¹ Pa bushiku bwantanshi mu mweshi walenga cine lubali kuleba ukulongana kwamushilo, kabili tekwesha kubombamo imilimo ya cila bushiku. Bushiku bwenu ubwakulishamo amapenga. ² Ngo mutuulo wa cena cisuma icisekesha Yawe, pekanyeni ilambo lyakoca ilya ciponti ca ŋombe cimo icilume, sukusuku umo no twana twa mpaanga utulume cine lubali utwa mwaka umo umo, fyonse ifyabula akalema. ³ Pa ŋombe ilume, pekanishishenipo utwapekumi tutatu twa ku cipimo ca efa wa bunga bwa ŋanu ubwapeleka bwino ubwasanshiwamo na mafuta ya miolifa. Pali sukusuku paleba utwapekumi tubili twakuli efa wa bunga. ⁴ Elyo pali cila kana ka mpanga pa twana twa mpaanga cine lubali, cipimo cimo pekumi ica efa wa bunga. ⁵ Mulundepo na sawe umo uwakumufutilapo. ⁶ Ifi fyonse fyakulundapofye pa malambo yakoca aya cila mweshi naya cila bushiku pamo no mutuulo wa cabunga no mutuulo wa fyakunwa ngefyo fyatantikwa. Ifi fyonse, mituulo yakoca iyakuletela Yawe iya cena cisuma icimusekesha. ⁷ Pa bushiku bwalenga ikumi limo mu mweshi walenga cine lubali kuleba ukulongana kwamushilo. Mufwile ukuikaanya, mwilabombamo imilimo. ⁸ Kabili muli nokutuula ilambo lyakoca ilya cena icisuma icisekesha Yawe, iciponti cimo, sukusuku umo no twana twa mpaanga utulume cine lubali utwa mwaka umo umo, fyonse ifyabula akalema. ⁹ Pa ŋombe ilume, pekanishishenipo utwapekumi tutatu utwa ku cipimo ca efa wa bunga bwa ŋanu ubwapeleka bwino ubwasanshiwamo na mafuta ya miolifa. Pali sukusuku paleba utwapekumi tubili twa kuli efa wa bunga. ¹⁰ Elyo pali cila kana ka mpanga pa twana twa mpaanga cine lubali, cipimo cimo pekumi ica efa wa bunga. ¹¹ Mubikepo na sawe umo ngo mutuulo wakwelelwa pa fyabubifi, ukulunda pa mutuulo wakufuta pa fyabubifi, ilambo lyakoca ilyacila bushiku pamo pene no mutuulo wa cabunga no wa fyakunwa. ¹² Pa bushiku bwalenga ikumi limo na shisano mu mweshi walenga cine lubali, kukaleba ukulongana kwamushilo, kabili mwikabombamo imilimo ya cila bushiku. Mulesefya inshikunkulu pa nshiku cine lubali pakucindika Yawe. ¹³ Muli nokutuula Yawe ilambo lyakoca ilya cena icisuma icakumusekesha. Ilambo lya fiponti fya ŋombe ifilume ikumi limo na fitatu, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ¹⁴ Pali cila ŋombe ilume pa ŋombe ishilume ikumi limo na shitatu mupekanishishepo utwapekumi tutatu twa ku cipimo ca efa wa bunga bwa ŋanu ubwapeleka bwino ubwasanshiwamo na mafuta ya miolifa. Pali basukusuku babili, mupekanishishepo cila umo utwapekumi tubili twa kuli efa wa bunga. ¹⁵ Elyo pali cila kana ka mpaanga, pa twana twa mpaanga ikumi limo na tune, mupekanishishepo icipe cimo pekumi ica efa wa bunga. ¹⁶ Mubikepo na sawe umo ngo mutuulo wakwelelwa pa fyabubifi, ukulunda pelambo lyakoca ilyacila bushiku pamo pene no mutuulo wa cabunga no wa fyakunwa. ¹⁷ Pa bushiku bwalenga shibili, mupekanye ifiponti fya ŋombe ifilume ikumi limo na fibili, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula ubulema. ¹⁸ Pa ŋombe ishilume, basukusuku no twana twa mpaanga mupekanishishepo imituulo ya cabunga ne ya fyakunwa ukulingana ne mpendwa yapimwa. ¹⁹ Mubikepo na sawe ngo mutuulo wakwelelwa pa fyabubifi ukulunda pelambo lyakoca ilya cila bushiku pamo pene no mutuulo wa cabunga no wa fyakunwa. ²⁰ Pa bushiku bwalenga shitatu, mupekanye iŋombe ishilume ikumi limo na imo, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ²¹ Pa ŋombe ishilume, basukusuku no twana twa mpaanga mupekanishishepo imituulo ya cabunga ne ya fyakunwa ukulingana ne mpendwa yapimwa. ²² Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ²³ Pa bushiku bwalenga shine, muli nokutuula iŋombe ishilume ikumi limo, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ²⁴ Pa ŋombe ishilume, basukusuku no twana twa mpaanga mupekanishishepo imituulo ya cabunga ne ya fyakunwa ukulingana ne mpendwa yapimwa. ²⁵ Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ²⁶ Pa bushiku bwalenga shisano, mupekanye iŋombe ishilume pabula, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ²⁷ Pa ŋombe ishilume, basukusuku no twana twa mpaanga mupekanishishepo umutuulo wa cabunga no wa fyakunwa ukulingana ne mpendwa yapimwa. ²⁸ Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ²⁹ Pa bushiku bwalenga mutanda mupekanye ŋombe ishilume cine konse konse, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ³⁰ Pa ŋombe ishilume, basukusuku no twana twa mpaanga mupekanishishepo umutuulo wa cabunga no wa fyakunwa ukulingana ne mpendwa yapimwa. ³¹ Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ³² 32Pa bushiku bwalenga cine lubali, mupekanye iŋombe ishilume cine lubali, basukusuku babili no twana twa mpaanga utulume ikumi limo na tune utwa mwaka umo umo, fyonse ifyabula akalema. ³³ 33Pa ŋombe ishilume, basukusuku no twana twa mpaanga mupekanishishepo umutuulo wa cabunga no wa fyakunwa ukulingana ne mpendwa yapimwa. ³⁴ 34Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ³⁵ Pa bushiku bwalenga cine konse konse kuleba ukulongana kwamushilo mulelongana mukupepa, kabili mwikabombamo imilimo ya cila bushiku. ³⁶ Muli nokutuula ilambo lyakoca lya cena cisuma icisekesha Yawe, ilya ŋombe ilume imo, sukusuku umo no twana twa mpaanga utulume cine lubali utwa mwaka umo umo, fyonse ifyabula ubulema. ³⁷ Pa ŋombe iyilume, sukusuku no twana twa mpaanga mupekanishishepo umutuulo wa cabunga ne fyakunwa ukulingana ne mpendwa yapimwa. ³⁸ Mubikepo na sawe umo ngo mutuulo wakwelelwa pa fyabubifi ukulunda pelambo lyakoca ilya cila bushiku no mutuulo wa cabunga no wa fyakunwa. ³⁹ Mukulunda pa filayo mwalaya ne mituulo yakuitemenwafye, mulepekanishisha Yawe fyonse ifi pa nshikunkulu shasontwa, ilyo muletuula amalambo yakoca, imituulo ya cabunga ne ya fyakunwa ne yakwampana. ⁴⁰ Kanshi Mose aebele abena Israeli ifintu fyonse ifyo Yawe amukonkomeshe.