¹ Abana abanakashi bakwa Selofeadi umwana mwaume wakwa Eferi, umwana mwaume wakwa Gileadi, umwana mwaume wakwa Makiri, umwana mwaume wakwa Manase, bali ba mu mikowa yakwa Manase umwana mwaume wakwa Yosefu. Amashina ya bana abanakashi bali ni Mala, Noa, Hogila, Milika na Tirisa. ² Baya iminina pantanshi yakwa Mose, Eleasa shimapepo na ku ntungulushi na ku lukuta lonse ku mwinshi we Tenti Lyakukumaninamo, basosa nokuti, ³ “Batata bafwilile mu matololo, tabashilepo abana abaume nakalya. Tabali mwibumba lyakwa Kora lilya lyasangukile Yawe, lelo bafwililefye pa mulandu wa bubifi bacitile abene beka. ⁴ Bushe ico batata tabakwetepo abana abaume, eco ishina lingalobela mu lupwa lwabo? Tupeniko na ifwe icuma ukufuma pafyo mwapeela bamunyina batata.” ⁵ Mose ena epakutwala umulandu wabo kuli Yawe, ⁶ elyo Yawe asosa kuli Mose ati, ⁷ “Ifilesosa bamwana Selofeadi abanakashi fyacine. Ufwile ukushininkisha ukuti wabapeela icuma nge ca cishilano cabo, ngefi fine wapeela bamunyina kwa shibo. Kabili nabo ubapeele icuma ica cishilano cakwa shibo. ⁸ Kabili landa ku bena Israeli ukuti, ‘Umuntu umo nga afwa takwetepo umwana umwaume, umwana wakwe umwanakashi kuti abuula icuma ca cishilano cakwe. ⁹ Nga takwete umwana umwanakashi, ninshi peeleni icuma ca cishilano kuli bamunyina abaume. ¹⁰ Nga takwete bamunyina abaume, ninshi peeleni icuma ca cishilano kuli bamunyina abaume abakwa wishi. ¹¹ Nga wishi nao takwete bamunyina abaume, peeleni icuma ca cishilano kuli umo uwa mu lupwa, mu mukowa umo wine, nge cuma cakwe. Ili e funde lya bena Israeli ne cipope icakulakonkwa, ngefyo Yawe akonkomeshe Mose.’” ¹² Yawe aebele Mose ati, “Kabiye pa mulu wa lupili lwa Abarimu, umone icalo ico mpeele abena Israeli. ¹³ Panuma yakucimona, na iwe wine uli nokuya lala ukwalala ifikolwe fyobe pamo nga munonko Aroni. ¹⁴ Pantu ilyo ulukuta lwansangukile pa menshi mu matololo ya Sini, imwe bonse babili mwakene ukubeela ifyo namukonkomeshe ngo wamushilo pa menso yabo.” (Aya yali menshi ya ku Meriba Kadeshi mu matololo ya ku Sini). ¹⁵ Mose aebele Yawe ati, ¹⁶ “Kanshi Yawe, Lesa wa mipashi ya bantu bonse, asonte umuntu pa lukuta ulu, ¹⁷ alebatangilila pakuya na pakubweluluka, umo uwakuti alebatungulula pakuya no kubabwesha, pakuti ulukuta lwa bantu bakwa Yawe lwiba nge mpaanga ishabula kacema.” ¹⁸ Elyo Yawe aeba Mose ati, “Buula Yoshua umwana mwaume uwakwa Nuni, umuntu uwabamo Umupashi, umutambalikilepo ukuboko kobe. ¹⁹ Elyo uye mwiminika pantanshi yakwa Eleasa shimapepo no lukuta lonse, elyo umupeelele imilimo yobe pa menso yabo. ²⁰ Umupeele amaka yobe yamo pakuti ulukuta lonse ulwa bena Israeli lulemubeela. ²¹ Kabili akalaiminina ku cinso cakwa Eleasa shimapepo, uuli no kwipusha ifya bupingushi mukubomfya Urimu pa cinso cakwa Yawe. Mu kukonkomesha kwakwe, ena no lukuta lonse ulwa bena Israeli bali nokufuma, kabili mu kukonkomesha kwakwe bakabweluluka.” ²² Mose nao acita ngefyo Yawe amukonkomeshe. Abuula Yoshua amwimika pantanshi yakwa Eleasa shimapepo no lukuta lonse. ²³ Elyo amutambalikilapo amaboko yakwe no kumupeela imilimo yakwe pamo ngefyo Yawe aebele Mose.