¹ Abakalamba ba lupwa lwa mu mikowa yakwa Gileadi, umwana mwaume wakwa Makiri, umwana mwaume wakwa Manase, abafumine mu luko lwakwa Yosefu, baile no kulanda kuli Mose ne ntungulushi na bakalamba ba ndupwa sha bena Israeli. ² Batile, “Ilyo Yawe akonkomeshe imfumu yandi ukupeela icalo nge cuma ca cishilano ku bena Israeli mukupendula, amukonkomeshe ukupeela icuma ca cishilano cakwa munyinefwe Selofeadi ku bana bakwe abanakashi. ³ Nomba nga cakuti baupwa ku baume ba mu nko sha bena Israeli shimbi, lyena ninshi ifyuma fyabo fyafuma mu fyuma fya cishilano fya fikolwe fyesu no kusanshiwa ku fyuma fya luko bakopilwako. Emukutila icuma ca cishilano icapeelwe kuli ifwe cili nokupokwa. ⁴ Ilyo umwaka wakusefya ku bena Israeli ukafika, ifyuma fya cishilano fikalundwa ku fyuma fya nko bakopilwako, kabili ninshi capokwa ukufuma ku luko lwa fikolwe fyesu.” ⁵ Kanshi ukulingana ne shiwi Yawe amukonkomeshe, Mose nao apeela ici cipope ku bena Israeli. Atila, “Ifyo aba ndupwa sha luko lwakwa Yosefu balanda filifye bwino. ⁶ Ifi efyo Yawe akonkomesha pa mulandu wa bana banakashi abakwa Selofeadi, bafwile ukuupwa ku muntu onse uo batemenwe, cikulufye wa mu mukowa wa luko lwakwa shibo. ⁷ Ifyuma fya cishilano mu bena Israeli, tafili nakufuma mu luko ulu no kuya mu luko lubiye, pantu umwina Israeli onse ali nokusunga impanga ya luko lwakwe iyo apeelwa ukufuma ku fikolwe fyakwe. ⁸ Umwana umwanakashi onse uwapeelwa impanga mu luko lonse ulwa bena Israeli, afwile ukuupwa ku wa mu mukowa wa luko lwakwa wishi, pakuti bonse abena Israeli bakakwateko icuma ca cishilano ca bashibo. ⁹ Takuli icuma ca cishilano icikafuma ku luko ulu no kuya kuli lumbi iyoo. Pantu cila luko lwa bena Israeli lwakulaikwatilafye impanga bapeelwa ukuba iya cishilano.” ¹⁰ Kanshi abana banakashi bakwa Selofeadi epakucita ifyo Yawe akonkomeshe Mose. ¹¹ Abana banakashi bakwa Selofeadi, Mala, Tirisa, Hogila, Milika na Noa, baupile abafyala babo aba ku lubali lwa bashibo. ¹² Baupilwa mu luko lwa ndupwa shakwa Manase umwana mwaume wakwa Yosefu, ne fyuma fyabo ifyacishilano fyaikalafye mu luko lwakwa shibo no mutundu wakwe. ¹³ Aya e mafunde ne fipope Yawe apeele Mose ku bena Israeli mu mawanga ya Moabu ku Yordani ukulungatana na Yeriko.