¹ Yawe aebele Mose ati, ² “Landa ku bena Israeli, ubebe auti, nga mwaingila mu calo ndi nokumupeela pakuti emo mukaleikala, ³ mukaletuula Yawe amalambo yakoca ukufuma pa ŋombe nangu pa mukuni, ukuba icena cisuma icakusekesha Yawe, nangu umutuulo wakoca nangu amalambo ya pa mulandu wa filayo nangu aya bupe bwakuitemenwa, nangu imituulo ya pa nshikunkulu shenu. ⁴ Elyo uyo onse uwatuula umutuulo kuli Yawe, ali nokubikapo umutuulo wa bunga bwa ŋanu ubwapeleka bwino icapekumi cimo ca ku cipimo ca efa, ubwasanshiwamo ne cipimo ca pakati ka citika wa hini wa mafuta ya miolifa. ⁵ Atuule ne cipimo ca pakati ka citika wa hini wa mwangashi ngo mutuulo wa cakunwa ukulunda pa mutuulo na pelambo lyakoca ilya cila mwana wa mpaanga. ⁶ Pali sukusuku umo muli nokutuula umutuulo wa cabunga bwa ŋanu ubwapeleka bwino utwapekumi tubili twa ku cipimo ca efa, ifyasanshiwamo ne cipimo mupepi na citika wa hini wa mafuta ya miolifa. ⁷ Atuule no mwangashi icipimo mupepi na citika wa hini ngo mutuulo wa cakunwa. Fituulwe ukuba icena cisuma icakusansamusha Yawe. ⁸ Nga mwapekanya iŋombe ilume ngo mutuulo wa cakoca nangu ilambo, pa mulandu wa mulapo nangu mutuulo wakwampana kuli Yawe, ⁹ pa ŋombe muli nokulundapo umutuulo wa cabunga bwa ŋanu ubwapeleka bwino utwapekumi tutatu twa ku cipimo ca efa, ubwasanshiwamo ne cipimo ca citika wa hini wa mafuta ya miolifa. ¹⁰ Kabili ali nokuleta umutuulo wa cakunwa icipimo ca citika wa hini wa mwangashi pakuba umutuulo wakoca pa mulilo kukuba icena cisuma icakusansamusha Yawe. ¹¹ Kanshi uyu e musango wakupekanishishamo cila iŋombe, sukusuku na kana ka mpaanga nangu aka mbushi. ¹² Inama shakutuula ilambo nangu shingafula shani, mukalecita ifyo fine kuli cila imo. ¹³ Onsefye umukaya umwina Israeli ali nokucita ifi fintu pakuleta umutuulo wakoca pa mulilo, kukuba icena cisuma icakusansamusha Yawe. ¹⁴ Pa mulandu wa nkulo shikesa, ilyo umwinafyalo nangu uuli onse uwikala na imwe atuula umutuulo wakoca pa mulilo, uwakuba icena cisuma icakusansamusha Yawe, nao wine afwilefye ukucita cimo cine ifyo na imwe mucita. ¹⁵ Mwe bena Israeli, pamo pene na benafyalo abo mwikala nabo, ili lifunde lyamuyayaya ilyo mukalakonka mu nkulo shikakonkapo. ¹⁶ Imwe na benafyalo, mukabafye cimo cine pa cinso cakwa Yawe. Amafunde ne fipope fikaba fimo fine kuli imwe na ku benafyalo abo mwikala nabo.” ¹⁷ Yawe aebele Mose ati, ¹⁸ “Landa ku bena Israeli no kubeba auti, nga mwaingila mu calo ico ndi nokumutwalamo, ¹⁹ kabili nga mwalalya icakulya ca muli ici calo, mukalefumyapo fimo ifyamutuulo kuli Yawe. ²⁰ Ku bunga bwenu ubwantanshi mukalepangako umukate no kuutuula nga filya fine mutuula umutuulo wa pa kupwa kwa kusokola iŋanu. ²¹ Mu nkulo shenu shonse ishikakonkapo, mukaletuula