¹ Yawe aebele Mose ati, ² “Peela icebo ici ku bena Israeli kabili ulande kuli bena auti, mulemona ukuti pa nshita yasontwa yonse mulentuula imituulo ya fyakulya fyakoca, iya cena cisuma icinsekesha. ³ Ulande kuli bena utile, uyu e mutuulo wa cakoca muli nokutuula kuli Yawe, utwana twa mpaanga tubili utwa mwaka umo umo, utwabula akalema, nge lambo lyakoca cila bushiku. ⁴ Mulepekanya akana ka mpaanga kamo ulucelo, kambi nako icungulo, ⁵ pamo pene ne capekumi cimo ca ku cipimo ca efa wa bunga bwa ŋanu ubwapeleka bwino, ubwasanshiwamo ne cipimo ca pakati ka citika wa hini umo ukufuma ku cikamino ca miolifa. ⁶ Ili e lambo lyakoca ilya cila bushiku, ilyatendekele pa lupili lwa Sinai, ngo mutuulo wacakoca uwa cena cisuma icisekesha Yawe. ⁷ Umutuulo wakulundapo uwa fyakunwa, cipimo ca pakati ka citika wa hini umo uwa fyakunwa ifyakantuka pali cila kana ka mpaanga. Muleitila umutuulo wa cakunwa kuli Yawe mu cifulo camushilo. ⁸ Mulepekanya akana ka mpaanga akabiye mu nshita ya cungulo, no kucita umusango umo wine ngo lucelo, pamo no mutuulo wa cabunga no wa fyakunwa. Uyu mutuulo we lambo lyakoca uwa cena cisuma icisekesha Yawe. ⁹ “Pa bushiku bwe Sabata, tuuleni utwana twa mpaanga tubili utuli no mwaka umo umo utwabula akalema, no bunga bwa ŋanu ubwapeleka bwino utwapekumi tubili twa ku cipimo ca efa ubwasanshiwamo na mafuta aya miolifa, no mutuulo wa fyakunwa. ¹⁰ Ili e lambo lyakoca ilya pali cila Sabata, ukulunda pelambo lya cila bushiku, pamo no mutuulo wa fyakunwa. ¹¹ “Pa bushiku bonse ubwakutampa umweshi mukaletuula Yawe ilambo lyakoca ilya fiponti fya ŋombe ifilume fibili, sukusuku umo no twana twa mpaanga utulume cine lubali utwa mwaka umo umo, fyonse ifyabula akalema. ¹² Pali cila cilume wa ŋombe mukalentuulilapo utwapekumi tutatu twa ku cipimo ca efa wa bunga bwa ŋanu ubwapeleka bwino ubwasanshiwamo na mafuta ya miolifa. Pali sukusuku ifipimo fibili pekumi ifya efa wa bunga ubwapeleka bwino, ubwasanshiwamo na mafuta ya miolifa. ¹³ Pali cila kana ka mpaanga muli nokutuula icipimo pekumi ica efa wa bunga bwa ŋanu ubwapeleka bwino ubwasanshiwamo na mafuta ya miolifa. Ifi fya malambo yakoca, umutuulo wa cena icisuma icisekesha Yawe. ¹⁴ Pali cila cilume wa ŋombe onse pafwile ukuba umutuulo wa fyakunwa, imisukupala ibili iya mwangashi. Pali sukusuku umusukupala umo uwa mwangashi. Pali cila kana ka mpaanga konse, citika wa musukupala umo uwa mwangashi. Uyu e mutuulo we lambo lyakoca cila mweshi, uuli nokucitwa cila mweshi upya mu mwaka onse. ¹⁵ Elyo pelambo lyakoca ilya nshiku shonse pamo no mutuulo wa fyakunwa, mulelundapo sawe ngo mutuulo wakufuta pa fyabubifi kuli Yawe. ¹⁶ “Pa bushiku bwalenga ikumi limo na shine (14) mu mweshi wantanshi, pali nokulaba inshikunkulu ya Cakucilila, Ipasaka lyakwa Yawe. ¹⁷ Kabili pa bushiku bwalenga ikumi limo na shisano (15) mu mweshi wine uyu, kuli nokulaba inshikunkulu. Pa nshiku cine lubali mulelyafye imikate iyishatutumuka. ¹⁸ Pa bushiku bwakubalilapo mulekwata ukulongana kwamushilo, kabili tebwakwesha kubombamo imilimo ya cila bushiku. ¹⁹ Muli nokutuula Yawe ilambo lyakoca ilya fiponti fya ŋombe ifilume fibili, sukusuku umo no twana twa mpaanga utulume cine lubali utwa mwaka umo umo, fyonse ifyabula akalema. ²⁰ Pali cila cilume wa ŋombe onse pekanyenipo utwapekumi tutatu utwa ku cipimo ca efa wa bunga bwa ŋanu ubwapeleka bwino ifyasanshiwamo na mafuta ya miolifa. Pali sukusuku pekanyenipo utwapekumi tubili utwa ku cipimo ca efa wa bunga. ²¹ Kabili pali cila kana ka mpaanga pa twana twa mpaanga cine lubali, pekanyenipo icapekumi cimo ica efa wa bunga. ²² Kabili mulundepo na sawe umo uwe lambo lya pa fyabubifi pakumufutilako. ²³ Mwakulapekanya ifi ukulunda pa mutuulo we lambo lyakoca uwa cila lucelo. ²⁴ Muli iyi nshila pa nshiku cine lubali mulepekanya icakulya ca mutuulo wakoca cila bushiku, umutuulo wa cena cisuma icisekesha Yawe. Mulecita ifi pakulunda pa mutuulo wakoca no wa fyakunwa uwa lyonse. ²⁵ Pa bushiku bwalenga cine lubali kuleba ukulongana kwamushilo, kabili tebwakwesha kubombamo imilimo ya cila bushiku. ²⁶ “Pa bushiku bwa fisabo fyantanshi ilyo muletuula kuli Yawe umutuulo wa cabunga ubupya pa nshikunkulu ya milungu, kuleba ukulongana kwamushilo, kabili tekwesha kubombamo imilimo ya cila bushiku. ²⁷ Muletuula ilambo lyakoca ilya fiponti fya ŋombe ifilume fibili, sukusuku umo no twana twa mpaanga utulume cine lubali utwa mwaka umo umo ngo mutuulo wa cena cisuma icisekesha Yawe. ²⁸ Pali cila cilume wa ŋombe paleba umutuulo wa cabunga utwapekumi tutatu utwa ku cipimo ca efa wa bunga bwa ŋanu ubwapeleka bwino ubwasanshiwamo na mafuta ya miolifa. Pali sukusuku paleba utwapekumi tubili twa ku cipimo ca efa wa bunga ubwapeleka bwino. ²⁹ Elyo pali cila kana ka mpanga pa twana twa mpaanga cine lubali, capekumi cimo ica efa wa bunga. ³⁰ Kabili mulundepo sawe umo uwakumufutilapo. ³¹ Mulepekanya ifi fyonse pamo no mutuulo wa fyakunwa, mukulunda pelambo lyakoca ilya cila bushiku, no mutuulo wa cabunga. Mushininkishe bwino ukuti inama shonse tashikwete akalema.”