma kuli cila luko pamo na Fineasi umwana mwaume wakwa Eleasa shimapepo, aya nasenda ne fipe fya cifulo camushilo na mapenga ayakulisha pakubeshibisha. ⁷ Baimina abena Midiani ngefyo Yawe akonkomeshe Mose, baipaya na baume bonsefye. ⁸ Kabili baipaila kumo ne mfumu shisano isha bena Midiani, Efi, Rekemu, Suri, Huri na Reba. Kabili baipaya Balamu umwana mwaume wakwa Beori ku lupanga. ⁹ Abena Israeli basenda na banakashi abena Midiani muli bunkole na bana babo. Basenda ifyakutapa fyonse, iŋombe, imikuni ya mpaanga ne mbushi, ne fyuma. ¹⁰ Baoca imisumba yonse iya bena Midiani kumo kwine ne nkambi baleikalamo shonse. ¹¹ Elyo basenda ifitapwa fyonse nefyo baonawile, pamo pene na bantu ne nama. ¹² Elyo batwala bankole, ifyo baikete nefyo batapile, kuli Mose na Eleasa shimapepo no lukuta lwa bena Israeli pa nkambi yabo, mu mawanga ya Moabu mupepi na Yordani ukulungatana na Yeriko. ¹³ Mose, Eleasa shimapepo ne ntungulushi sha lukuta shonse bafumine kunse ya nkambi kukukumanya ifita. ¹⁴ Mose afulilwa bakangalila ba fita, abakalamba ba fita amakana na bakalamba ba fita imyanda ababwelele ku nkondo. ¹⁵ Abepusha ati, “Bushe namuleka bonse abanakashi ukuba abomi? ¹⁶ Banakashi bene ebakonkelele ifyo Balamu asosele, kabili ebalengele nokuti abena Israeli basangukile Yawe ku fyacitike ku Peori, pakuti kube ne cikuko pa lukuta lwa bantu bakwa Yawe. ¹⁷ Kanshi nomba ipayeni bonse abana abaume. Kabili mwipaye umwanakashi onse uwasendemapo no mwaume. ¹⁸ lelo muishilepofye abakashana abashatala abasendamapo na baume. ¹⁹ Bonse imwe mwe baipeyepo umuntu, nangu ukukumyakofye ku citumbi ca muntu uo bepeye, mwikalefye kunse ya nkambi pa nshiku cine lubali. Pa bushiku bwacitatu no bwa cine lubali muli nokuisangulula mwe bene pamo na bankole benu. ²⁰ Muli nokusangulula ifyakufwala fyonse, ne fyapangwa ku mpapa fine fyonse, amasako ya mbushi nangu ifyapangwa ku cimuti.” ²¹ Elyo Eleasa shimapepo aeba ifita ifyaile ku nkondo ati, “Ifi efifwaikwa mu mafunde ayo Yawe apeele Mose. ²² Golide, silifa, umukuba, icela, icikopo, mutofwe, ²³ na conse icishingapya mu mulilo, muli nokufipisha mu mulilo, elyo fili nokusangululwa kukukowela. Lelo nafyo fine fili nokuposwa mu menshi yakusangulula. Elyo ifintu fyonse ifingapya mu mulilo muli nokufipisha mu menshi yalya yene. ²⁴ Pa bushiku bwalenga cine lubali, mukacape ifyakufwala fyenu, lyena mukasangululwa. Elyo nomba mukabwelela mu nkambi.” ²⁵ Yawe aebele Mose ati, ²⁶ “Iwe na Eleasa shimapepo ne ntungulushi sha ndupwa sha lukuta, muli nokupenda abantu bonse ne nama ishatapilwe. ²⁷ Akanyeni ifitapwa ku fita fyaile ku nkondo, elyo ifyashala mupeele ulukuta. ²⁸ Ukufuma ku fita fyalwile inkondo, mupatwileko Yawe umutuulo icintu cimo pa fintu imyanda isano, cibe ni pa bantu, iŋombe, bapunda, impaanga nangu imbushi. ²⁹ Mubuuleko ku cakaniko ca fita no kupeela Eleasa