umutuulo kuli Yawe ku mukate mukabalilapo ukupanga. ²² “Nomba nga mwafilwa mukukanaishiba ukusunga ifi fipope fyonse fintu Yawe apeela Mose, ²³ icipope conse ico Yawe apeele Mose ukufuma pa bushiku Yawe abapeele ukupita na mu nkulo shonse ishikakonkapo, ²⁴ nga mwacita mukukanaishiba, no lukuta lonse talwishibe, lyena ninshi ulukuta lonse luli nokutuula iciponti ngo mutuulo wakoca uwakuba icena cisuma icakusekesha Yawe. Kabili mubikepo ne fifwaikwa pa mutuulo wa cabunga no wa cakunwa, elyo na sawe uwa mutuulo wa pa fyabubifi. ²⁵ Shimapepo ali nokufutilako ulukuta lonse ulwa bena Israeli pa bubifi bwabo pakuti lubelelwe uluse, pantu ulukuta talwabifishe ku mufulo iyoo. Kabili batuula kuli Yawe umutuulo wakoca no wakwelelwa pa fyabubifi fyabo. ²⁶ lonse ulwa bena Israeli pamo na benafyalo abekala nabo bakabelelwa uluse, pantu bonsefye balibifishe ukwabula ukwishiba. ²⁷ “Lelo ngo muntufye umo ewabifishe mukukanaishiba, ali nokutuula akabushi akakota aka mwaka umo, ngo mutuulo wakwelelwa pa bubifi. ²⁸ Shimapepo ali nokufutilako uyo muntu pa cinso cakwa Yawe, pakuti abelelwe uluse pa fyabubifi fyakwe acitile mukukanaishiba. Kanshi nga bamufutilako, lyena ali nokubelelwa uluse. ²⁹ Ili line funde limo line e lyakukonka umuntufye onse uwabifya mukukanaishiba, abe mwina Israeli umukaya nangu mwinafyalo uo mwikala nankwe. ³⁰ “Nomba onse uwabifya ku mufulo, abe mukaya nangu mwinafyalo, ninshi asaalula Yawe. Uyu muntu wakutamfyafye mu bantu bandi. ³¹ Pantu asuula ishiwi lyakwa Yawe kabili apula amafunde ku mufulofye, uyo muntu cine cine mutamfyenifye, pantu ububi bwakwe buli pali ena.” ³² Ilyo abena Israeli bacili mu matololo, basangile umuntu umo aleteba inkuni pa bushiku bwe Sabata. ³³ Na bamusangile aleteba inkuni bamutwala kuli Mose, Aroni na ku lukuta lonse. ³⁴ Elyo bamusunga mukulolela ukupingulwa pantu tabaishibe icakumucita. ³⁵ Elyo Yawe aeba Mose ati, “Uyu muntu wakwipayafye. Ulukuta lonse lumutobaule amabwe kunse ya nkambi.” ³⁶ Kanshi ulukuta lwamufumisha kunse ya nkambi no kumutobaula amabwe afwa nokufwa, pamo ngefyo Yawe akonkomeshe Mose. ³⁷ Yawe aebele Mose ati, ³⁸ “Landa ku bena Israeli utile, ‘Ku fisempe fya nsalu shenu mulebililako insenkebele, kabili ku lusenkebele lumo lumo mulebikako umwando wacifufya, efyo mukalecita na mu nkulo shenu shonse ishikakonkapo. ³⁹ Ilyo mukalamona insenkebele, shikalamwibukishako amafunde yakwa Yawe pakutila mukaleyakonka. Kabili epakuti mwikalakonkelela ulunkumbwa lwa ku mitima yenu nolwa menso yenu. ⁴⁰ Elyo mukalaibukisha no kulakonka amafunde yandi yonse, kabili mukalabafye abamushilo kuli Lesa wenu. ⁴¹ Nine Yawe Lesa wenu, uwamufumishe mu calo ca Egupto kukuba Lesa wenu. Nine Yawe Lesa wenu.’”