¹ Kora mwana Isa, mwana Koati, mwana Levi, pamo na Datani na Abiramu bamwana Eliabu na Oni mwana Peleti, abantu ba mu luko lwa bena Rubeni, batalama, ² elyo baimina Mose. Baima pamo ne ntungulushi 250 isha bena Israeli, ishaishibikwa ku lukuta, ishasontelwe ukulasangwa ku cilye. ³ Elyo balongana ibumba pali Mose na Aroni babakaanya abati, “Nomba mwacilamo! Ulukuta lonse lwamushilo, na onse uulimo, na Yawe ali pakati kabo. Nga cinshi ico muisansabalikila pebumba lya bantu bakwa Yawe?” ⁴ Ilyo Mose aumfwile ifi, awa panshi ubukupeme. ⁵ Elyo aeba Kora ne bumba lyonse ali nalyo ati, “Yawe mailo ulucelo akatulanga umuntu wakwe, kabili uwamushilo. Akalenga nokuti uyo muntu apalame mupepi na ena. Umuntu akasala eo akapalamika kuli ena ⁶ Iwe Kora ne bumba lya bantu bobe mukacite ifi. Mukabuule ififukilisho, ⁷ na mailo ulucelo mukalapwilemo umulilo, mukabikemo ububani pa cinso cakwa Yawe. Umuntu uo Yawe akasala, eukaba uwamushilo. Imwe, mwe bena Levi namucilamo!” ⁸ Mose kabili aebele Kora ati, “Nomba umfweni mwe bena Levi! ⁹ Bushe kanshi tamwasekelamo ico Lesa wakwa Israeli amupatula ku lukuta lwa bena Israeli, pakuti mupalame uko ali mukubomba umulimo wakwa Yawe mwi tenti lyakwe, kabili no kwiminina ku lukuta no kutumika pakati kabo? ¹⁰ Lesa alimupalamika uko ali, iwe pamo na bena Levi banobe. Nomba kabili mulefwaya mupokolole na bushimapepo bwine! ¹¹ Pantu ni Yawe eo mwalonganina pamo iwe ne bumba lyobe mukuilishanyapo. Bushe Aroni nani uo mufwile ukuilishanyapo?” ¹² Elyo Mose aitile Datani na Abiramu, bamwana Eliabu. Lelo nabo bamwasuka abati, “Ifwe tatwaiseko iyoo! ¹³ Bushe tawasekelamo pakutufumya mu Egupto mu calo icifumfumukamo umukaka no buci, pakuti twise tufwile muno mu matololo? Kabili na nomba uleumya no bukalamba pali ifwe? ¹⁴ Kabili tawatutwala mu calo icifumfumukamo umukaka no buci nangu ukutupeela ifishilano fya filime na mabala ya myangashi. Bushe ulefwaya ukufimba aba bantu pa menso. Ifwe tatwaiseko iyoo!” ¹⁵ Awe Mose afulwa nganshi, elyo aeba Yawe ati, “Wipokelela mutuulo wabo. Ine nshapokololapo nangufye ni punda ku muntu nelyo umo, kabili nshabifyapo muntu nelyo umo.” ¹⁶ Mose aebele Kora ati, “Iwe ne bumba lyobe lyonse, mukamonekela ku cinso cakwa Yawe mailo, iwe wine, ibumba lyobe elyo na Aroni. ¹⁷ Cila umo umo akasende icifukilisho cakwe no kubikamo ububani, fyonse fikabe imyanda ibili na makumi yasano (250) no kuleta pa cinso cakwa Yawe. Iwe wine na Aroni mukailetele icifukilisho cila muntu.” ¹⁸ Kanshi bonse umo umo epakubuula icifukilisho cakwe, alapwilamo no mulilo, abikamo no bubani. Epakwiminina pa mwinshi we Tenti Lyakukumaninamo na Mose pamo na Aroni. ¹⁹ Ilyo Kora alongana no lukuta lonse mukukaanya Mose na Aroni pa mwinshi we Tenti Lyakukumaninamo, ubucindami bwakwa Yawe bwamonekela ulukuta lonse. ²⁰ Yawe aebele Mose na Aroni ati, ²¹ “Talukeni ku lukuta ulu, pakuti mbalofye nombaline.” ²² Lelo Mose na Aroni bena epakuwa ubukupeme balapapata abati, “We Lesa, Lesa wa mipashi ya bantu bonse, bushe kuti wafulilwa ulukuta lwa bantu bonse, umo nga ewabifya?” ²³ Kabili Yawe aeba Mose ati, ²⁴ “Eba ulukuta lutaluke ku matenti yakwa Kora, Datani na Abiramu.” ²⁵ Elyo Mose aimine aya kuli Datani na Abiramu, ne ntungulushi sha bena Israeli shamukonka. ²⁶ Elyo asoka ulukuta ati, “Talukeni ku matenti ya aba bantu ababi! Kabili mwikumya