¹ Umfweni ifyo Yawe alelanda pa bena Israeli. Ima ulubulule pa cinso ca mpili, uleke impili no tupili twine tumfweko ifyo iwe ulesosa. ² Imwe mwe mpili, mwe mifula ya pe iyaikasha isonde lyonse, umfweniko uko Yawe alelubulwisha. Yawe ala napeela abantu bakwe umulandu, alelubulwisha abena Israeli. ³ Yawe aletila ati, “Bushe kwena finshi ifyo ine namucita imwe mwe bantu bandi? Bushe ine namukalifya shani imwe imitima? Aleni njasukeni. ⁴ Ine nalimufumishe mu calo ca Egupto. Namulubula na mu busha. Natuma Mose, na Aroni, na Miriamu, pakuti balemutungulula imwe. ⁵ Mwe bantu bandi, ibukisheni ifyo Balaki imfumu ya bena Moabu apangile ukumucita, mwibukishe nefyo Balamu mwana Beori ayaswike Balaki. Ibukisheni ifintu ifyalecitika mu nshila, ukutampila mu Shitimu ukuya fika ku Giligali. Muleibukisha ifi fintu pakuti muleshininkisha ificitwa fyakwa Yawe ifyalungama.” ⁶ Bushe finshi ifyo ine ningatwalila Yawe wa mu mulu, ilyo ndeya kukupepa Lesa umucindami? Bushe ndesenda ifiponti fya ŋombe ifya mwaka umo, ifyakuya mukumulekela ilambo ilyakoca? ⁷ Bushe Yawe kuti atemwa nga namutwalila basukusuku amakana na makana, no kulamwitulwila amafuta ya miolifa ayakuti yalapita ngo mulonga? Bushe kuti namutuula umwana wandi umwaume uwe beli pakufuta pa fyabubifi fyandi, icisabo ca mubili wandi pa lubembu lwa mweo wandi? ⁸ Awe iyoo, we muntu, Yawe alikwebelapo ifintu ifyawama. Bushe ni finshi afwaya ukuti iwe ulecita? Uli nokulacita umulinganya, ukutemwa ukulanga uluse, kabili uli nokulaicefya mukulamubeela. ⁹ Yawe uyo alebilikisha abena musumba ati, “Ukulakwatila Yawe akatiina, e mano. Umfweni kuno imwe mwe balongana mu musumba. ¹⁰ Bushe kuti nalaba ifikwatwa wanonkele mu bufufuntungu we mubifi? Babomfya ifipimo ifyabufi, icintu ico ine napata. ¹¹ Bushe ine kuti nabelela shani abo bantu uluse, ababomfya amasekelo yabufi, abapimina ku mufuko wa mabwe ya bucenjeshi? ¹² Abakankala ba mu musumba baba no buluku, elyo na bantu ababamo babufi, ne ndimi shabo shilanda ifyabucenjeshi. ¹³ Kanshi ine nomba natampako ukulamukanda imwe,no kulamulofya pa mulandu wa fyabubifi fyenu. ¹⁴ Ukulya kwena mwakulalya, nomba tamwaleikuta nakalya, mwakulaumfwafye insala mu nda shenu. Ilyo mwatutila ifyo mwanonka pakufipususha, tamwakulamona apakufitutila nakalya. Ifyo mwakulapusushapo, ine nkafyonaula mu nkondo. ¹⁵ Mwakulatanda iŋanu shenu, nomba tamwakulaseepamo akantu. Mwakulaenga amafuta ya miolifa, nomba mwakulafilwa ukuyabomfya. Mwakulakama umwangashi, nomba mwakulafilwa ukuunwa. ¹⁶ Imwe mukonkelelafye imisango ibi iya mfumu Omuri ne micitile yakwa mwane imfumu Ahabu. Imwe mwakonkanyapofye ukulakonka imisango yashiko, Kanshi na ine imwe ndemuponesha ishamo iline line, na bantu bambi bonse bakulamuwela. Konsefye aba mishobo bakulamuwela ububi.”