shimapepo, ukuba ciputulwa cakwa Yawe. ³⁰ Ukufuma ku cakaniko ca lukuta lwa bena Israeli, salenipo cimo pa fintu amakumi yasano, cibe ni pa bantu, iŋombe, bapunda, impaanga, imbushi nangu inama shimbi. Mupeele abena Levi, ababombela mwi Tenti lyakwa Yawe.” ³¹ Kanshi Mose na Eleasa shimapepo epakucitila umo Yawe akonkomeseshe Mose. ³² Ifyashele ukufuma ku fitapwa ifyo ifita fyaile ku nkondo fyasendele, fyali impaanga amakana imyanda mutanda, na makana amakumi cine lubali na yasano, ³³ iŋombe shali amakana amakumi cine lubali na yabili, ³⁴ 34bapunda bali amakana amakumi mutanda ne kana limo, ³⁵ elyo abanakashi abashatalile abasendamapo no mwaume nabo bali amakana amakumi yatatu na yabili ³⁶ Citika wa ciputulwa catapilwe ico bapeele ifita fyaile ku nkondo, cali 337,500. ³⁷ Ishakutuula Yawe shali impaanga 675. ³⁸ Ifita bafipeele iŋombe 36,000. Ishakutuula Yawe babuulilepo iŋombe 72. ³⁹ Ifita bafipeele bapunda amakana amakumi yatatu ne myanda isano 30,500. Abakutuula Yawe babuulilepo bapunda amakumi mutanda na umo (61). ⁴⁰ Ifita bafipeele abantu amakana ikumi na mutanda (16,000). Abakutuula Yawe babuulilepo abantu amakumi yatatu na babili (32). ⁴¹ Mose epakupeela Eleasa shimapepo umutuulo wakwa Yawe ngefyo Yawe amukonkomeshe. ⁴² Citika wa bena Israeli, uo Mose abapatwililepo ukufuma pa fita fyaile ku nkondo, ⁴³ citika wa fyapeelwe ku lukuta ali impaanga amakana imyanda itatu na makumi yatatu na cine lubali ne myanda isano (337,500), ⁴⁴ iŋombe shali amakana amakumi yatatu na makana mutanda (36,000), ⁴⁵ bapunda bali amakana amakumi yatatu ne myanda isano (30,500), ⁴⁶ elyo abantu bali amakana ikumi na mutanda (16,000). ⁴⁷ Ukufuma pali citika wa fyapeelwe ku lukuta lwa bena Israeli, Mose abuulapo umuntu umo pali cila makumi yasano aya bantu na pa nama napo imo, ngefyo Yawe amukonkomeshe, elyo apeela ku bena Levi, abalebombela mwi Tenti lyakwa Lesa. ⁴⁸ Elyo abakalamba abali pakati ka fita fya nkondo, abakalamba ba fita amakana na bakalamba ba fita imyanda, baile kuli Mose, ⁴⁹ balamweba abati, “Fwe babomfi bobe natupenda ifita twaletungulula tapali nangu umo uulubile. ⁵⁰ Kanshi natuleta kuli Yawe umutuulo wa tuntu twa golide uto cila umo anonkele, amakosa, insambo, imbalaminwe na masikiyo, mukuifutilako pa fya bubifi bwesu pa cinso cakwa Yawe.” ⁵¹ Mose na Eleasa shimapepo bapoka kuli bena golide na conse icabashilwe. ⁵² Golide onse ukufuma ku bakalamba ba fita amakana na bakalamba ba fita imyanda uo Mose na Eleasa shimapepo batuulile kuli Yawe, afinine amashekeli amakana ikumi limo na mutanda ne myanda cine lubali na makumi yasano (16,750). ⁵³ Cila cita caliibuulilepo icitapwa caciko. ⁵⁴ Kanshi Mose na Eleasa shimapepo bapoka golide ku bakalamba ba fita amakana na bakalamba ba fita imyanda batwala mwi Tenti Lyakukumaninamo, kukuba icibukisho ca bena Israeli pa cinso cakwa Yawe.