¹ Imwe mwe bena Yerusalemu, longanikeni ifita, ifita ifyaba mu musumba, pantu abalwani nabatushinguluka. Balasansa kateeka wa cino calo ca Israeli no kumuma pesaya ku nkoto. ² Lelo iwe Betelemu Efulata, nangu waba akamushi akacepeshapo pa ndupwa shakwa Yuda, awe kwena ni muli iwefye emukafuma umo uwa kuli ine uuli nokwisa mukulateeka icalo ca Israeli, uo intuntuko yakwe yaba iyakale nakale, iya myaka ya pe na pe. ³ Eico kanshi Yawe akatala akalekeleshe abantu bakwe, ikasuke inshita ikafike iyo akapapilapo uuli nokupapa uyo mwana umwaume. Lyena abekalacalo banankwe abakaba muli bunkole, elyo bakabwela, bakese ba pamo na bamunyinabo abena Israeli. ⁴ Elyo nao akeminina no kulacema abantu bakwe na maka ayakwatako Yawe, mu bucindami bwe shina lyakwa Yawe Lesa wakwe. Na bantu bakwe bakalaikala mu cibote, na bantu pesonde ponse bakalasumina ubufumu bwakwe. ⁵ Kabili eukaba umutende wabo. Ukulubulwa no kukandwa kwa bena Israeli Ilyo abena Asiria bakasansa icalo cesu no kutobaula amalinga ya misumba yesu, ifwe tukabatumina impalume shesu ishabulamba nganshi, nasho shikabafye cine lubali ne ntungulushi cine konse konse, esho shikaye balwisha. ⁶ Ebakaya teeka icalo ca Asiria ku lupanga, ne calo cakwa Nimurodi ku lupanga ulwasokolwa. Eukatupusushako ku bena Asiria ilyo bakasansa icalo cesu, ilyo bakapalamina mu mipaka yesu. ⁷ Abakwa Yakobo abakashalapo bakekala pakati ka mishobo iyingi, bakaba ngo mume uwafuma kuli Yawe, nge mfula iyilelokela pa cani iishilolela umuntu kabili tailindila muntu ukuyeba. ⁸ Abakwa Yakobo bamo bakashala nabekala pamo na bantu ba mishobo iyingi, pakati ka bantu abengi, lelo kwena nangu bakalaikala nabo, abakwa Yakobo bakalaba nge nkalamo ilefwaya icakulya mu mutengo, ngo musepela wa nkalamo uuli apo balecemena impaanga. Uwakuti nga wafukukila impaanga, awe ninshi kushisantaula, ukwabula nelyo umo uwakuti ashipokololeko. ⁹ Bakalwisha no kucimfya abalwani babo bonse, no kubalofya bakabalofyafye bonse. ¹⁰ Yawe aletila ati, “Pali iyo nshita ine nkamupoka bakabalwe benu, kabili nkonaula na maceleta yenu. ¹¹ Nkonaula imisumba iyaba muli cino calo cenu, nkabongolola na malinga yenu yonse. ¹² Nkonaula na manga yenu yonse, kabili nshakashepo kabuka nelyo umo. ¹³ Nkonaula utulubi twenu ne nceshi sha mabwe ishamushilo isho imwe mupepa. Tamwakatale nakabili amupepa ifintu ifyo mwapanga ne minwe yenu. ¹⁴ Nkabongolola inceshi sha mulungu Ashera ishaba muli cino calo cenu, nkonaula ne misumba yenu. ¹⁵ Ine nkalandula mu bukali no kufulwa, pa micitile ya bantu ba mishobo yonse iyakaana ukulambeela.”