na ku cipe cabo nelyo cimo. Epali mwaisa sendelwa pamo pa mulandu wa bubi bwabo.” ²⁷ Awe ibumba epakutaluka ku matenti yakwa Kora, Datani na Abiramu. Datani na Abiramu epakufumina panse baiminina pa mwinshi wa matenti yabo, pamo na bakashi na bana babo no twaice. ²⁸ Elyo Mose atila, “Muli ici emo mwalaishibila ukuti Yawe ewantuma kukubomba ifintu fyonse ifi, kabili mwishibe ukuti te ku mano yandi mombela iyoo. ²⁹ Nga cakuti aba bantu bafwafye imfwa Lesa, ngefyo abantu bonse bafwa, awe ninshi Yawe tewantuma nakalya. ³⁰ Lelo nga cakuti Yawe acita icintu cimo icipya icishatala acicitikapo, no mushili walepuka no kubamina pamo pene ne fintu fyabo fyonse, kabili baya abomi ku calo ca bafwa, ninshi muli nokwishiba ukuti aba bantu nabasuula Yawe.” ³¹ Ilyo apwile ukusosa fyonse ifi, umushili apo baiminine walepuka, ³² kabili wacenama no kubamina pamo pene ne ndupwa shabo, bonse abantu bakwa Kora ne fipe fyonse. ³³ Baile abomi ku calo ca bafwa, pamo pene ne fipe fyabo fyonse. Umushili wabelikisha, baloba no kufuma pebumba. ³⁴ Abena Israeli pakumfwa inkuuta shabo, bonse abali mumbali, bafulumuka no kupunda balepunda abati, “Naifwe bene umushili kuti watumina!” ³⁵ Kabili umulilo wafumine kuli Yawe no koca abaume imyanda ibili na makumi yasano (250) abaletuula ububani. ³⁶ Elyo Yawe aebele Mose ati, ³⁷ “Eba Eleasa mwana Aroni shimapepo ukuti afumye ififukilisho mu mito ya bantu abapile, apose imifito ukutali, pantu ififukilisho fyamushilo, ³⁸ ififukilisho fya bantu abafwilile pa bubifi bwabo. Kanshi ufule ififukilisho ku nondo fipapatale ngo tumalata, mufimbe pa bulambo pantu fyacituulwa pa cinso cakwa Yawe kanshi fyamushilo. Ici cibe e cishibilo ca bena Israeli.” ³⁹ Kanshi shimapepo Eleasa epakubuula filya fifukilisho fyaletele abantu abapile, bafulamo utumalata, bafimba na pa bulambo, ⁴⁰ ngefyo Yawe amukonkomeshe ukupitila muli Mose. Kanshi ici cakwibukishako abena Israeli ukuti uushili shimapepo, kabili uushili uwa mu lupwa lwakwa Aroni, tali nakupalama no kocela Yawe ububani, epali afwa nga filya fyafwile Kora na bantu bakwe bonse ⁴¹ Ubushiku bwakonkelepo, ulukuta lonse ulwa bena Israeli lwailishenye kuli Mose na Aroni aluti, “Abantu bakwa Yawe nimwe mwabepeye.” ⁴² Nomba ilyo ulukuta lwalongana mukukaanya Mose na Aroni, bena bapilibukila kwi Tenti Lyakukumaninamo, apopenefye bamona ikumbi lyakupapo no bucindami bwakwa Yawe bwamoneka. ⁴³ Elyo Mose na Aroni baya kuntanshi ye Tenti Lyakukumaninamo. ⁴⁴ Kabili Yawe aeba Mose ati, ⁴⁵ “Talukeni kuli ulu lukuta, pakuti mbalofye nombaline!” Kabili Mose na Aroni bawa panshi ubukupeme. ⁴⁶ Elyo Mose aebele Aroni ati, “Buula icifukilisho cobe, ulapwilemo no mulilo wa pa bulambo, ubikemo no bubani. Endesha, uye ne cifukilisho ku lukuta, kabafutileko pa fya bubifi bwabo! Yawe nafulwa nganshi ne cikuko nacitendeka.” ⁴⁷ Kanshi Aroni nao acita nefyo Mose amwebele, abutukila mukati ke bumba lya bantu ninshi icikuko nacitendeka kale mu bantu. Lelo Aroni apekenye icifukilisho no bubanimo, abafutilako pa bubifi bwabo. ⁴⁸ Kabili aiminine pakati ka bantu abashele abomi elyo na bafwile, ne cikuko ilyo linefye capwa no kupwa ⁴⁹ Nomba abantu bafwile ku cikuko bali 14,700, ukulunda ku mpendwa ya bafwile pa mulandu wa kutalama kwakwa Kora. ⁵⁰ Elyo Aroni abwelela kuli Mose pa mwinshi we Tenti Lyakukumaninamo, pantu icikuko calipwile.